UNUMERI 35 - IsiNdebele 2012 Translation

Amadorobho wamaLevi

¹ USomnini wakhuluma noMosi kwaMowabi ngemrhobeni weJordani malungana neJerikho wathi:

² “Yala ama-Israyeli bona epahleni ekulilifa lawo, anikele amaLevi amadorobho azakwakha kiwo neendawo zamadlelo magegana namadorobho lawo.

³ Amadorobho lawo azakuba ngewawo bona ahlale kiwo bese amadlelo wakhona kube ziindawo zemihlambi, okutjho yoke ifuywawo.

⁴ Ububanzi beendawo zamadlelo enizazinikela amaLevi magegana namadorobho kufuze okungasenani zibe mamitha amakhulu amane namatjhumi amahlanu ukusuka emthangaleni wedorobho.

⁵ Ngaphandle kwedorobho nizakulinganisa amamitha angaba makhulu alithoba ngehlangothini langepumalanga, amamitha angaba makhulu alithoba ngehlangothini langesewula, amamitha angaba makhulu alithoba ngehlangothini langetjingalanga namamitha angaba makhulu alithoba ngehlangothini langetlhagwini, khisibe idorobho liphakathi. Leyo kuzakuba yindawawo yamadlelo emadorobhenawo.

⁶ Amadorobho eniwanikela amaLevi kuzakuba madorobho asithandathu wobuphephelo, lapha nizakuvumela umbulali abalekele khona. Ngaphezu kwalokho nizawanikela amanye amadorobho amatjhumi amane namabili.

⁷ Sele awoke amadorobho enizawanikela amaLevi azakuba matjhumi amane nabunane kanye neendawo zawo zamadlelo.

⁸ Mayelana namadorobho eniwathethe esabelweni sama-Israyeli ekufuze niwanikele amaLevi: Enye nenye ikoro kumele inikele ngokuya ngelifa elizuzileko. Eenkorweni ezikulu nithathe amadorobho amanengi bese kuthi kezincani nithathe ambalwa.”

Amadorobho wobuphephelo

⁹ Godu uSomnini wakhuluma noMosi wathi

¹⁰ akakhulume nama-Israyeli athi: “Lokha naniyama iJordani ningena eKanana,

¹¹ khethani amadorobho bona abe ngewobuphephelo kini, lapha kuzakuthi lokha umuntu nakabulele omunye ngephoso, abalekele khona.

¹² Amadorobho lawo azakuba buphephelo kini lokha nanibalekela umbuyiseleli ukuze obuleleko angafi angakajami ebandla bona agwetjwe.

¹³ Amadorobho asithandathu lawo nizawajamisa bona abe ngewobuphephelo.

¹⁴ Amathathu wawo akabe nganeno kweJordani kuthi amanye amathathu abe ngenarheni yeKanana, kube ngawobuphephelo.

¹⁵ Amadorobho asithandathu lawo, azakuba ziindawo zobuphephelo kuma-Israyeli, isikhonzi nomphalali ophakathi kwawo ukuze kuthi nanyana ngubani obulala umuntu ngokungakahlosi abalekele khona.

¹⁶ “Kodwana nangabe kunomuntu obetha omunye ngesimbi ambulale, loyo umbulali. Nje-ke umbulali kufuze abulawe.

¹⁷ Nangabe umuntu uphethe ilitje esandleni sakhe elingabulala bese umadlha omunye ngalo ambulale, naye umbulali. Nje-ke umbulali akabulawe.

¹⁸ Nangabe umuntu uphethe umphini osibulawo bese uphobola omunye ngawo ambulale, umbulali naye. Nje-ke umbulali kufuze abulawe.

¹⁹ Umbuyiseleli weengazi kufuze kube nguye obulala umbulali loyo lokha nakahlangana naye. Iye, ambulale nya.

²⁰ Nangabe umuntu uthi ngokuzonda omunye bese umsunduzela endaweni eyingozi ambulale, namkha amphose ngento ngehloso yokumlimaza ambulale,

²¹ namkha ngenca yevunda amdule phasi ngeguduva ambulale, umbethi loyo kufuze abulawe ngombana umbulali. Umbuyiseleli weengazi kufuze ambulale lokha nakahlangana naye.

²² “Kodwana nangabe umuntu uqhula omunye ngephoso kunganavunda namkha aphose ngananyana yini angakahlosi ukulimaza umuntu,

²³ namkha aliselele ilitje elingabulala umuntu bese likhande omunye khisibe gade angamboni, umuntu loyo ahlongakale; nanyana gade bangasi zizitha begodu angakahlosi ukulimaza,

²⁴ ibandla lizakugweba phakathi kobuleleko nombuyiseleli weengazi ngokulandela iimiswezo.

²⁵ Ibandla kufuze livikele umuntu obuleleko ezandleni zombuyiseleli weengazi, limbuyisele edorobheni lobuphephelo lapha gade abalekele khona. Uzakuhlala lapho bekuhlongakale umphristi omkhulu nogade azeswe ngamafutha acwengileko.

²⁶ Kodwana nangabe obuleleko angalinga eqe imikhawulo yedorobho lobuphephelo abalekele kilo,

²⁷ bese umbuyiseleli weengazi amfunyane ngaphandle kwemikhawulo yedorobho lobuphephelo ambulale, angeze abekwa umlandu weengazi.

²⁸ Lokho kungebanga lokobana obuleleko bekufuze ahlale ngedorobheni lobuphephelo bekube kulapha kuhlongakala khona umphristi omkhulu. Kodwana ngemuva kokuhlongakala komphristi omkhulu, obuleleko angabuyela enarheni yelifa lakhe.

²⁹ Lokho kuzakuba ziimiso nemithetho yenu kanye neenzukulwana ngeenzukulwana zenu lapha nizakuhlala khona.”

Ukugwetjwa kobuleleko

³⁰ “Umuntu obulala omunye naye uzakubulawa ngesiqiniseko sabofakazi. Kodwana umuntu angakhe angabulawa ngobufakazi bomuntu oyedwa.

³¹ Ningayamukeli ihlawulo yokuhlenga ipilo yombulali onomlandu wokubulala. Onjalo, akabulawe nokubulawa.

³² Godu ningayamukeli ihlawulo yokuhlenga umuntu obalekele edorobheni lobuphephelo kobana abuyele enarheni yekhabo kungakahlongakali umphristi omkhulu.

³³ Ningasilaphazi inarha eniphila kiyo ngombana iingazi ziyayisilaphaza inarha. Akunatethelelo engenzelwa inarha ethulukelwe ziingazi ngaphandle kokuthululwa kweengazi zaloyo ozithululileko.

³⁴ Ningayirhubutjhi inarha eniphila kiyo ngombana mina Somnini ngihlala kiyo. Iye, ngihlala phakathi kwabantu bakwa-Israyeli.”