UNUMERI 36 - IsiNdebele 2012 Translation

Ilifa lamadodakazi kaTselofirhadi

¹ Iinhloko zemindeni kaGiliyadi umsa kaMakiri omsa kaManase okuziinzukulwana zekoro kaJosefa, zeza zakhuluma phambi kwakaMosi nabarholi okuziinhloko zemindeni yama-Israyeli,

² zafese zathi: “Ngesikhathi uSomnini uZimu ayala ikosethu bona inarha le yabelwe ama-Israyeli ngefumbe, ikosethu yayalwa nguSomnini uZimu bonyana ilifa lomfowethu uTselofirhadi linikelwe amadodakazakhe.

³ Kodwana nangabe ende kenye yamadodana weenkoro zama-Israyeli, khona ilifa lawo lizakuthathwa esabelweni sabobaba lingezelelwe ekorweni ebendele kiyo. Nje-ke ingcenye yelifa lethu esabelwe lona ngefumbe izokuthathwa kithi.

⁴ Lokha umnyaka wokubuyisela nawufikako kuma-Israyeli, ilifa lawo lizokungezelelwa elifeni lekoro endele kiyo. Ngalokho ilifa labo lizokuhletjhulwa elifeni lekoro yabobaba.”

⁵ Ngokomyalo kaSomnini uMosi wayala ama-Israyeli wathi: “Ikoro yesizukulwana sakaJosefa ikhuluma iqiniso.

⁶ Nje-ke nakhu uSomnini ayale ngakho mayelana namadodakazi kaTselofirhadi uthi, ‘Wona angathathwa nanyana ngubani abona awalungele, ikani kumumuntu womndeni wekoro kayisawo.

⁷ Ilifa lama-Israyeli akukafaneli lidluliselwe ekorweni ngekoro ngombana omunye nomunye wama-Israyeli kufuze anamathele elifeni lekoro yaboyise.

⁸ Nje-ke nanyana ngimuphi umntazana weenkoro zama-Israyeli onelifa, kufuze ende komunye womndeni wekoro kayise ukuze omunye nomunye wama-Israyeli abe nelifa lendlu yaboyise.

⁹ Ngalokho akunalifa elizakudluliselwa ekorweni ukuya kwenye ngombana enye nenye ikoro izakunamathela elifeni layo.’ ”

¹⁰ Amadodakazi kaTselofirhadi enza njengombana uSomnini ayale uMosi:

¹¹ UMarhila, uTiritsa, uRhogila, uMilika noNoya bebathethwe madodana wendlu yabafowabo kayisabo.

¹² Iye, bebathethwe ngemndenini wakaManase umsa kaJosefa. Ngalokho ilifa labo lahlala lisekorweni yomndeni kayise wamadodakazi lawo.

¹³ Leyo-ke mithetho nemiyalo uSomnini ayala ngayo ama-Israyeli ngoMosi kwaMowabi ngemrhobeni weJordani malungana neJerikho.