UZAKARIYA 1 - IsiNdebele 2012 Translation

Ukubizwa kokubuyela kuSomnini

¹ Ngenyanga yobumnane emnyakeni wesibili wokubusa kwakaDariyasi, ilizwi lakaSomnini lafika kumphorofidi uZakariya umsa kaBherekiya omsa ka-Ido:

² “USomnini wasilingeka khulu kwamambala ngaboyihlomkhulu.

³ Yeke, yewutjele abantu uthi: Nakhu okwatjhiwo nguSomnini uMninimandlawoke, “ ‘Buyelani kimi ngombana nami ngifuna ukubuyela kini.’ Lawa, mamezwi kaSomnini uMninimandlawoke.

⁴ “Ningalingisi aboyihlomkhulu okwathi lokha abaphorofidi baphambilini nabathi kibo: Nakhu okwatjhiwo nguSomnini uMninimandlawoke, ‘Phendukani emikhubeni nezenzweni zenu zobukhohlakali.’ Kodwana azange balalele begodu azange bebangithathele ehloko.” Kutjho uSomnini.

⁵ “Kwenzekani-ke ngaboyihlomkhulu nabaphorofidi babo bamanga?

⁶ Ngambala amezwami nemiyalwami engayithumezela ngeenceku zami, abaphorofidi, yafika kiboyihlomkhulu. Kwafanela bona baphenduke bebavume bathi, ‘USomnini uMninimandlawoke usenzele okufanelana nemikhuba nezenzo zethu njengombana bekathe uzakwenza.’ ”

Umbono ngamadoda weenjomani

⁷ Elangeni lamatjhumi amabili nane; ngenyanga yetjhumi nanye, okuyinyanga kaTjhebati, ngomnyaka wesibili wokubusa kwakaDariyasi, umphorofidi uZakariya umsa kaBherekiya, omsa ka-Ido wabona umbono ovela kuSomnini.

⁸ Kwathi ebusuku ngehlelwa mbono: Ngabona umuntu akhwele injomani ekofe. Gade ajame hlangana nemithi yemiritlili ngemrhobeni. Ngemva kwakhe kwakujame iinjomani ezinzotho, ezibomvu nezimhlophe.

^9-10 Ngabuza ngathi: “Kosami, kutjho ukuthini lokhu?” Isithunywa sakaSomnini ebegade sijame hlangana nemithi yemiritlili sathi kimi: “Ngizakuhlathululela bonyana kutjho ukuthini. Laba ngabathunywe nguSomnini kobana bakhambe iphasi loke.”

¹¹ Base bayabika-ke esithunyweni sakaSomnini esasijame hlangana nemithi yemiritlili bathi: “Sikhambe iphasi loke, safunyana lipholile.”

¹² Nje-ke isithunywa sakaSomnini sathi: “Somnini Mninimandlawoke, kuzabe kube nini usitheze isirhawu phezu kweJerusalema nemadorobheni wakwaJuda obegade ulokhu uwathukuthelele iminyaka ematjhumi alikhomba woke poro?”

¹³ Yeke uSomnini wakhuluma amezwi amahle naduduzako ngesithunywa sakhe.

¹⁴ Nje-ke isithunywa sakaSomnini sathi: “Memezela amezwi la: “USomnini uMninimandlawoke uthi, ‘Nginesikhwele esikhulu ngeJerusalema neZiyoni

¹⁵ begodu ngisilingeke khulu ngezizwe ezizikhakhazisa ngokuzethemba kwazo. Bengisilingeke isikhatjhana esifitjhani kodwana izizwezi zithuwelele ngokonakala.’

¹⁶ “Nje-ke nakhu okwatjhiwo nguSomnini, “ ‘Ngizakubuyela eJerusalema ngesirhawu, lapha ithempeli lami lizakwakhiwa khona ngobutjha begodu neJerusalema izakwakhiwa butjha.’

¹⁷ “Ragela phambili umemezele uthi: “Nakhu okwatjhiwo nguSomnini uMninimandlawoke, ‘Amadorobhami azakuthoma godu aphuphume ngomnotho, yeke uSomnini uzakuthoma godu aduduze iZiyoni abe akhethe iJerusalema.’ ”

Umbono ngeempondo nabososino

¹⁸ Ngaqala godu, ngabona kuneempondo ezine.

¹⁹ Ngabuza isithunywa sakaSomnini ngathi: “Khuyini-ke lokhu?” Sangiphendula sathi: “Lezi ziimpondo ezahlakaza uJuda, u-Israyeli neJerusalema.”

²⁰ Yeke uSomnini wangikhombisa abososino abane.

²¹ Ngabuza ngathi: “Alo, bazokwenzani-ke laba?” Wangiphendula wathi: “Laba baziimpondo ezahlakaza uJuda kangangobana kwatlhogeka noyedwa ovusa ihloko, kodwana abososino beze ukuzobethusa, bebaqede amandla wezizwe ezaphakamisela iimpondo zazo enarheni yakwaJuda kobana zihlakaze abantu bakhona.”