UTITOSI 2 - IsiNdebele 2012 Translation

Ifundiso yamambala

¹ Kodwana nakunguwe, fundisa okukhambisana nesifundo esifaneleko.

² Tjela amadoda amadala bona abe nesizotha, ahlonipheke, abe ngabhadlileko, azwisiseke ekukholweni okuphilileko, ethandweni nekunyamezeleni.

³ Ngokunjalo fundisa abafazi abadala bona baziphathe ngokuhlonipheka okuletha ukucwenga, bangabi ngabahlebako namkha amakhobokakazi wewayini, kodwana ababe ngabafundisa okuhle

⁴ ukuze bakwazi ukukhuthaza abomalukazana ukuthanda amadodabo nabantwababo,

⁵ bazibambe, babe msulwa, baphathe kuhle imizabo, babe nesisa, bathobele abayeni babo ukuze ilizwi lakaZimu lingarhubutjhwa.

⁶ Ngokunjalo khuthaza amasokana bona azibambe.

⁷ Wena-ke zibonakalise kikho koke usibonelo semisebenzi emihle; ekufundiseni kwakho ubonise ubuqotho nokuncama,

⁸ ube nekulumo ephilileko engeze yasoleka ukuze kuthi nanyana ngubani omjamelani adane kungabi nalitho elimbi angalitjho ngathi.

⁹ Fundisa iinceku kobona zithobele abanikazi, zibenzele okubathokozisako kikho koke, zingaphikisani nabo,

¹⁰ zingabebeli kodwana zikhombise ukuthembeka okupheleleko ukuze kuthi ezintweni zoke zihlobise ifundiso kaZimu uMsindisi wethu.

¹¹ Umusa kaZimu ubonakalisiwe ukuletha isindiso kibo boke.

¹² Usifundisa bona sihloboke ubumbi neenkanuko zephasi, siphile ngokuziphatha kuhle, ngokulunga nangokwesaba uZimu esikhathini sanamhlanje.

¹³ Iye, lokho sikwenze nasilokhu sisalindele ithemba elibusisiweko nokwambulwa kwephazimulo kaZimethu omkhulu noMsindisi wethu uJesu Krestu,

¹⁴ owazinikela ngebanga lethu ukuze asihlenge ekukhohlakaleni koke, azihlambululele abantu bakhe abatjhisekela imisebenzi emihle.

¹⁵ Fundisa izintwezo; ukhuthaze bewukhalime ngegunya loke. Akungabikhona namunye okunyazako.