UTITOSI 1 - IsiNdebele 2012 Translation

Ukulotjhisa

¹ UPowula ikhoboka lakaZimu nompostoli wakaJesu Krestu, ngebanga lokukholwa kwabakhethiweko bakaZimu nangokwazi iqiniso elimayelana nokwesaba uZimu,

² ethembeni lepilo engapheliko uZimu ongaleyi amala akuthembisa koke kungakathomi;

³ kwathi ngesikhathi esifaneleko wembula ilizwi lakhe ngokumemezela engaphathiswa khona ngomyalo kaZimu uMsindisi wethu.

⁴ KuTitosi umntwanami wamambala ngokukholwa esikuhlanganyeleko soke. Akube kuwe umusa nokuthula okuvela kuZimu uBaba nakuKrestu Jesu uMsindisethu.

Umsebenzi kaTitosi eKrete

⁵ Ngakutjhiya eKrete ngehloso yokobana uhlele okuseleko ngokufaneleko, ukhethe abaphathi bebandla kiyo yoke imizi, njengombana ngakuyala:

⁶ kube mumuntu ongasolekiko, onomfazi munye, onabantwana abakholwako nabangasoleki ngobukhohlakali nokungezwa;

⁷ ngombana umbonisi njengomphathi weendaba zakaZimu kufanele angasoleki, angazigqaji, angapheli ihliziyo, angabi sidakwa, angabi ngosisilwi nomarhamaru;

⁸ kunalokho kufanele abe ngophatha kuhle abayeni, othanda okulungileko, oziphethe kuhle, oqotho, ohlanzekileko nozikhalimako.

⁹ Kufanele akakarele aqinise elizwini elithembekileko ngokwefundiso ukuze akwazi ukutjhumayela ngefundiso ehle, ahlule abaphikisana nayo,

¹⁰ njengombana babanengi abangalaleliko nabakhuluma ilize begodu ababaluthi, khulukhulu labo ekungebokusoka.

¹¹ Kufuze bathuliswe ngombana badanisa imindeni ngokufundisa okungakafaneli ngebanga lenzuzo embi.

¹² Omunye wabo ogade amphorofidi wekhabo wathi: “AmaKrete anamanga ngaso soke isikhathi, aziinlwana eziziinkhohlakali, aziinrhiribedeli ezimavila.”

¹³ Ubufakazobo buliqiniso. Ngebangeli kumele ubakhalime msinyana, khona bazakuba nokukholwa okuthe tjha,

¹⁴ bangalaleli iinolwana zamaJuda namkha imiyalo yalabo abadela iqiniso.

¹⁵ Kwabahlanzekileko koke kuhlanzekile, kodwana akukho okuhlanzekileko kwabakhohlakeleko nabangakholwako ngombana iingqondo zabo nemikhumbulwabo vele yonakele.

¹⁶ Bazitjhaya sengathi bayamazi uZimu kodwana ngezenzo zabo bayamlandula. Bayanyenyisa, abezwa, abakalungeli ukwenza nanyana yini elungileko.