UNUMERI 31 - IsiNdebele 2012 Translation

Ukuzibuyiselela kwama-Israyeli kebakwaMidiyani

¹ USomnini wakhuluma noMosi wathi:

² “Buyiselela ukubuyiselela kwama-Israyeli kumaMidiyani. Ngemva kwalokho nawe uzakulandela aboyihlomkhulu.”

³ Nje-ke uMosi wathi ebantwini: “Hlomisani amadoda aphakathi kwenu bona ayokulwa namaMidiyani, abuyiselele ukubuyiselela kwakaSomnini kumaMidiyani.

⁴ Ekorweni enye nenye yakwa-Israyeli nithumele epini ikulungwana yamadoda.”

⁵ Mbala ikoro nekoro yakwa-Israyeli yakhupha ikulungwana yamadoda, kwaba libutho lepi eliziinkulungwana ezilitjhumi nambili.

⁶ UMosi wathumela ibuthwelo epini, kwaba yikulungwana ekorweni ngayinye. Gade likhamba noFiniyasi umsa ka-Elazara umphristi aphethe izitja ezicwengileko neemporompita.

⁷ Ibuthwelo lalwa namaMidiyani njengombana uSomnini bekayale uMosi, labulala omunye nomunye omduna epini.

⁸ Labulala namakhosi amahlanu wakwaMidiyani okungu-Evi, uRekhemu, uTsuri, uRhuri noReba. Godu abulala noBhiliyamu umsa kaBhewori ngesabula.

⁹ Ama-Israyeli azithumbela abafazi bamaMidiyani kanye nabantwana. Abuya athatha zoke iinkomo kanye nefuyo enye yamaMidiyani; iye, ipahlawo yoke yaba yipango.

¹⁰ Atjhisa woke amadorobho ahlala kiwo kanye namatendawo angeenrhodlweni.

¹¹ Athatha yoke ipango yabantu neyefuyo leyo,

¹² ayiletha kuMosi, ku-Elazara umphristi kanye nemkhambathini wama-Israyeli. Iye, abathunjiweko nepango balethwa ekampeni ngemrhobeni weJordani kwaMowabi malungana neJerikho.

¹³ UMosi, u-Elazara umphristi kanye nabarholi bomkhambathi baphuma bahlangabeza ibutho ngaphandle kwekampa.

¹⁴ UMosi bekasilingekile ngeenkhulu zebutho, iinduna zeenkulungwana nezamakhulu egade zibuya epini.

¹⁵ Nje-ke wathi kizo: “Nilise boke abafazi baphila na?

¹⁶ Yelelani la, laba ngibo abahlohlozelwa nguBhiliyamu bona babe sisifu kuma-Israyeli ukuze one ngokungathembeki kuSomnini endabeni yePewori. Ngalokho isifo sehlela emkhambathini kaSomnini.

¹⁷ Yeke phakathi kwabancanaba, bulalani omunye nomunye omduna bese nibulala omunye nomunye wesifazana okhe wangenwa yindoda,

¹⁸ kodwana zigcineleni woke amatlawana angazange akhe angenwe yindoda.

¹⁹ Boke benu abakhe babulala umuntu namkha bathinta obuleweko, hlalani ngaphandle kwekampa amalanga alikhomba, nizihlambulule kanye nabathunjwa benu elangeni lesithathu nelekhomba.

²⁰ Hlambululani esinye nesinye isambatho, yoke into eyenziwe ngesikhumba, koke okwenziwe ngoboya bembuzi nento yoke ebazwe ngesigodo.”

²¹ U-Elazara umphristi wakhuluma namadoda agade aye epini wathi: “Nasi isimiso somthetho uSomnini ayale ngaso uMosi:

²² Igolide, isiliva, ikoporo, isimbi, isinjana, umthofi

²³ nakho koke okungatjhiko, kudluliseni emlilweni, nje-ke kuzakuhlambuluka. Nanyana kunjalo kufuze kuhlanjululwe ngamanzi wehlambululo godu. Lokho okungakghoni ukujamelana nomlilo kudluliseni ngemanzini wehlambululo.

²⁴ Ngelanga lekhomba nihlanze izambatho zenu, nizakuhlambuluka. Emva kwalokho ningangena ekampeni.”

²⁵ USomnini wakhuluma noMosi wathi:

²⁶ “Wena no-Elazara umphristi kanye neenhloko zemindeni yomkhambathi, balani okuthunjwe epini okubabantu nefuyo.

²⁷ Okuthunjiweko kwepango kwabiwe kabili phakathi komkhambathi namadoda agade aye epini.

²⁸ Epangweni yamadoda agade aye epini lawo khuphani umthelo kaSomnini: Emakhulwini amahlanu nilethe kunye kwepango yabantu, yeenkomo, yabodumbana, yezimvu neembuzi.

²⁹ Lokho kuthatheni esiquntwini sesabelo samadoda lawo ninikele u-Elazara umphristi kube njengomnikelo kaSomnini.

³⁰ Esiquntwini sepango yama-Israyeli thathani kunye ngefumbe ematjhumini amahlanu kwepango yabantu, yeenkomo, yabodumbana, yezimvu neembuzi, okutjho eenlwaneni zoke nikunikele amaLevi abatjheji bepahla yethaberinakeli lakaSomnini.”

³¹ UMosi no-Elazara umphristi benza njengombana uSomnini ayale uMosi.

³² Ipango eyathunjwa madoda wepi egade imele yabiwe ngile: bekuzizimvu neembuzi eziziinkulungwana ezimakhulu asithandathu namatjhumi alikhomba nahlanu,

³³ iinkomo eziziinkulungwana ezimatjhumi alikhomba nambili,

³⁴ abodumbana abaziinkulungwana ezimatjhumi asithandathu nanye,

³⁵ abantu, okutjho iintombi eziziinkulungwana ezimatjhumi amathathu nambili ezingazange khe zingenwe madoda.

³⁶ Isiquntu sesabelo salabo abagade baye epini bekuzizimvu neembuzi eziziinkulungwana ezimakhulu amathathu namatjhumi amathathu nalikhomba namakhulu amahlanu.

³⁷ Umthelo kaSomnini waba zizimvu neembuzi ezimakhulu asithandathu namatjhumi alikhomba nahlanu.

³⁸ Iinkomo beziziinkulungwana ezimatjhumi amathathu nantandathu. Umthelo kaSomnini kizo waba matjhumi alikhomba nambili.

³⁹ Abodumbana bebaziinkulungwana ezimatjhumi amathathu namakhulu amahlanu. Umthelo kaSomnini kibo waba matjhumi asithandathu nanye.

⁴⁰ Abantu baba ziinkulungwana ezilitjhumi nantandathu. Umthelo kaSomnini ngabo waba matjhumi amathathu nambili.

⁴¹ UMosi wanikela umthelo weminikelo kaSomnini ku-Elazara umphristi. Kwaba njengombana uSomnini bekayale uMosi.

⁴² Isabelo sama-Israyeli, okusiquntu sepango eyalethwa madoda agade aye epini, ebe sabiwe nguMosi, besingalendlela:

⁴³ Umkhambathi wafunyana okulandelako: izimvu neembuzi eziziinkulungwana ezimakhulu amathathu namatjhumi amathathu nalikhomba namakhulu amahlanu,

⁴⁴ iinkomo eziziinkulungwana ezimatjhumi amathathu nesithandathu,

⁴⁵ abodumbana abaziinkulungwana ezimatjhumi amathathu namakhulu amahlanu,

⁴⁶ abantu abaziinkulungwana ezilitjhumi nesithandathu.

⁴⁷ Esiquntwini sepango yama-Israyeli uMosi wathatha ngefumbe munye ebantwini abamatjhumi amahlanu nefuyo yinye kematjhumi amahlanu, wanikela amaLevi abatjheji bepahla yethaberinakeli lakaSomnini. Kwaba njengombana uSomnini bekayale uMosi.

⁴⁸ Iinkhulu egade zengamele ibutho leenkulungwana neenduna zeenkulungwana nezamakhulu zatjhidela kuMosi,

⁴⁹ zafese zathi kuye: “Iinceku zakho seziwabalile amadoda wepi angaphasi kwelawulo lazo, nje-ke akukho neyodwa indoda elahlekileko.

⁵⁰ Begodu silethe nomnikelo kaSomnini, okungilokho omunye nomunye wethu akufunyeneko kwezinto zegolide: imihlobohlobo yeenkhono, iindzilamnwana, amancina nabonongoro kobana sizozenzela itethelelo kuSomnini.”

⁵¹ Yeke uMosi no-Elazara umphristi bamukela izinto zegolidezo kizo, ebe kubuphaziphazi obenziweko.

⁵² Loke igolide ebegade liphuma eenduneni zeenkulungwana neenduneni zamakhulu, uMosi no-Elazara abanikela ngalo kuSomnini, belingaba makhilogremu alikhulu namatjhumi alithoba.

⁵³ Amadoda wepi gade azithathele ipango ebuphaziphazi epini.

⁵⁴ UMosi no-Elazara umphristi bamukela igolide eenduneni zeenkulungwana nezamakhulu baliletha etendeni lokuhlanganela bona libe sikhumbuzo sama-Israyeli phambi kwakaSomnini.