URHABAKHUKHU 2 - IsiNdebele 2012 Translation

¹ Ngizakujama esithaleni sami ngibe sesiqongolweni somthangala. Ngizakuqalisisa ngibone bonyana uSomnini uzokuthini kimi; nokuthi uzakuphendula athini ekunghonghoyileni kwamokhu.

USomnini wembula okuzakwehlela iinkhohlakali

² USomnini wangiphendula wathi: “Tlola isambulwesi phasi sibonakale kuhle emqebethwini ukuze sifundeke lula.

³ Ngambala isambulwesi sizakuzaliseka ngesikhathi esifaneleko; sikhuluma ngesiphetho, angeze savuka simamala. Nanyana siriyada nje, silindele, sizakuzaliseka nakanjani, angeze besiriyade.

⁴ “Tlola uthi, ‘Ongakalungi uzakubhubha, kodwana olungileko uzakuphila ngokukholwa kwakhe.

⁵ Ngambala, umnono uyamkhohlisa ozikhukhumezako begodu angeze aphumelela; umarhamaru njengethuna, urhiribidela njengokufa; ubuthelela izizwe zoke kuye, athumbe boke abantu.’

⁶ “Ngambala, izizwe zizamphendula ihlaya, zimtlhorholoje ngokumvuma ingoma zithi, ‘Uzazizwa loyo ozidindelela iimpahla zokwetjiwa, azinjingisa ngobugirikijani! Kuzabe kube nini kulokho kwenzeka na?’

⁷ Ngambala, abakuhlawulako bazakururhuluka, abakuthuthumelisako bakuvukele, bakuthumbe.

⁸ Wena waphanga izizwe ezinengi; yeke abantu boke bazakuphanga. Bazakuphanga ngombana nawe waphalaza iingazi zabantu, wabhubhisa iinarha namadorobho naye woke umuntu ohlala lapho.

⁹ “Uzazizwa loyo ohlawulisa ngobugirikijani, bona azakhele umuzi ophephileko. Umzakhe uzakwehlelwa manikelela.

¹⁰ Isigungu osakhileko sirhubutjhe umzakho. Ngokurhayila abantu abanengi, waloba ipilwakho.

¹¹ Ngambala, amatje azakurhuwelela ebodeni, ubuphaziphazi bufakaze.

¹² “Uzazizwa loyo owakha idorobho ngokuphalaza iingazi, ajamise umuzi ngobukhohlakali.

¹³ Ngambala, uSomnini uMninimandlawoke uqunte bonyana ukutjhabatjheka kwabantu kube ziimvuthiso zomlilo, nokuthi izizwe zibhidlangele ilize.

¹⁴ Iye, njengelwandle lizele amanzi, iphasi lizakuzala ilwazi, lazise iphazimulo kaSomnini.

¹⁵ “Uzazizwa loyo oseza abomakhelwana bakhe utjwala obubukhali, basele badakwe babehlubule ukuze abone ububhunubhunu babo.

¹⁶ Ukarekela ukurhubutjha abantu kunobana uhlonitjhwe. Sela nawe bewube bhunubhunu. Ikapho esesandleni sokugoma sakaSomnini inqophe ngakuwe, ukuhlonipheka kwakho kuzakuba lihlazo.

¹⁷ Iye, umonakalo owawenza eLibhanoni uzakufikela nokurhayila kwakho iimbandana kuzokwethusa ngombana uphalaze iingazi zabantu, wabhubhisa iinarha namadorobho naye woke umuntu ohlala lapho.

¹⁸ “Sizakubhadekela ngani isithombesibazwa njengombana sabazwa mumuntu nje na? Sisiza ngani isithombesibunjwa nomfundisi wamala na? Iye, loyo owasibumbako wethembele emsebenzini wezandla zakhe, ilize lakolize elingakhulumiko!

¹⁹ Uzazizwa loyo othi esigodweni, ‘Phaphama!’ Nanyana athi elitjeni elingakhulumiko, ‘Vuka!’ Intwenje ingakuyala na? Qala nje, yembeswe ngegolide nesiliva, abeyiphili do.

²⁰ Kodwana uSomnini usethempeleni lakhe elicwengileko. Akuthi iphasi lithi du phambi kwakhe.”