UTITOSI 3 - IsiNdebele 2012 Translation

Ukuziphatha okuhle

¹ Bakhumbuze bona bathobele ababusi neemphathimandla, babe ngabalalelako bebazimisele emisebenzini yoke emihle,

² bangakhulumi kumbi nanyana kubani; bangabi zizilwi kodwana babe ngabathobekileko, bakhombise ukuba nommoya ophasi komunye nomunye.

³ Nathi ngokwethu khesaba ziindlhayela, saba mahlongandlebe, sadukiswa, saba makhoboka wemihlobohlobo yeenkanuko nokuzithokozisa. Saphila ebumbini nemoneni, sahloywa nathi sahloya abanye.

⁴ Kodwana lokha ukulunga nethando lakaZimu uMsindisethu nalibonakaliswako,

⁵ wasisindisa, ingasi ngebanga lemisebenzi yokulunga esiyenzileko, kodwana ngebanga lomusa wakhe, ngokuhlanjwa kokuzalwa butjha nokuvuselelwa ngoMoya oCwengileko,

⁶ othelwe phezu kwethu ngobunengi ngoJesu Krestu uMsindisi wethu

⁷ ukuze kuthi sesilungisisiwe ngomusa wakhe, sibe ziindlalifa ngokwethemba lokuphila okungapheliko.

⁸ Liqinisile ilizwi leli. Ngithanda bona ugandelele ezintweni lezi khona kuzakuthi labo abakholwa kuZimu bayelele ukuzinikela ekwenzeni imisebenzi emihle. Izinto lezo zihle begodu zilisizo kibo boke.

⁹ Kodwana gegeda iimpikiswano zobudlhayela, imilando yokubelethana kanye nokusolana ngomthetho ngombana lokho akusizi begodu kulilize.

¹⁰ Umuntu obanga ukuhlukana emva kobana sele elulekwe kanye namkha kabili umale

¹¹ ngombana uyazi bona onjalo uphambukile, wonakele sele azigwebe yena.

Isiphetho

¹² Lokha nangithumela kuwe u-Arithema namkha uThikiku, yiza msinyana kimi eNikhopholi ngombana ngizimisele ukudlela ubusika lapho.

¹³ Linga ngamandlakho woke uthumele umjameli uZena no-Apholo utjheje bona bangatlhogi ilitho endleleni.

¹⁴ Abantu bethu kufanele bafunde ukuzinikela ekwenzeni imisebenzi emihle, khona bazakwazi ukusiza lapho kuhlongeka khona, bangabi ngabanganazo iinthelo.

¹⁵ Boke abanami lapha bayakulotjhisa. Lotjhisa abasithandako ekukholweni. Umusa awube nani noke.