UNUMERI 32 - IsiNdebele 2012 Translation

Ukwabiwa kwenarha ngepumalanga yeJordani

¹ AmaRubeni namaGadi gade anemihlambi emikhulu yefuyo. Wona-ke abona indawo kaJazeri neyakaGiliyadi kungeyamadlelo.

² Nje-ke amaGadi namaRubeni eza kuMosi, ku-Elazara umphristi nakubarholi bomkhambathi afese athi:

³ “Indawo ye-Atarothi, iDibhoni, iJazeri, iNimra, iRhetjhibhoni, i-Elale, iSebhama, iNebo neBhewoni,

⁴ uSomnini ayirhayila phambi komkhambathi wama-Israyeli, yona kuyinarha yokufuya. Iinceku zenu zinefuyo,

⁵ yeke nange sifunyene umusa emehlwenenu sibawa bona iinceku zenu ziphiwe yona inarha leyo ibe lilifa lazo. Nje-ke ningasiyamisi iJordani.”

⁶ Kodwana uMosi wakhuluma namaGadi namaRubeni wathi: “Abafowenu bazakuya epini khisibe nina nizihlalele lapha na?

⁷ Kubayini nidanisa ihliziyo yama-Israyeli kobana angayameli ngaphetjheya enarheni uSomnini awaphe yona?

⁸ Lokhu ngekwenziwa boyihlo lokha nangibathuma basuka eKhadetjhi-Bharineya bonyana bayokuhlola inarha.

⁹ Bathi bonyana bafike emrhobeni we-Etjhikolo babone inarha, bakhuluma okudanisa ihliziyo yama-Israyeli mayelana nokuya enarheni uSomnini agade abaphe yona.

¹⁰ Nje-ke ubukhali bakaSomnini bavutha mhlokho, wabe wafunga wathi,

¹¹ ‘Ngiqinisile yi, akunamuntu owaphuma eGibhide kilabo abaneminyaka ukusukela ematjhumini amabili ukuya phezulu ozakubona inarha engayifungela u-Abrahamu, u-Isaka noJakopo ngombana akhange bangilandele ngokupheleleko,

¹² ngaphandle kwakaKalebi umsa kaJefune umKhenizi noJotjhuwa umsa kaNuni. Bona balandela uSomnini ngokupheleleko.’

¹³ Nje-ke ubukhali bakaSomnini bavutha ngama-Israyeli, yawenza azulazula erhalawumbeni iminyaka ematjhumi amane bekwaphela soke isizukulwaneso esenza okumbi phambi kwakaSomnini.

¹⁴ Qalani lapha-ke nina nzalo yezoni ndina, nivukile najama esikhundleni saboyihlo, yeke nibange bona uSomnini abhokele u-Israyeli ngelaka!

¹⁵ Nakubanyana nani niyahlubuka ukumlandela, naso isizukulwanesi uzositjhiya erhalawumbenapha. Ngini enizobe nibhubhise boke abantwaba.”

¹⁶ Nje-ke amaRubeni namaGadi atjhidela kuye afese athi: “Yeke sizozakhela iimbaya zezimvu khonapha zibe ngezomhlambethu, sakhele abafazi nabantwabethu amadorobho.

¹⁷ Abantwabethu bazokuhlala emadorobheni anemithangala ukuze baphephe ebantwini abakhe enarheni le. Thina-ke sizokuhloma bese sikhamba ngaphambi kwama-Israyeli besiyowafikisa endawenawo.

¹⁸ Angeze sabuyela lapha omunye nomunye wama-Israyeli angakazizuzeli ilifa lakhe.

¹⁹ Thina angeze sahlala nabo elifeni lenarha elingaphetjheya kweJordani ngombana lethu ilifa lisitjharhathelele ngepumalanga enganeno kweJordani le.”

²⁰ UMosi wathi kibo: “Nakube nizakwenza lokho, nihlome nikhambe phambi kwakaSomnini niye epini,

²¹ omunye nomunye wenu ohlomileko ayame iJordani phambi kwakaSomnini bekube sikhathi lapha uSomnini aqotjha izitha zakhe phambi kwakhe,

²² ukuze inarha ibe seenyaweni zakaSomnini. Nje-ke emva kwalokho seningabuyela emuva bese niba ngabatjhaphulukileko esibopheni senu kuSomnini nakuma-Israyeli. Ngalokho inarha le izakuba lilifa lenu phambi kwakaSomnini.

²³ Kodwana nangabe angeze nenza njalo, nizabe nonile phambi kwakaSomnini. Nje-ke yazini bonyana isono senu sizanibamba.

²⁴ Yakhelani abantwabenu amadorobho nemihlambenu iimbaya bese nenza njengombana nithembisile.”

²⁵ AmaGadi namaRubeni athi kuMosi: “Thina nceku zakho sizakwenza njengombana ubabethu asiyalile.

²⁶ Abantwabethu, abafazi bethu nemihlambethu, iye yoke ifuywethu, kuzakusala khona emadorobheni wakwaGiliyadi la.

²⁷ Kodwana iinceku zakho zona zizakuyama, indoda enye nenye ihlomele ipi phambi kwakaSomnini; kube njengombana ubabethu asiyala.”

²⁸ Nje-ke uMosi wanikela imiyalo ngawo ku-Elazara umphristi, kuJotjhuwa umsa kaNuni kanye neenhlokweni zemindeni yeenkoro zakwa-Israyeli

²⁹ wathi: “Nangabe amaGadi namaRubeni aniyamisa umlambo iJordani, indoda enye nenye ihlomele ipi phambi kwakaSomnini bese inarha iba sezandleni zenu, khona-ke anikeleni inarha yakwaGiliyadi ibe lilifa lawo.

³⁰ Kodwana nangabe angeze aniyamise ahlomile, khona-ke nabo ilifa labo lizakuba senarheni yeKanana kanye nani.”

³¹ AmaGadi namaRubeni avuma athi: “Njengombana uSomnini uZimu akhulume eencekwini zenu, sizokwenza njalo.

³² Thina sizokuyama sihlomile phambi kwakaSomnini singene enarheni yeKanana, kodwana ilifa lethu esele silithumbile lizakuba nganeno kweJordani le.”

³³ UMosi wanikela amaGadi namaRubeni kanye nesiquntu sekoro yakwaManase umsa kaJosefa umbuso kaSirhoni ikosi yama-Amori nombuso ka-Ogi ikosi yeBhatjhani, okumadorobho wenarha namadlelwawo magegana nawo.

³⁴ AmaGadi avuselela iDibhoni, i-Atharothi, i-Aroweri,

³⁵ i-Athirothi-Tjhofani, iJazeri, iJogibhoha,

³⁶ iBhethe-Nimra neBhethe-Harana okumadorobho anemithangala neembaya zakhona zemihlambi.

³⁷ AmaRubeni avuselela iRhetjhibhoni, i-Elale, iKhiriyatayimu,

³⁸ iNebo, iBhali-Mewoni (okumabizo ebe kufuze atjhugululwe) kanye neSibima. Bathiya namanye amadorobho abawavuselelako amabizo.

³⁹ Iinzukulwana zakaMakiri umsa kaManase, zaya eGiliyadi zalithumba, kwathi ama-Amori alapho zawaqotjha.

⁴⁰ Nje-ke uMosi wanikela uMakiri umsa kaManase iGiliyadi. Iinzukulwana zakhe zahlala kiyo.

⁴¹ Iinzukulwana zakaJayire umsa kaManase zaya zathumba imizi yamatende yama-Amori bezayithiya bona yiRhavothi-Jayire.

⁴² UNobarhi wathumba iKhenathi kanye nemizayo wayithiya ngebizo lakhe wathi yiNobarhi.