UNUMERI 28 - IsiNdebele 2012 Translation

Imihlabelo neminikelo yemihla ngemihla

¹ USomnini wakhuluma noMosi wathi:

² “Yala ama-Israyeli uthi kiwo, ‘Yelelani bona kulethwa kimi ngesikhathi esifaneleko iminikelwami okutjho ukudla okumnikelo okhethekileko, owamukelekako kimi.’

³ “Godu yithi kiwo, ‘Naku umnikelo okhethekileko enizawunikela kuSomnini: Amaqamanyana amabili anomnyaka munye abe msulwa, kube mhlabelo wokutjhiswa onikelwa imihla ngemihla.

⁴ Kunikelwe linye ekuseni, linye ngamarhwaqela.

⁵ Umhlabelo lowo awukhambisane nokwetjhumi kwakapumpana womnikelo weenthoro okuyiflowuru esefiweko edutjwe ngelitha nesiquntu samafutha we-oliva.

⁶ Lowo kumhlabelo wokutjhiswa wesikhathi soke owasungulwa entabeni yeSinayi bona ube mnikelo okhethekileko, owamukelekako kuSomnini.

⁷ Iqamanyana linye alikhambisane nelitha nesiquntu somnikelo wokuselwako. Umnikelo wokuselwako obutjwala lowo awuthululelwe endaweni ecwengileko phambi kwakaSomnini.

⁸ Iqamanyana elinye olinikela ngamarhwaqela, linikele nomnikelo weenthoro newokuselwako kube njenganyana wenze kelekuseni. Linikele libe njengomnikelo okhethekileko owamukelekako kuSomnini.’ ”

Imihlabelo neminikelo yamaSabatha

⁹ “ ‘Ngelanga leSabatha umhlabelo akube maqamanyana amabili anomnyaka munye abe msulwa, namathungana amathathu weflowuru esefiweko edutjwe ngamafutha we-oliva kube mnikelo weenthoro kanye nomnikelo wakhona wokuselwako.

¹⁰ Lokho kuzakuba mhlabelo wokutjhiswa wangamaSabatha, ngaphandle komhlabelo wokutjhiswa wangemihla nomnikelo wakhona wokuselwako.’ ”

Imihlabelo neminikelo yenyanga nenyanga

¹¹ “Ekuthomeni kwenyanga enye nenye, nikelani umhlabelo wokutjhiswa kuSomnini: iinkunzana ezimbili, iqama linye namaqamanyana alikhomba anomnyaka munye abe msulwa.

¹² Ikunzana enye nenye niyinikele kanye namathungana amathathu weflowuru esefiweko edutjwe ngamafutha we-oliva kube mnikelo weenthoro. Iqamelo alikhambisane namathungana amabili weflowuru esefiweko edutjwe ngamafutha we-oliva kube mnikelo weenthoro.

¹³ Iqamanyana ngalinye alikhambisane nethungana leflowuru esefiweko edutjwe ngamafutha we-oliva kube mnikelo weenthoro. Linikele libe mhlabelo wokutjhiswa, njengomnikelo okhethekileko owamukelekako kuSomnini.

¹⁴ Umnikelo wokuselwako okhambisana nekunzana enye nenye uzakuba malitha amane wewayini. Umnikelo wokuselwako okhambisana neqama uzakuba malitha amabili nesiquntu bese okhambisana neqamanyana kube lilitha nesiquntu. Lokho kuzakuba mhlabelo wokutjhiswa waqobe yinyanga umnyaka woke.

¹⁵ Ninikele nepongo yinye kube mhlabelo wehlambululo kuSomnini, ngaphandle komhlabelo wokutjhiswa ojayelekileko nomnikelo wakhona wokuselwako.”

Imihlabelo neminikelo yomnyanya wePhasika nowesiKwa esinganaNgumelo

¹⁶ “IPhasika lakaSomnini lizakuba elangeni letjhumi nane, ngenyanga yokuthoma emnyakeni.

¹⁷ Ngelanga letjhumi nahlanu lenyanga leyo kufuze kube nomnyanya, kudliwe isikwa esinganangumelo amalanga alikhomba.

¹⁸ Elangeni lokuthoma lomnyanya nizakuba nomhlangano okhethekileko, nje-ke mhlokho ningawuthinti umsebenzi.

¹⁹ Nikelani umhlabelo wokutjhiswa okumnikelo okhethekileko kuSomnini: iinkunzana ezimbili, iqama elilodwa namaqamanyana alikhomba anomnyaka munye. Qinisekisani bona zoke iinlwanezo zimsulwa.

²⁰ Kufuze ninikele imihlabelo leyo neminikelo yeenthoro yeflowuru esefiweko edutjwe ngamafutha we-oliva. Ikunzana enye nenye ikhambisane namathungana amathathu weflowuru bese iqama nalo likhambisane namathungana amabili weflowuru leyo.

²¹ Elinye nelinye iqamanyana kilawo alikhomba, nilinikele nethungana leflowuru leyo.

²² Godu kube nepongo yomhlabelo wehlambululo bonyana nizenzele itethelelo kuSomnini.

²³ Nizakunikela ngalokho ngaphandle kweminikelo yokutjhiswa ejayelekileko eyenziwa njalo ekuseni.

²⁴ Ngendlela efanako imihla ngemihla nizakunikela ukudla okumnikelo okhethekileko owamukelekako kuSomnini nomnikelo wakhona wokuselwako. Iminikelo leyo izakunikelwa amalanga alikhomba ngaphandle kwemihlabelo yokutjhiswa ejayelekileko.

²⁵ Elangeni lekhomba lomnyanya nizakuba nomhlangano okhethekileko, nje-ke mhlokho ningawuthinti umsebenzi.”

Imihlabelo neminikelo yomnyanya weemVeke

²⁶ “Ngelanga eniletha ngalo umnikelo weenthoro ezitja wesilumo kuSomnini, okutjho emnyanyeni weemVeke, yibani nomhlangano okhethekileko, nje-ke mhlokho ningawuthinti umsebenzi.

²⁷ Nikelani umhlabelo wokutjhiswa owamukelekako kuSomnini: iinkunzana ezimbili, iqama elilodwa namaqamanyana alikhomba anomnyaka munye.

²⁸ Kufuze ninikele imihlabelo leyo neminikelo yeenthoro yeflowuru esefiweko edutjwe ngamafutha we-oliva. Ikunzana enye nenye ikhambisane namathungana amathathu weflowuru bese iqama nalo likhambisane namathungana amabili weflowuru leyo.

²⁹ Elinye nelinye iqamanyana kilawo alikhomba, nilinikele nethungana leflowuru leyo.

³⁰ Godu kube nepongo bonyana nizenzele itethelelo kuSomnini.

³¹ Nizakunikela ngalokho kanye neminikelo yakhona yokuselwako, ngaphandle komnikelo wokutjhiswa ojayelekileko nomnikelo wakhona weenthoro. Qinisekisani bona zoke iinlwanezo zimsulwa.”