UNUMERI 29 - IsiNdebele 2012 Translation

Imihlabelo neminikelo yomnyanya weemporompita

¹ “ ‘Ngelanga lokuthoma enyangeni yekhomba nizakuba nehlangano ekhethekileko, nje-ke mhlokho ningawuthinti umsebenzi. Lelo kulilanga lokuvuthela iimporompita.

² Nikelani umhlabelo wokutjhiswa owamukelekako kuSomnini: ikunzana eyodwa, iqama elilodwa namaqamanyana alikhomba anomnyaka munye. Qinisekisani bona zoke iinlwanezo zimsulwa.

³ Kufuze ninikele imihlabelo leyo neminikelo yeenthoro yeflowuru esefiweko edutjwe ngamafutha we-oliva. Ikunzana ikhambisane namathungana amathathu weflowuru bese iqama nalo likhambisane namathungana amabili weflowuru leyo.

⁴ Elinye nelinye iqamanyana kilawo alikhomba, nilinikele nethungana linye leflowuru leyo.

⁵ Godu kube nepongo yomhlabelo wehlambululo bonyana nizenzele itethelelo kuSomnini.

⁶ Nizakunikela ngalokho kube mnikelo okhethekileko, owamukelekako kuSomnini ngaphandle kwemihlabelo yokutjhiswa yokuthwasa kwenyanga neminikelo yakhona yeenthoro. Godu ngaphandle kwemihlabelo yokutjhiswa ejayelekileko neminikelo yakhona yeenthoro kanye neminikelo yakhona yokuselwako. Lokho kube ngokwemikhuba yakhona.’ ”

Imihlabelo neminikelo yelanga letethelelo

⁷ “ ‘Ngenyanga yekhomba lokha nayinamalanga alitjhumi nizakuba nomhlangano okhethekileko nizile ukudla. Nje-ke mhlokho ningawuthinti umsebenzi.

⁸ Nikelani umhlabelo wokutjhiswa owamukelekako kuSomnini: ikunzana eyodwa, iqama elilodwa namaqamanyana alikhomba anomnyaka munye, koke kube msulwa.

⁹ Kufuze ninikele imihlabelo leyo neminikelo yeenthoro yeflowuru esefiweko edutjwe ngamafutha we-oliva. Ikunzana ikhambisane namathungana amathathu weflowuru bese iqama nalo likhambisane namathungana amabili weflowuru leyo.

¹⁰ Elinye nelinye iqamanyana kilawo alikhomba, nilinikele nethungana linye leflowuru leyo.

¹¹ Godu kube nepongo yomhlabelo wehlambululo, ngaphandle komhlabelo wehlambululo okwenziwa ngawo itethelelo nangaphandle komhlabelo wokutjhiswa ojayelekileko nomnikelo wakhona weenthoro kanye nomnikelo wakhona wokuselwako.’ ”

Imihlabelo neminikelo yomnyanya wemiTlhatlhana

¹² “ ‘Ngelanga letjhumi nahlanu enyangeni yekhomba nizakuba nomhlangano okhethekileko. Mhlokho ningawuthinti umsebenzi, kodwana nigidinge umnyanya kaSomnini amalanga alikhomba.

¹³ Ninikele umhlabelo wokutjhiswa okumnikelo okhethekileko, owamukelekako kuSomnini: iinkunzana ezilitjhumi nanthathu, amaqama amabili namaqamanyana alitjhumi nane anomnyaka munye; koke kube msulwa.

¹⁴ Kufuze ninikele imihlabelo leyo neminikelo yeenthoro yeflowuru esefiweko edutjwe ngamafutha we-oliva. Enye nenye yeenkunzana ezilitjhumi nanthathu kumele ikhambisane namathungana amathathu weflowuru bese elinye nelinye iqama nalo likhambisane namathungana amabili weflowuru leyo.

¹⁵ Elinye nelinye iqamanyana kilawo alitjhumi nane, nilinikele nethungana linye leflowuru leyo.

¹⁶ Godu kube nepongo yomhlabelo wehlambululo, ngaphandle komhlabelo wokutjhiswa ojayelekileko nomnikelo wakhona weenthoro kanye nomnikelo wakhona wokuselwako.

¹⁷ “ ‘Ngelanga lesibili nikelani iinkunzana ezilitjhumi nambili, amaqama amabili namaqamanyana alitjhumi nane anomnyaka munye, koke kube msulwa.

¹⁸ Kesinye nesinye isibalo seenkunzana, amaqama namaqamanyana lawo, kunikelwe iminikelo yeenthoro kanye neyokuselwako njengokwesimiso sakhona.

¹⁹ Godu kube nepongo yomhlabelo wehlambululo, ngaphandle komhlabelo wokutjhiswa ojayelekileko nomnikelo wakhona weenthoro kanye nomnikelo wakhona wokuselwako.

²⁰ “ ‘Ngelanga lesithathu ninikele ngeenkunzana ezilitjhumi nanye, amaqama amabili namaqamanyana alitjhumi nane anomnyaka munye, koke kube msulwa.

²¹ Kesinye nesinye isibalo seenkunzana, amaqama namaqamanyana lawo, kunikelwe iminikelo yeenthoro kanye neyokuselwako njengokwesimiso sakhona.

²² Godu kube nepongo yomhlabelo wehlambululo, ngaphandle komhlabelo wokutjhiswa ojayelekileko nomnikelo wakhona weenthoro kanye nomnikelo wakhona wokuselwako.

²³ “ ‘Ngelanga lesine ninikele ngeenkunzana ezilitjhumi, amaqama amabili namaqamanyana alitjhumi nane anomnyaka munye, koke kube msulwa.

²⁴ Kesinye nesinye isibalo seenkunzana, amaqama namaqamanyana lawo, kunikelwe iminikelo yeenthoro kanye neyokuselwako njengokwesimiso sakhona.

²⁵ Godu kube nepongo yomhlabelo wehlambululo, ngaphandle komhlabelo wokutjhiswa ojayelekileko nomnikelo wakhona weenthoro kanye nomnikelo wakhona wokuselwako.

²⁶ “ ‘Ngelanga lesihlanu ninikele ngeenkunzana ezilithoba, amaqama amabili namaqamanyana alitjhumi nane anomnyaka munye, koke kube msulwa.

²⁷ Kesinye nesinye isibalo seenkunzana, amaqama namaqamanyana lawo, kunikelwe iminikelo yeenthoro kanye neyokuselwako njengokwesimiso sakhona.

²⁸ Godu kube nepongo yomhlabelo wehlambululo, ngaphandle komhlabelo wokutjhiswa ojayelekileko nomnikelo wakhona weenthoro kanye nomnikelo wakhona wokuselwako.

²⁹ “ ‘Ngelanga lesithandathu ninikele ngeenkunzana ezibunane, amaqama amabili namaqamanyana alitjhumi nane anomnyaka munye, koke kube msulwa.

³⁰ Kesinye nesinye isibalo seenkunzana, amaqama namaqamanyana lawo, kunikelwe iminikelo yeenthoro kanye neyokuselwako njengokwesimiso sakhona.

³¹ Godu kube nepongo yomhlabelo wehlambululo, ngaphandle komhlabelo wokutjhiswa ojayelekileko nomnikelo wakhona weenthoro kanye nomnikelo wakhona wokuselwako.

³² “ ‘Ngelanga lekhomba ninikele ngeenkunzana ezilikhomba, amaqama amabili namaqamanyana alitjhumi nane anomnyaka munye, koke kube msulwa.

³³ Kesinye nesinye isibalo seenkunzana, amaqama namaqamanyana lawo, kunikelwe iminikelo yeenthoro kanye neyokuselwako njengokwesimiso sakhona.

³⁴ Godu kube nepongo yomhlabelo wehlambululo, ngaphandle komhlabelo wokutjhiswa ojayelekileko nomnikelo wakhona weenthoro kanye nomnikelo wakhona wokuselwako.

³⁵ “ ‘Ngelanga lobunane nizakuba nomgidi omkhulu, nje-ke mhlokho ningawuthinti umsebenzi.

³⁶ Ninikele umhlabelo wokutjhiswa okumnikelo okhethekileko, owamukelekako kuSomnini: ikunzana eyodwa, iqama elilodwa namaqamanyana alikhomba anomnyaka munye, koke kube msulwa.

³⁷ Kesinye nesinye isibalo seenkunzana, amaqama namaqamanyana lawo, kunikelwe iminikelo yeenthoro kanye neyokuselwako njengokwesimiso sakhona.

³⁸ Godu kube nepongo yomhlabelo wehlambululo, ngaphandle komhlabelo wokutjhiswa ojayelekileko nomnikelo wakhona weenthoro kanye nomnikelo wakhona wokuselwako.

³⁹ “ ‘Nikelani koke lokho kuSomnini ngesikhathi sakhona seminyanyenu, kube singezelelo eminikelwenenu yesithembiso, yesihle, yeenthoro, yokuselwako neyetjhebiswano kanye nemihlabelwenenu yokutjhiswa.’ ”

⁴⁰ UMosi watjela ama-Israyeli koke njengombana uSomnini amyalile.