UZAKARIYA 13 - IsiNdebele 2012 Translation

¹ Mhlokho umthombo uzakuvulekela indlu kaDavida nabahlali beJerusalema bona ubahlambulule ezonweni nekusilaphaleni.

Ukupheliswa kokulotjhwa kwabosingazimu nabaphorofidi bamala

² “Mhlokho, ngizakuphelisa amabizo wabosingazimu enarheni ukuze bangasakhunjulwa godu. Ngizakususa nabaphorofidi abanommoya osilapheleko enarheni.” Kutjho uSomnini uMninimandlawoke.

³ Nakube nanyana ngiwuphi wabaphorofidaba soloko uyaphorofida, uyise nonina abambelethileko bazakuthi kuye: “Ufanele ufe ngombana ukhuluma amala ebizweni lakaSomnini.” Ababelethi bakhe bazamhlaba lokha nakaphorofidako.

⁴ Mhlokho woke umphorofidi wamala uzakuba neenhloni ngombono wesiphorofido sakhe, angeze embatha inaka lakhe bona ayokuleya amala.

⁵ Uzakuthi: “Angisuye umphorofidi mina; ngimlimi; ihlabathi yintwami engayithoma ngisemntwana.”

⁶ Nange umuntu ambuza athi: “Alo, ziimbazi zani lezi, hlangana namahlombakhwapha?” Yeke uzakuthi: “Awa, iimbazezi, ngezokubethwa, ngazithola endlini yeenini zami.”

Nakubethwa umelusi kuphadlhalala izimvu

⁷ USomnini uMninimandlawoke uthi: “Phaphama wena sabula, ujamelane nomelusami; iye, ujamelane nomrholi webandla lami. Kghedlha umelusi ukuze izimvu ziphadlhalale. Ngizakujika isandla sami sibe naphezu kokuncancazana.

⁸ “USomnini uthi: “Enarheni yoke, iingcenye ezimbili kezintathu zizakurhayilwa bezitjhabalale; nokho isithathu sizakusinda.

⁹ Isithathwesi ngizasidlulisa emlilweni; ngisicwengisise njengocwengisisa isiliva negolide. Sizakubiza ibizo lami, nje-ke ngizasiphendula, ngithi, ‘Bababantu bami,’ bese sona sithi, ‘USomnini nguZimethu.’ ”