URUTE 1 - IsiNdebele 2012 Translation

Amatjhwa wakaNawomi kwaMowabi

¹ Eminyakeni yokubusa kwabagwebi, kwaba nendlala enarheni, kwathi indoda ethileko egade ihlala eBhethe-Lehema kwaJuda yakhamba nomkayo namadodana amabili yayokugogobala enarheni yakwaMowabi.

² Ibizo lendoda le gade kungu-Elimeleki, ibizo lomkakhe bekunguNawomi, kanti amabizo wamadodanakhe amabili wona gade kunguMarhaloni kanye noKiliyoni. Abantwaba gade bama-Efrata bavela ngeBhethe-Lehema lakwaJuda. Baya enarheni yakwaMowabi bahlala khona.

³ U-Elimeleki, umyeni kaNawomi wahlongakala, watjhiya uNawomi namadodana amabili.

⁴ Amadodana la athatha abafazi kwaMowabi, ibizo lowokuthoma bekungu-Oripa lowesibili kunguRute. Bahlala lapho iminyaka elitjhumi.

⁵ UMarhaloni noKiliyoni nabo bahlongakala batjhiya unina uNawomi angasenabani.

UNawomi ubuyela ekhaya noRute

⁶ UNawomi wezwa asesekwaMowabi bonyana uSomnini uhlenge abantu bakhe ngokubapha ukudla, wazilungiselela nabomalukazana bakhe ukubuyela ekhabo.

⁷ Yena nabomalukazana bakhe basukela indawo ebebahlala kiyo babamba indlela enqombe enarheni yakwaJuda.

⁸ UNawomi wathi kibomalukazana bakhe ababili: “Buyelani emuva, omunye nomunye aye kwabo. Kwanga uSomnini angaba nomusa kini njengombana nani naba nomusa kimi nemadodanenami.

⁹ Kwanga uSomnini anganipha ukuhlala ngokuthula nabayeni enizabathola.” Wabamanga bathoma barhahlawula isililo,

¹⁰ bathi kuye: “Awa, sizakubuyela nawe ebantwini bekhenu.”

¹¹ Kodwana uNawomi wathi: “Buyelani emakhaya, madodakazami. Nizakuthi niyaphi nami nanginje? Kghani ninomkhumbulo wokobana ngingabeletha amanye amadodana; okuzakuthi nasele akhulile abe bayeni benu na?

¹² Buyelani emakhaya, madodakazami. Sengimdala khulu kobanyana ngingaba nendoda. Ngitjho nanyana bengisesenethemba lokuba nendoda, ngingene nayo emabhayini namhlanje ebusuku bese ngibeletha amadodana,

¹³ nizawalinda bonyana akhule na? Nizakuhlala ningendi nilinde wona na? Awa, madodakazami, ngilisizi mina kunani ngombana isandla sakaSomnini sijamelene nami!”

¹⁴ Barhahlawula isililo godu. U-Oripa wamanga unosokanakhe wamlayelisa. Kodwana uRute wanamathela kunosokanakhe.

¹⁵ UNawomi wathi: “Yelela, umncayenu ubuyela emuva kebakwabo nakibosingazimu bekhabo. Nawe mlandele.”

¹⁶ Kodwana uRute waphendula wathi: “Ungangikateleli bonyana ngikutjhiye ngikuhlamuke. Ngizokukhamba nawe lapho uya khona, ngihlale nawe lapho uyokuhlala khona. Abantu bekhenu nami bazakuba ngebekhethu bese kuthi uZimakho abe nguZimami.

¹⁷ Ngizokufela lapho uyokufela khona, bengingcwatjwe khona lapho. Ngiyafunga ngithi, dumbana uSomnini angihlunguphaze nange kungaba nento engihlukanisa nawe ngaphandle kokufa.”

¹⁸ Kuthe bonyana uNawomi abone ukuthi uRute uncamile ngokukhamba naye, walisa ukumkatelela.

¹⁹ Yeke abafazi ababili laba bakhamba bebafika eBhethe-Lehema. Ekufikeni kwabo eBhethe-Lehema umuzi woke wabararekela. Abafazi bomuzi lowo bathi: “Kungaba nguNawomi lo na?”

²⁰ Yena wathi kibo: “Ningangibizi ngoNawomi, ngibizani nithi Mara, ngombana uSomandla wenze ipilwami yaba munyu khulu.

²¹ Ngakhamba nginesami, kodwana uSomnini ungibuyisa ngidududu. Alo-ke nizakuthi ningibizelani ngoNawomi na? USomnini ungifulathele, uSomandla ungehlisele ubumbi bodwa.”

²² Leyo-ke yindlela uNawomi abuyela ngayo enarheni yakwaMowabi akhambisana nomalukazanakhe uRute uMowabikazi. Bafika eBhethe-Lehema ekuthomeni kokuvunwa kwebhali.