UZAKARIYA 14 - IsiNdebele 2012 Translation

USomnini uzakuza abe abuse

¹ Qala, kuza ilanga elilethwa nguSomnini, lapha izitha zakho zizakwabelana khona ipahlakho ngaphakathi kwakho, Jerusalema.

² USomnini uthi: “Ngizakubuthelela zoke izizwe bona zilwe neJerusalema; idorobho lizakuthunjwa, izindlu zisahlelwe bese abafazi bayagagadlhelwa. Ingcenye yedorobho izakuya ekuthunjweni, kodwana abaseleko bazakuhlala edorobhenapha.”

³ Yeke uSomnini uzakuvela ahlule izizwezo, njengombana vane ahlule ngamalanga wepi.

⁴ Mhlokho uSomnini uzakubeka iinyawo zakhe phezu kweNtaba ye-Oliva, ngepumalanga yeJerusalema, iNtaba ye-Oliva izakuphadlhuka kabili ukusuka epumalanga ukuya etjingalanga. Ingcenye yentaba izakuya ngetlhagwini bese enye iya ngesewula, yenze umrhoba omkhulu.

⁵ (Umrhoba weKhidroni onabela e-Atshali uzakuqintwa. Uzakuqintwa njengamhla uqintwa kuhlengezela kwephasi emihleni yabo-Uziya ikosi yakwaJuda.) Yeke uSomnini uZimakho uzakufika, kabacwengileko bakho wena Jerusalema.

⁶ Mhlokho akuzukusa, akuzukuba makhaza nanyana kube nelothe.

⁷ Ngesikhatheso, esaziwa nguSomnini, kuzakuba semini kwaphela, kungabi nemini nobusuku. Lokha nakuhlwako, kuzasoloko kunomkhanyo.

⁸ Mhlokho amanzi agelezako azakugobhoza aphuma eJerusalema; ingcenye yawo izakugelezela ngelwandle elingepumalanga bese amanye agelezela ngelwandle elingetjingalanga, ubusika nehlobo.

⁹ USomnini uzakubusa ephasini loke. Mhlokho kuzakuba noSomnini munye, libizo lakhe lodwa elizakubizwa.

¹⁰ Inarha yoke ukusuka eGeba ukuya eRimoni ngesewula izakufana nomrhoba weJordani. Kodwana iJerusalema izakuphakanyiswa inzinze endawenayo. Ukusuka eSangweni lakwaBhenjamini ukuya ngehlangothini langeSangweni lokuThoma, ukuya eSangweni leJikeni nokusuka eMbhotjhongweni weHananeli ukuya ebutlhodlhelweni besigodlweni,

¹¹ yoke indawo leyo izakuba nabahlali. IJerusalema ayisazukurhayilwa godu; izakuvikeleka.

¹² Naka amanikelela uSomnini azakurhadla ngawo zoke izizwe ezizakulwa neJerusalema: Inyama yazo izakuwohloka ziphila, amehlwazo awohlokele emgodinawo namalimazo abolele ngemilonyenazo.

¹³ Mhlokho uSomnini uzokurhadla abantu ngevalo. Babambane bebasahlelane omunye nomunye.

¹⁴ UJuda naye uzakuhlula njengeJerusalema. Kuzakuhlanganiswa umnono wezizwe zoke ezisahlela iJerusalema: kube liqubi legolide nesiliva kanye nezambatho.

¹⁵ Amanikelela afana nalawo azakurhadla iinjomani, iimeyila, amakamela nabodumbana – zoke iimbandana eziseenkampeni zezitha.

¹⁶ Kwabasele emakhaya bezizwe zoke ebezisahlele iJerusalema bazakukhuphuka umnyaka nomnyaka bayokulotjha uSomandla onguSomnini uMninimandlawoke, bebahlanganyele ekugidingeni umnyanya weMitlhatlhana.

¹⁷ Abantu bephasi, abangakhuphukeli eJerusalema ukuyokulotjha uSomandla onguSomnini uMninimandlawoke, abazukulibona izulu.

¹⁸ Abantu beGibhide abangazokukhuphuka ukuyogidinga emnyanyeni weMitlhatlhana, abazukuzwiswa amanikelela njengezinye izizwe, kodwana amadlelwabo wangemlanjeni iNayili azakuhlala omile.

¹⁹ Lokhu kuzakuba sibetho seGibhide bekube sibetho sazo zoke izizwe ezingayi ukuyokugidinga umnyanya weMitlhatlhana.

²⁰ Mhlokho kuzakutlolwa amagama athi “zahlukaniselwe uSomnini” ebuketleketleni beenjomani. Iimbiza zokupheka ezisendlini kaSomnini, zizakufana neenqwebu ezicwengileko eziphambi kwe-aldari.

²¹ Yoke imbiza eseJerusalema nekwaJuda izakucwenga phambi kwakaSomnini uMninimandlawoke, boke abazokwenza umhlabelo bazakuthatha ezinye zeembizezo bapheke ngazo. Mhlokho angeze kusaba nomthengisi endlini kaSomnini uMninimandlawoke.