UNUMERI 34 - IsiNdebele 2012 Translation

Imikhawulo yeKanana

¹ USomnini wakhuluma noMosi wathi

² akayale ama-Israyeli athi: “Lokha naningena enarheni yeKanana, ekuyinarha enizakwabelwa yona bona ibe lilifa lenu, imikhawulo yayo izakuba bunje:

³ Isewula yenu izakuba serhalawumbeni leTsini magegana nenarha yakwa-Edomu. Umkhawulo wakhona usuke ngesewula-pumalanga yelwandle leTswayi

⁴ uyokujika ngesewula yomkghotha we-Akhirabhimu udabule irhalawumba leTsini ukuyokutjhayisa ngesewula yeKhadetjhi-Bharineya, ululekele eRhatsari-Adari bese utjhayise i-Atsimona.

⁵ Umkhawulo lowo uzakujika e-Atsimona ukuyokutjhayisa emlanjaneni weGibhide bese uphelela elwandle.

⁶ “Umkhawulo wangetjingalanga uzakuba lilwandle elikhulu neligu lakhona. Lowo kuzakuba mkhawulwenu ngetjingalanga.

⁷ “Naku-ke umkhawulwenu wangetlhagwini: Ukusuka elwandle elikhulu bekisani umuda bekube sentabeni yeHori.

⁸ Ukusuka entabeni yeHori niwubekise bekube seLebo-Rhamathi. Amaphethelo womkhawulo abe seTsedadi,

⁹ bese ululekela eZifroni uphelele eRhatsari-Enani. Lowo-ke kuzakuba mkhawulwenu wangetlhagwini.

¹⁰ “Umkhawulwenu wangepumalanga nizawubekisa ukusukela eRhatsari-Enani bekube seTjhefamu.

¹¹ Ukusukela eTjhefamu uzakwehlela enzasi, tjhuba langeRibla ngepumalanga ye-Ayini. Uzakudosa bewuyokufika enzasi magegana nehlangothi lentaba ngepumalanga yelwandle iKinerethi .

¹² Godu uzakunabela enzasi ngeJordani bese uphelela elwandle leTswayi. “Leyo kuzakuba yinarhenu nemikhawulwenu yoke mazombe.”

¹³ UMosi wayala ama-Israyeli wathi: “Le yinarha ezakuba lilifa lenu ngefumbe. USomnini uyale bona inikelwe iinkoro ezilithoba nesiquntu sazo,

¹⁴ ngombana ikoro yakwaRubeni ngokwemindeni yaboyise neyakwaGadi ngokwemindeni yaboyise kanye nesiquntu sekoro yakwaManase sele zamukele ilifa lazo.

¹⁵ Iinkoro ezimbilezi nesiquntu zamukela ilifa lazo nganeno kweJordani ukuyela ngepumalanga yeJerikho.”

¹⁶ USomnini wakhuluma noMosi wathi:

¹⁷ “Naka amabizo wamadoda azakwaba inarha yelifa lenu: Ngu-Elazara umphristi kanye noJotjhuwa umsa kaNuni.

¹⁸ Ekorweni ngayinye thathani umrholi abe munye ukuze asize ekwabiweni kwelifa lenarha.

¹⁹ “Naka-ke amabizo wamadoda abarholi lawo: “Ekorweni yakwaJuda: uKalebi umsa kaJefune;

²⁰ ekorweni yeenzukulwana zakaSimiyoni: uSamyela umsa ka-Amirhudi;

²¹ ekorweni yakwaBhenjamini: u-Elidadi umsa kaKisiloni;

²² ekorweni yeenzukulwana zakaDani: umrholi uBhukhi umsa kaJogili;

²³ eenzukulwaneni zakaJosefa ekorweni yakwaManase: umrholi uRhaniyeli umsa ka-Efodi;

²⁴ ekorweni yeenzukulwana zaka-Efrayimu: umrholi uKhemuweli umsa kaTjhifithani;

²⁵ ekorweni yeenzukulwana zakaZebuloni: umrholi u-Elitsafani umsa kaParinakhi;

²⁶ ekorweni yeenzukulwana zaka-Isakari: umrholi uPalithiyeli umsa ka-Azani;

²⁷ ekorweni yeenzukulwana zaka-Atjheri: umrholi u-Arhihudi umsa kaTjhelomi;

²⁸ ekorweni yeenzukulwana zakaNafitali: umrholi uPedayeli umsa ka-Amihudi.”

²⁹ Lawo bekumadoda uSomnini ayale ngawo bona abele ama-Israyeli inarha iKanana.