UZAKARIYA 10 - IsiNdebele 2012 Translation

USomnini uzakutjheja uJuda

¹ Nababawa izulu ngesikhathi sesilimela, uSomnini uzakwenza amafu anzima, awulule izulu, lanele zoke iintjalo neemila enarheni.

² Iinsithabuso zikhuluma ikohliso, abaphenguli babona iinsese, amabhudango akhohlisa abantu begodu akaduduzi, ngokunjalo abantu bakwa-Israyeli baba njengezimvu ezinganamelusi, badurha bebawurubajwe.

UJuda uzakuhlula, u-Israyeli abuye

³ USomnini uthi: “Ubukhali bami buyavutha ngabelusi, ngizakuhlunguphaza abarholi.” Iye, uSomnini uMninimandlawoke uzakwelusa umhlambakhe, indlu kaJuda; uzabenza babe njengenjomani yepi ezitjhayako.

⁴ USomnini uzabanikela abarholi abanetlha, iinkhonkhwani eziqinileko, amajoni naye woke umuntu oya epini. Boke njalo,

⁵ bazakuba njengosibindigidi. Epini bazakugadangela izitha ebhudwini leendledlana. Bazakuhlula ngombana uSomnini unabo. Izitha ezikhwele iinjomani zizakubhalelwa nya.

⁶ USomnini wathi: “Njengombana ngiqinise indlu kaJuda, njalo-ke ngizakusindisa indlu kaJosefa. Ngizakubuyisa indlu kaJosefa, ngibe nezwelo kiyo. Izakuba ngathi azange khengiyilahlele izandla. Ngebanga lokobana nginguSomnini uZimabo, ngizabaphendula.

⁷ U-Efrayimu naye uzakufana nosibindigidi, neenhliziyo zabo zizakwenama inga zifunyene ihleza. Abantwababo bazakubona lokhu bajekezele; iinhliziyo zabo zithabele uSomnini.

⁸ Ngizakuraga u-Israyeli angene esibayeni. Ngambala ngizabahlenga babe banengi njengaphambilini.

⁹ Nanyana ngibasabalalise hlangana nezizwe eenarheni ezikude, bazangikhumbula. Bazakuphila nabantwababo bebabuye.

¹⁰ Ngizababuyisa eGibhide, ngibarage kusuka e-Asiriya. Ngizabaletha eGiliyadi neLibhanoni, bazakuba banengi bebatlhoge nendawo yokuhlala.

¹¹ Umlambo we-Asiriya uzakuthuthumela. Ngizakumanya amagagasi welwandle ukuze zoke iindawo zeNayili ezitjhingako zome. Yoke into i-Asiriya ethembele kiyo izakwehliswa, intonga yobukhosi yeGibhide inyelele.

¹² Ngizakuqinisa u-Efrayimu ukuze abe nobudlelwano obuhle nami.” Kutjho uSomnini.