UNUMERI 9 - IsiNdebele 2012 Translation

Ukugidingwa komnyanya wePhasika erhalawumbeni

¹ USomnini wakhuluma noMosi erhalawumbeni leSinayi ngenyanga yokuthoma yomnyaka wesibili emva kokuphuma kwama-Israyeli enarheni yeGibhide wathi:

² “Yenza ama-Israyeli bona agidinge umnyanya wePhasika ngesikhathi esibekiweko salo.

³ Kufuze libe ngelanga letjhumi nane enyangeni le, kube ngamarhwaqela ngesikhathi esibekiweko. Ligidingeni ngokuya ngazo zoke iimiso zalo nemithethwalo yoke.”

⁴ UMosi wawatjela njalo-ke ama-Israyeli ngokugidingwa kwePhasika.

⁵ Mbala kwathi ngenyanga yokuthoma mhlana zilitjhumi nane, ama-Israyeli agidinga iPhasika ngamarhwaqela erhalawumbeni leSinayi. Ama-Israyeli enza koke kwaba njengendlela uSomnini ayala ngayo uMosi.

⁶ Kodwana bekukhona amadoda asilapheleko ngebanga lokobana gade athinte isidumbu somuntu. Ngalokho wona akhange aphumelele ukugidinga iPhasika, yeke mhlokho aziveza phambi kwakaMosi no-Aroni,

⁷ athi kibo: “Nasinje, sibe ngabasilapheleko ngebanga lokuthinta isidumbu somuntu. Alo, singakhandelwa yini bona sinikele umnikelo kaSomnini ngesikhathi sawo esijanyisiweko phakathi kwama-Israyeli na?”

⁸ UMosi wathi kiwo: “Lindani khengiyokwizwa bona uSomnini uzokuyala athini ngani.”

⁹ USomnini wakhuluma noMosi wathi

¹⁰ akakhulume nama-Israyeli athi: “Nangabe omunye wenu namkha weenzukulwana zenu usekhambeni kude namkha usilaphele ngebanga lokuthinta isidumbu, kodwana ufuna ukugidinga iPhasika lakaSomnini,

¹¹ kufuze aligidinge ngamarhwaqela mhlana inyanga yesibili inamalanga alitjhumi nane. Alidle ngesikwa esinganangumelo neenrhabelo ezibabako.

¹² Angatjhiyi litho lalo begodu angephuli ithambo lakhona. Agidinge iPhasika kulandelwe zoke iimiso zalo.

¹³ Kodwana nangabe umuntu ohlambulukileko begodu ongekho ekhambeni wala ukugidinga iPhasika, uzakujutjwa ebantwini bekhabo ngombana akakanikeli umnikelwakhe ngesikhathi sawo kuSomnini. Kwamambala umuntu loyo uzazizwa ngesono sakheso.

¹⁴ “Nangabe kunesikhonzi phakathi kwenu esithanda ukugidinga iPhasika, asiligidinge ngokweemiso nemithethwalo. Nibe nesimiso sinye esikhonzini namkha emuntwini wendabuko kwa-Israyeli.”

Ilifu elembese ithaberinakeli

¹⁵ Kwathi mhlana kujanyiswa ithaberinakeli, ilifu lembesa ithaberinakelelo, okulitende lobufakazi. Nakuhlwako bekuyokusa ilifelo belibonakala linjengekehla yomlilo ngehla kwethaberinakeli.

¹⁶ Bekunjalo-ke ngaso soke isikhathi: Emini belembeswa lilifu, kuthi ebusuku ilifelo libonakale linjengekehla yomlilo.

¹⁷ Bekuthi lokha ilifu naliphakamako, ama-Israyeli afuduke, kuthi lokha ilifu nalijamako, ama-Israyeli ahlome amatendawo lapho.

¹⁸ Ama-Israyeli bekafuduka ngomyalo kaSomnini begodu ahlome amatendawo ngomyalwakhe. Ngesikhathi soke ilifu nalisajame ngehla kwetende, ama-Israyeli gade angasuki.

¹⁹ Ngitjho nanyana ilifu belingajama amalanga amanengi ngehla kwethaberinakeli, ama-Israyeli gade agcina umyalo kaSomnini, angasuki.

²⁰ Kwesinye isikhathi ilifu belijama amalangana ngehla kwethaberinakeli, nanyana kunjalo ama-Israyeli bekahlala ekampeni. Bekakhamba kwaphela ngomyalo kaSomnini.

²¹ Kwesinye isikhathi ilifu belijama ukusuka ntambama bekube sekuseni. Bese kuthi lokha ilifu nalikhuphukako ekuseni, nawo afuduke. Ngitjho nanyana ilifelo belingahlala ubusuku nemini, naliphakamako nawo bekakhamba.

²² Nangabe malanga amabili, inyanga namkha isikhathi eside ilifu lijamile, ama-Israyeli nawo gade angasuki ekampenapho. Kodwana bekasuka kwaphela ilifu naliphakamako.

²³ Bekahloma amatendawo namkha asuke kwaphela ngomyalo kaSomnini. Alalela iimiso zakaSomnini ayala uMosi ngazo.