URHABAKHUKHU 1 - IsiNdebele 2012 Translation

¹ Isimemezelo sakaZimu esambulelwa uRhabakhukhu umphorofidi.

Umphorofidi unghonghoyila ngomguruguru

² Kunini ngibiza, Somnini, ngifunana nesizo, kodwana soloko awuphenduli? Ngakurhuwelela ngathi, “Umguruguru!” kodwana kubayini ungasindisi?

³ Kubayini ungibonisa ukungalungi, ubekezelela ubumbi? Ukurhayila nomguruguru kuphambi kwami, kwande ukunghunanghunana nerawurawu.

⁴ Yeke umthetho uyabogaboga, ukugweba ngeqiniso akusekho. Iinkhohlakali ziqaqada phezu kwabalungileko, nje-ke kuhlanakelwa iingwebo.

USomnini uyaphendula

⁵ “Qalani izizwe, nizitjhejisise nikakamale benikhungatheke ngombana kunento engizayenza emihleni yenu; eningazukuyikholwa nanyana sele niyitjelwa.

⁶ Iye, ngizakuvusa amaBhabheli, abantu abamarhamaru nabanganasisa, abatjharhatha iphasi loke, bakhambe bahluthula izindlu okungasi ngezabo.

⁷ Bababantu abasatjwako nabatatazelelwako nomthetho usezandleni zabo, bazidumisa bona ngokwabo.

⁸ Iinjomani zabo zigijima ukudlula izingwe, zidlhaduma ukudlula iimpisi ebusuku. Abakhweli bakhona beza bafuthekile; abakhweli bakhona bavela kude. Batheleka njengedlanga nalibhudungela ukudla kwalo;

⁹ boke beze ngokurhayila. Amabutho wakhona atheleka njengommoya werhalawumbeni; abuthelela iimbotjhwa njengetjhwabatjhwaba.

¹⁰ Banyaza amakhosi, bahlekisa ngababusi. Bahleka woke amadorobho anemithangala; badindela ihlabathi emithangaleni yakhona; bawasahlele bawathumbe.

¹¹ Bese barhurhula badlulele phambili njengommoya; abantwaba benza amandlabo uzimabo.”

Umphorofidi unghonghoyila ngobukhohlakali

¹² AwusinguSomnini kusukela nini nanini na? AwusinguZimu wesivumelwano, oCwengileko nophila nini nanini na? Somnini, ukhethe amaBhabheli bona agwebe, Dwala, ubazese bona bahlunguphaze.

¹³ Amehlwakho acwenge khulu kobana angaqalana nobukhohlakali; angeze wabekezelela ubumbi. Alo-ke kubayini ubekezelela izephulamthethwezi na? Uthuleleni ubona iinkhohlakali zirhiribidela abalunge khulu kinazo?

¹⁴ Wenze umuntu waba njengehlambi, waba njengeenrhurhubi zelwandle zona ezinganambusi.

¹⁵ AmaBhabheli la, abamba abantu boke; abadose ngeenkghopholahlambi, abagolela ngenedenawo, abarhurhulela ngesirhurhulanedeni sawo. Ngebangelo ayathokoza ajabule.

¹⁶ Enzela isirhurhulanede sawo umhlatjelo, atjhisela nesirhobelanede sawo itjhwalo. Yeke, ngeenede zawezo abetha esimonyongwana, agoma iinkhanakhana zokudla.

¹⁷ Azakusolo athulula iinede zawo, arhayile izizwe ngesihlungu na?