UNUMERI 33 - IsiNdebele 2012 Translation

Iindawo lapha ama-Israyeli agade akhamba ahlala kizo

¹ Nanzi-ke iindawo lapha ama-Israyeli agade akhamba ahlala kizo ekuphumeni kwawo enarheni yeGibhide ngaphasi koburholi bakaMosi no-Aroni.

² Ngomyalo kaSomnini uMosi watlola iindawo asungula kizo nalapha ahloma khona amatendawo. Lezi-ke kuziindawo lapha akhamba ahloma khona amatendawo:

³ Afuduka eRamesese mhlana inyanga yokuthoma inamalanga alitjhumi nahlanu, ngakusasa emva kwePhasika. Aphuma afuduka ngokutjakadula amaGibhide woke aqalile.

⁴ (Ngesikhatheso amaGibhide gade asangcwabana nabantwabawo abamazibulo ebegade uSomnini abamadlhe phakathi kwawo. Begodu uSomnini gade alethe isigwebo phezu kwabosingazinyana bawo.)

⁵ Ama-Israyeli afuduka eRamesese ayokuhloma amatendawo eSukothi.

⁶ Afuduka eSukothi ahloma e-Etamu elingemaphethelweni werhalawumba.

⁷ Afuduka e-Etamu abuyela emuva ePhi-Harhirothi engepumalanga yeBhali-Tsefoni ayokuhloma hlanu kweMigidoli.

⁸ Afuduka ePhi-Harhirothi adabula phakathi kwelwandle atjhinga erhalawumbeni. Emva kwekhambo lamalanga amathathu erhalawumbeni le-Etamu afese ahloma amatendawo eMara.

⁹ Afuduka eMara afika ahloma amatendawo e-Elimu lapha bekunemithombo yamanzi elitjhumi nambili nemithi yamasundu ematjhumi alikhomba.

¹⁰ Afuduka e-Elimu ahloma elwandle lomGaba.

¹¹ Afuduka elwandle lomGaba ahloma erhalawumbeni leSini.

¹² Afuduka erhalawumbeni leSini ahloma eDofikha.

¹³ Afuduka eDofikha ahloma e-Alutjha.

¹⁴ Afuduka e-Alutjha ahloma eRefidimu lapha bekunganamanzi khona bona abantu basele.

¹⁵ Afuduka eRefidimu ahloma erhalawumbeni leSinayi.

¹⁶ Afuduka erhalawumbeni leSinayi ahloma eKhibrothi-Hatava.

¹⁷ Afuduka eKhibrothi-Hatava ahloma eRhatserothi.

¹⁸ Afuduka eRhatserothi ahloma eRitima.

¹⁹ Afuduka eRitima ahloma eRimoni-Peretsi.

²⁰ Afuduka eRemoni-Peretsi ahloma eLibina.

²¹ Afuduka eLibina ahloma eRisa.

²² Afuduka eRisa ahloma eKhehelata.

²³ Afuduka eKhehelata ahloma entabeni iTjheferi.

²⁴ Afuduka entabeni iTjheferi ahloma eRharada.

²⁵ Afuduka eRharada ahloma eMakhehelothi.

²⁶ Afuduka eMakhehelothi ahloma eTarhathi.

²⁷ Afuduka eTarhathi ahloma eTerarhi.

²⁸ Afuduka eTerarhi ahloma eMitikha.

²⁹ Afuduka eMitikha ahloma eRhatjhimona.

³⁰ Afuduka eRhatjhimona ahloma eMoserothi.

³¹ Afuduka eMoserothi ahloma eBhene-Jakhani.

³² Afuduka eBhene-Jakhani ahloma eRhori-Hagidigadi.

³³ Afuduka eRhori-Hagidigadi ahloma eJothibata.

³⁴ Afuduka eJothibata ahloma e-Abrona.

³⁵ Afuduka e-Abrona ahloma e-Etsiyoni-Gebere.

³⁶ Afuduka e-Etsiyoni-Gebere ahloma ngerhalawumbeni leTsini eKhadetjhi.

³⁷ Afuduka eKhadetjhi ahloma entabeni iHori emkhawulweni wenarha yakwa-Edomu.

³⁸ (Ngomyalo kaSomnini uZimu, u-Aroni umphristi wakhuphuka intaba iHori, wafese wahlongakalela lapho ngelanga lokuthoma enyangeni yesihlanu, ngemva kweminyaka ematjhumi amane ama-Israyeli aphume enarheni yeGibhide.

³⁹ Gade aneminyaka elikhulu namatjhumi amabili namithathu lokha nakahlongakalela entabeni iHori leyo.

⁴⁰ Ngesikhatheso ikosi ye-Aradi emKanana egade ihlala ngesewula yeKanana besele izwile bona ama-Israyeli ayeza.)

⁴¹ Ama-Israyeli afuduka entabeni yeHori ahloma amatendawo eTsalimona.

⁴² Afuduka eTsalimona ahloma ePunoni.

⁴³ Afuduka ePunoni ahloma e-Obhothi.

⁴⁴ Afuduka e-Obhothi ahloma e-Iye-Habharimu.

⁴⁵ Afuduka e-Iye-Habharimu ahloma eDibhoni-Gadi.

⁴⁶ Afuduka eDibhoni-Gadi ahloma e-Alimoni-Dibilatayimu.

⁴⁷ Afuduka e-Alimoni-Dibilatayimu ahloma eentabeni ze-Abarimu buqamamana neNebo.

⁴⁸ Afuduka eentabeni ze-Abarimu ahloma ngemrhobeni weJordani kwaMowabi malungana neJerikho.

⁴⁹ Ahloma kwaMowabi ngemrhobeni weJordanapho ukusukela eBhethe-Hajetjhimothi ukululekela e-Abela-Hatjhithimu.

⁵⁰ USomnini wakhuluma noMosi ngemrhobeni weJordani kwaMowabi malungana neJerikho wathi

⁵¹ akatjele ama-Israyeli athi: “Lokha naniyama iJordani ningena enarheni yeKanana,

⁵² qotjhani boke abahlali benarha leyo phambi kwenu. Phahlazani yoke imifanekiso yamatje abaziweko nephule zoke iinthombembazwa zabosingazimu begodu nibhuruze zoke iindunduma zabo.

⁵³ Thumbani inarha leyo nihlale kiyo ngombana ngininikele yona bona ibe ngeyenu.

⁵⁴ Nizayaba ngefumbe ngokuya ngemindenenu. Umndeni omkhulu niwabele ilifa elikhulu kuthi omncani niwabele elincani. Omunye nomunye uzakuzuza ilifa ngokuya ngendlela ifumbe emwele ngayo. Ngendlela leyo nizakwabelana inarha ngokweenkoro zaboyihlo.

⁵⁵ Kodwana nangabe nizakuhluleka ukuqotjha abahlali benarha leyo, labo enibavumele bona bahlale nani, bazokuba liliva enyamenenu banikhole njengentuthu emehlweni. Bazokuba lihlupho kini enarheni enizobe nihlezi kiyo leyo.

⁵⁶ Mina-ke ngizakwenza kini lokho ebe ngizimisele ukukwenza kibo.”