UNUMERI 3 - IsiNdebele 2012 Translation

Ukutlolwa kwabaphristi namaLevi

¹ Naku-ke umlando weenzukulwana zaka-Aroni noMosi ngesikhathi uSomnini akhuluma noMosi entabeni yeSinayi:

² Amabizo wamadodana ka-Aroni bekunguNadaba izibulo, alanywe ngu-Abihu, u-Elazara no-Itamara.

³ Lawo-ke mabizo wamadodana ka-Aroni abaphristi abazesiweko ebegade ajanyiswe kobana abe baphristi.

⁴ Kodwana uNadaba no-Abihu bafela phambi kwakaSomnini erhalawumbeni leSinayi lokha nabatjhidela e-aldarini namalahle atjhili. Bebanganabantwana. Ngu-Elazara no-Itamara kwaphela abasala bona balotjhe njengabaphristi ngesikhathi saka-Aroni uyise.

⁵ Yeke uSomnini wathi kuMosi:

⁶ “Tjhideza ikoro yakwaLevi bese uyibeka ngaphasi kwelawulo laka-Aroni umphristi. Kufuze imsekele

⁷ ngokwenza imisebenzakhe phambi kwetende lokuhlanganela kanye neyomkhambathi woke, okutjho imisebenzi okufanele iyenze ethaberinakelini.

⁸ AmaLevi kufuze atjheje yoke ipahla yetende lokuhlanganela begodu enze imisebenzi yethaberinakeli esikhundleni sama-Israyeli.

⁹ Beka amaLevi aphelele emsebenzini ka-Aroni namadodanakhe. Kufuze abasize ngehlangothini lama-Israyeli.

¹⁰ Kodwana u-Aroni namadodanakhe ababekwe bona benze umsebenzi wobuphristi. Nange kungaba khona omunye othatha umsebenzabo, akabulawe.”

¹¹ USomnini wakhuluma noMosi godu wathi:

¹² “Qala, ngimi okhethe amaLevi hlangana nama-Israyeli kobana ajamele woke amazibulo, okutjho koke okuphume qangi esibelethweni. Iye, amaLevi azakuba ngewami

¹³ ngombana woke amazibulo ngewami. Kwathi lokha nangimadlha phasi woke amazibulo wenarheni yeGibhide, ngazihlukanisela woke amazibulo aduna, wabantu neweenlwana kwa-Israyeli; nje-ke angewami. NginguSomnini.”

¹⁴ USomnini wabuye wakhuluma noMosi erhalawumbeni leSinayi wathi:

¹⁵ “Tlolisa amaLevi ngokwezindlu zaboyise nangemindenawo. Boke abaduna ukusukela esaneni lenyanga ukuya phezulu kufuze batloliswe.”

¹⁶ Nje-ke uMosi wawatlolisa ukuya ngelizwi lakaSomnini. Wenza njengombana bekayaliwe.

¹⁷ Naka-ke amadodana kaLevi ngokwamabizwawo: NguGeritjhoni, uKhehathi noMerari.

¹⁸ Amabizo wamadodana kaGeritjhoni ngokwemindenawo kunguLibini noTjhimeyi.

¹⁹ WakaKhehathi ngokwemindenawo kungu-Amramu, uYitsihari, uRhebroni no-Uziyeli.

²⁰ WakaMerari ngokwemindenawo, kunguMarhili noMutjhi. Leyo-ke bekumindeni yamaLevi ngokwezindlu zaboyise.

²¹ KuGeritjhoni kudabuka imindeni yamaLibini neyamaTjhimeyi. Leyo-ke bekumindeni kaGeritjhoni.

²² Isibalo sabo boke abaduna abatlolisweko bemindeni le, ukusukela esaneni lenyanga ukuya phezulu, besiziinkulungwana ezilikhomba namakhulu amahlanu.

²³ Umndeni kaGeritjhoni lo, bekufuze uhlome amatendawo ngemuva kwethaberinakeli nca ngetjingalanga.

²⁴ Umrholi womndeni kaGeritjhoni bekungu-Eliyasafa umsa kaLayela.

²⁵ AmaGeritjhoni bekufuze atjheje itende lokuhlanganela: ithaberinakeli netende, okutjho isigubuzeso sethaberinakeli, itjhila lomnyango wetende lokuhlanganela,

²⁶ imilembelembe yesirhodlo, isivalo sesango lesirhodlo esizombeleze ithaberinakeli ne-aldari kanye neentambo zakhona. Koke okuphathelene nalokho bekumsebenzawo.

²⁷ KuKhehathi kudabuka imindeni yama-Amramu, yamaYitsihari, yamaRhebroni neyama-Uziyeli. Leyo-ke bekumindeni kaKhehathi.

²⁸ Isibalo sabo boke abaduna abatlolisweko bemindeni le, ukusukela esaneni lenyanga ukuya phezulu, besiziinkulungwana ezibunane namakhulu asithandathu. Umndeni lo bekufuze utjheje ipahla yendawo ecwengileko.

²⁹ AmaKhehathi la bekufuze ahlome amatendawo ngehlangothini langesewula yethaberinakeli.

³⁰ Umrholi womndeni kaKhehathi bekungu-Elitsafani umsa ka-Uziyeli.

³¹ Imisebenzi yamaKhehathi beyiphathelene nokutjheja umfaji wesivumelwano, itafula, ilithi leembani, ama-aldari, izitja zendawo ecwengileko ezisetjenziswa baphristi kanye nesiyaya sendawo ecwenge khulu. Koke okuphathelene nalokho bekumsebenzawo.

³² U-Elazara umsa ka-Aroni umphristi, bekayinduna ekulu yamaLevi begodu bekufuze abe nelihlo phezu kwabatjheji bendawo ecwengileko.

³³ KuMerari kudabuka imindeni yamaMarhili neyamaMutjhi. Leyo-ke bekumindeni kaMerari.

³⁴ Isibalo sabo boke abaduna abatlolisweko bemindeni le, ukusukela esaneni lenyanga ukuya phezulu, besiziinkulungwana ezisithandathu namakhulu amabili.

³⁵ Umrholi womndeni kaMerari bekunguTsuriyeli umsa ka-Abirhayili. AmaMerari bekufuze ahlome amatendawo ngehlangothini langetlhagwini yethaberinakeli.

³⁶ Imisebenzi yamaMerari beyiphathelene nokutjheja amahlaka wethaberinakeli, iinqabo, iinsika namanzinziswalo kanye nazo zoke iinsetjenziswa zakhona. Koke okuphathelene nalokho bekumsebenzawo.

³⁷ Godu bekufuze atjheje iinsika ezizombeleze isirhodlo namanzinziswazo, iinkhonkhwani kanye neentambo zakhona.

³⁸ Labo ebekufuze bahlome amatendabo ngaphambi kwethaberinakeli, ngehlangothini langepumalanga yetende lokuhlanganela, nguMosi no-Aroni kanye namadodanakhe. Ngibo ebe baqalene nokulotjha endaweni ecwengileko esikhundleni sama-Israyeli. Nanyana ngubani omunye ozakutjhidela eendaweni ezikhethiselako, akabulawe.

³⁹ Isibalo samaLevi esatloliswa nguMosi no-Aroni ngokomyalo kaSomnini, besiziinkulungwana ezimatjhumi amabili nambili. Bekutloliswe boke abaduna ngokwemindeni ukusukela esaneni lenyanga ukuya phezulu.

⁴⁰ Godu uSomnini wakhuluma noMosi wathi: “Yewutlolise woke amazibulo aduna kwa-Israyeli ukusukela esaneni lenyanga ukuya phezulu, uwabale ngokwamabizwawo.

⁴¹ Esikhundleni samazibulo woke aduna wama-Israyeli, ngihlukanisela amaLevi, nesikhundleni samazibulo wefuyo yama-Israyeli ungihlukanisele amazibulo wefuyo yamaLevi. NginguSomnini.”

⁴² Nje-ke uMosi watlolisa woke amazibulo hlangana nama-Israyeli njengombana uSomnini bekamyalile.

⁴³ Isibalo sabatlolisweko, okutjho boke abaduna abamazibulo ukusukela esaneni lenyanga ukuya phezulu, besiziinkulungwana ezimatjhumi amabili nambili namakhulu amabili namatjhumi alikhomba nantathu.

⁴⁴ USomnini wabuya wakhuluma noMosi wathi:

⁴⁵ “Ngihlukanisela amaLevi esikhundleni samazibulo woke wama-Israyeli nefuyo yamaLevi esikhundleni sefuyo yama-Israyeli. Iye, amaLevi ngewami. NginguSomnini.

⁴⁶ Amazibulo amakhulu amabili namatjhumi alikhomba nantathu wama-Israyeli angaphezulu kwesibalo samaLevi kufuze ahlengwe.

⁴⁷ Umuntu ngamunye akahlengwe ngeempaparwana ezihlanu zesiliva okumagremu amatjhumi amahlanu nahlanu ngokwesilinganiso sendawo ecwengileko.

⁴⁸ Thatha koke lokho ukunikele u-Aroni namadodanakhe kube sihlengo samazibulo wama-Israyeli angaphezulu kwesibalo samaLevi.”

⁴⁹ Nje-ke uMosi wabuthelela isiliva yesihlengo ebantwini abangaphezulu kwesibalo sabahlengwe maLevi.

⁵⁰ Isiliva ayibuthelele emazibulweni wama-Israyeli leyo, yaba makhilogremu alitjhumi nahlanu nesiquntu ngokwesilinganiso sendawo ecwengileko.

⁵¹ Ngokunjalo-ke uMosi wanikela u-Aroni namadodanakhe isiliva yesihlengo ngokuya ngelizwi lakaSomnini. Kwaba njengombana uSomnini bekamyalile.