URHABAKHUKHU 3 - IsiNdebele 2012 Translation

Umthandazo womphorofidi nehlathululo yombono

¹ Umthandazo kaRhabakhukhu umphorofidi. Tjhigiyonotho

² Somnini, ngizwile ngedumo lakho. Somnini, izenzo zakho zibonakele. Yewuzivuselele neminyakeni le, zenze zaziwe eenkhathini zethwezi. Kodwana ube nomusa nakuvuka irawurawu.

³ UZimu uvele ngeTemana; Ocwengileko uvele ngentabeni iParana. Sela Iphazimulwakhe igubuzesa amazulu; ubuphaziphazi bakhe buzele iphasi.

⁴ Ukumanyazela kwakhe kunjengokuphuma kwelanga; imisubela iphazima esandleni sakhe. Lapha kufihlakele khona amandlakhe.

⁵ Izifo zikhamba phambi kwakhe, ukufa kumlandele.

⁶ Wajama phezu kwephasi ladengezela, warhedlula, izizwe zarurhuluka. Ngendlelakhe wakhamba phezu kwephasi, iintaba zanini nanini zagirika neentatjana zeminyaka zarhunyela.

⁷ Eenyaweni zakhe ngabona amandla: EKhutjhana kwavunguza amatende, kwaMidiyani kwaphembetha imitjhabo.

⁸ Awu Somnini, begade usilingekele imilambo na? Ilaka lakho belijamelene nemilambo? Gade usilingwe lilwandle na? Ngambala, ukhwele iinjomani zakho neenkarana zakho zokuhlula.

⁹ Ulungisa umsebe wakho, ubiza imisubela eminengi. Uphadlhula umhlaba, kuvele imilambo.

¹⁰ Iintaba nazikubonako ziyathuthumela; kuvela iinrhurhula zamanzi; kubhodla amanzi ekuzikeni, athwele amagobhoza.

¹¹ Ilanga nenyanga zabuyela endawenazo, ngokuphazima kwemisubela yakho egijimako nangokumanyazela komkhontwakho ophazimako.

¹² Wasilingeka wapitliza iphasi, wabibhelana wabhula izizwe.

¹³ Weza wazokusindisa abantu bakho, wazokusindisa umzeswakho. Warhayila iphahla lesigodlo sobukhohlakali, waphihliza isigodlo bekwaba sesisekelweni.

¹⁴ Wahlaba umrholi ngomkhontwakhe, lokha iinkhulu zakhe nazisithelekelako bona zisiphadlhalaje. Inyazo lazo laba lilize: Zoke zaphepha zazifihla.

¹⁵ Wagadangela iinjomani zakhe ngelwandle, emanzini amanengi abhodlako.

¹⁶ Nangizwa lokho, amathumbami adlhabhaza, iimbhena zomlomami zahlengezela ngetjhadelo, umzimbami wakoropana, amadolwami ageba. Ngarhawuka ngebanga lelanga lamatlhuwo, ngebanga lezehlo ezizokwehlela abasahleli.

Thembela kuZimu nanyana kubudisi

¹⁷ Nanyana umuthi wamakhiwani ungatlhurhi, kutlhogeka namadiribe esidiribeni; nanyana isivuno se-oliva singahlomi kutlhogeka nokudla emasimini; nanyana kunganazimvu ngesibayeni kutlhogeka neenkomo ngesibayeni;

¹⁸ nokho mina ngizakuthaba kuSomnini, ngizakuthokoza kuZimu uMsindisami.

¹⁹ USomnini uSomandla umamandlami; wenza iinyawo zami zibe njengezehlangu, ungenza ngikghone ukweqela imibundu. Libhinwa ngeenliliswa zeenara.