UZAKARIYA 11 - IsiNdebele 2012 Translation

¹ Vula iminyangwakho wena Libhanoni ukuze umlilo urhayile imisedarakho!

² Rhahlawula wena msayipurusi ngombana umsedari uwile, imithi ephakamileko irhayiliwe! Rhahlawulani nina ma-owuku weBhatjhani ngombana isiminyaminya sehlathi sikghedlhiwe!

³ Lalelani ukurhahlawula kwabelusi; umrhulabo ononileko urhurhuliwe! Yizwani ukubhodla kweengwenyamana, isiminyaminya seJordani sikghedlhiwe!

Umelusi olungileko nokhohlakeleko

⁴ Nakhu okwatjhiwo nguSomnini uZimami: “Yelusa izimvu zokuhlatjwa.

⁵ Abathengi bazo bazihlaba bebangazizwela umlandu. Labo abazithengisako bathi, ‘Akathokozwe uSomnini, uthi nginjingile na!’ Nabelusi bazo abe abanasirhawu nazo.

⁶ Nange ngingasenasirhawu ngabantu benarha le begodu ngibaliselele bona badlane uboya bengibaliselele nangekosabo, bazakubhubhisa inarha. Kuzakuba njalo nange ngingabasindisi emandlenabo.” Kutjho uSomnini.

⁷ Nje-ke ngathoma ukwelusa izimvu zokuhlatjwa zabathengisi. Ngathatha iintonga ezimbili, enye ngayithiya bona nguMusa enye ngathi nguHlanganani. Ngelusa umhlambi

⁸ ngemva kobana ngiqotjhe abelusi abathathu. Kuthe ngenyanga yinye ngabe sengidiniwe ngomhlambi lo, kanti nawo wase ukholekile ngami.

⁹ Ngathi kiwo: “Abe angisazonelusa. Akufe efako, kubhubhe ebhubhako. Eziseleko zigadangane zodwa.”

¹⁰ Yeke ngathatha intongami ekuthiwa nguMusa ngayephula, ngabhidla isivumelwano uSomnini asenza nabo boke abantwabo.

¹¹ Nje-ke sabhidleka khona mhlokho, kwathi abathengisi ngezimvu agade bangiqalile balemuka bonyana gade kulitshwayo lakaSomnini.

¹² Ngabatjela ngathi: “Nanidlumbana bona kulungile, ngikhokhelani, kodwana nakungasi njalo, yenilise.” Nje-ke bangikhokhela amatjhumi amathathu weempaparwana zesiliva.

¹³ USomnini wathi kimi: “Ifuthele kumncibilikisisimbi, iye, imali ehle ebangikhokhele ngayo leyo!” Yeke ngathatha imali leyo ngayifuthela kumncibilikisisimbi ngendlini kaSomnini.

¹⁴ Ngephula intongami yesibili ekuthiwa nguHlanganani, ukubhidla ubufo phakathi kwakaJuda no-Israyeli.

¹⁵ Yeke uSomnini wathi kimi: “Ukusuka gadesi, sebenzisa iinsetjenziswa zomelusi odlhayeleko,

¹⁶ ngombana ngizokuvusa umelusi enarheni ongeze adlhadlharhele umhlambi olahlekileko, nanyana afunane neziphungukako, nanyana ahlenge ezilimeleko, nanyana ondle eziphilileko. Uzakugoma inyama yezimvu zekhethelo, abe agugude neenqatha zazo.”

¹⁷ Uzazizwa umelusi odlhayeleko osukela umhlambi! Inga isabula ingamrharhabula umkhono, imgobhodlhe nelihlo langesidleni! Umkhonwakhe ukokorane kokukokorana nelihlo lakhe langesidleni liphophale phophali!