UNUMERI 26 - IsiNdebele 2012 Translation

Ukutloliswa kwesibili kwama-Israyeli

¹ Ngemva kwalokho uSomnini wakhuluma noMosi no-Elazara umsa ka-Aroni umphristi wathi:

² “Balani woke umkhambathi wama-Israyeli ngemindeni yaboyise, okutjho boke abaduna abasele balungele ukuya epini ukusukela kwabaneminyaka ematjhumi amabili ukuya phezulu.”

³ Nje-ke uMosi no-Elazara umphristi bakhuluma nama-Israyeli kwaMowabi ngemrhobeni weJordani malungana neJerikho bonyana

⁴ kutloliswe abaduna ukusukela kwabaneminyaka ematjhumi amabili ukuya phezulu. Kwaba njengombana uSomnini ayale uMosi. Ama-Israyeli aphuma enarheni yeGibhide nakabalwa nguMosi bekungilawa:

⁵ Lezi bekuziinzukulwana zakaRubeni izibulo laka-Israyeli: uRhanoko owabeletha umndeni wamaRhanoko, uPalu owabeletha umndeni wamaPalu,

⁶ uRhetsironi owabeletha umndeni wamaRhetsironi, uKarimi owabeletha umndeni wamaKarimi.

⁷ Leyo-ke bekumindeni yakaRubeni. Labo abatlolisweko bebaziinkulungwana ezimatjhumi amane nantathu namakhulu alikhomba namatjhumi amathathu.

⁸ Indodana kaPalu bekungu-Eliyabu.

⁹ Amadodana ka-Eliyabu kunguNemuweli, uDatani no-Abiramu. (Laba bekunguDatani no-Abiramu abakhethwa emkhambathini. Ngibo abaphikisana noMosi no-Aroni ejimeni lakaKhorarhi. Ngalokho bebaphikisana noSomnini.

¹⁰ Iphasi lavula umlomalo labaginya kanye noKhorarhi. Ijima lamadoda amakhulu amabili namatjhumi amahlanu lafa ngokuqothulwa mlilo. Ngendlela leyo abantwaba baba sitjengiso sesiyeleliso.

¹¹ Nokho amadodana kaKhorarhi akhange ahlongakale.)

¹² Lezi bekuziinzukulwana zakaSimiyoni ngokwemindenazo: uNemuweli owabeletha umndeni wamaNemuweli, uJamini owabeletha umndeni wamaJamini, uJakini owabeletha umndeni wamaJakini,

¹³ uZerarhi owabeletha umndeni wamaZerarhi, uSawula owabeletha umndeni wamaSawula.

¹⁴ Leyo-ke bekumindeni yakaSimiyoni. Labo abatlolisweko bebaziinkulungwana ezimatjhumi amabili nambili namakhulu amabili.

¹⁵ Lezi bekuziinzukulwana zakaGadi ngokwemindenazo: uTsefoni owabeletha umndeni wamaTsefoni, uRhagi owabeletha umndeni wamaRhagi, uTjhuni owabeletha umndeni wamaTjhuni,

¹⁶ u-Ozini owabeletha umndeni wama-Ozini, u-Eri owabeletha umndeni wama-Eri,

¹⁷ u-Arodi owabeletha umndeni wama-Arodi, u-Areli owabeletha umndeni wama-Areli.

¹⁸ Leyo-ke bekumindeni yakaGadi. Labo abatlolisweko bebaziinkulungwana ezimatjhumi amane namakhulu amahlanu.

¹⁹ U-Eri no-Onani bekumadodana kaJuda, kodwana bahlongakalela enarheni yeKanana.

²⁰ Lezi bekuziinzukulwana zakaJuda ngokwemindenazo: uTjhela owabeletha umndeni wamaTjhela, uPeretsi owabeletha umndeni wamaPeretsi, uZerarhi owabeletha umndeni wamaZerarhi.

²¹ Amadodana kaPeretsi bekunguRhetsironi owabeletha umndeni wamaRhetsironi noRhamulu owabeletha umndeni wamaRhamulu.

²² Leyo-ke bekumindeni yakaJuda. Labo abatlolisweko bebaziinkulungwana ezimatjhumi alikhomba nathandathu namakhulu amahlanu.

²³ Lezi bekuziinzukulwana zaka-Isakari ngokwemindenazo: uTola owabeletha umndeni wamaTola, uPuva owabeletha umndeni wamaPuni,

²⁴ uJatjhubi owabeletha umndeni wamaJatjhubi, uTjhimroni owabeletha umndeni wamaTjhimroni.

²⁵ Leyo-ke bekumindeni yaka-Isakari. Labo abatlolisweko bebaziinkulungwana ezimatjhumi asithandathu nane namakhulu amathathu.

²⁶ Lezi bekuziinzukulwana zakaZebuloni ngokwemindenazo: uSeredi owabeletha umndeni wamaSeredi, u-Eloni owabeletha umndeni wama-Eloni, uJarhiliyeli owabeletha umndeni wamaJarhiliyeli.

²⁷ Leyo-ke bekumindeni yakaZebuloni. Labo abatlolisweko bebaziinkulungwana ezimatjhumi asithandathu namakhulu amahlanu.

²⁸ Amadodana kaJosefa bekunguManase no-Efrayimu.

²⁹ Lezi bekuziinzukulwana zakaManase ngokwemindenazo: uMakiri owabeletha umndeni wamaMakiri, uGiliyadi umsa kaMakiri owabeletha umndeni wamaGiliyadi.

³⁰ Nanzi-ke iinzukulwana zakaGiliyadi: u-Iyezeri owabeletha umndeni wama-Iyezeri, uRhelekhi owabeletha umndeni wamaRhelekhi,

³¹ u-Asriyeli owabeletha umndeni wama-Asriyeli, uTjhekemu owabeletha umndeni wamaTjhekemu,

³² uTjhemida owabeletha umndeni wamaTjhemida, uRheferi owabeletha umndeni wamaRheferi.

³³ (UTselofirhadi umsa kaRheferi gade anganawo amadodana kodwana amadodakazi kwaphela, amabizwawo bekunguMarhila, uNoya, uRhogila, uMilika noTiritsa.)

³⁴ Leyo-ke bekumindeni kaManase. Labo abatlolisweko bebaziinkulungwana ezimatjhumi amahlanu nambili namakhulu alikhomba.

³⁵ Nanzi-ke iinzukulwana zaka-Efrayimu ngokwemindenazo: uTjhutelarhi owabeletha umndeni wamaTjhutelarhi, uBhekeri owabeletha umndeni wamaBhekeri, uTarhani owabeletha umndeni wamaTarhani.

³⁶ Iinzukulwana zakaTjhutelarhi bekuma-Erani abelethwa ngu-Erani.

³⁷ Leyo-ke bekumindeni yaka-Efrayimu. Labo abatlolisweko bebaziinkuluwana ezimatjhumi amathathu nambili namakhulu amahlanu. Zoke lezo bekuziinzukulwana zakaJosefa ngokwemindenazo.

³⁸ Lezi bekuziinzukulwana zakaBhenjamini ngokwemindenazo: uBhela owabeletha umndeni wamaBhela, u-Atjhibhela owabeletha umndeni wama-Atjhibhela, u-Arhiramu owabeletha umndeni wama-Arhiramu,

³⁹ uTjhefufamu owabeletha umndeni wamaTjhefufamu, uRhufamu owabeletha umndeni wamaRhufamu.

⁴⁰ Amadodana kaBhela bekungu-Aridi noNamani; u-Aridi wabeletha umndeni wama-Aridi, uNamani wabeletha umndeni wamaNamani.

⁴¹ Lezo-ke bekuziinzukulwana zakaBhenjamini ngokwemindenazo. Labo abatlolisweko bebaziinkulungwana ezimatjhumi amane nahlanu namakhulu asithandathu.

⁴² Nanzi iinzukulwana zakaDani ngokwemindenazo: uTjhurhamu owabeletha umndeni wamaTjhurhamu. Lezo-ke bekuziinzukulwana zakaDani.

⁴³ Woke umndeni wakaTjhurhamu owatloliswako bewuziinkulungwana ezimatjhumi asithandathu nane namakhulu amane.

⁴⁴ Lezi bekuziinzukulwana zaka-Atjheri ngokwemindenazo: uJimna owabeletha umndeni wamaJimna, uJitjhivi owabeletha umndeni wamaJitjhivi, uBheriya owabeletha umndeni wamaBheriya.

⁴⁵ Amadodana kaBheriya bekunguRhebhere owabeletha umndeni wamaRhebhere uMalikiyeli owabeletha umndeni wamaMalikiyeli.

⁴⁶ (U-Atjheri gade anendodakazi ekuthiwa nguSerarhi.)

⁴⁷ Leyo-ke bekumindeni yaka-Atjheri. Labo abatlolisweko bebaziinkulungwana ezimatjhumi amahlanu nantathu namakhulu amane.

⁴⁸ Lezi bekuziinzukulwana zakaNafitali ngokwemindenazo: uJarhitsiyeli owabeletha umndeni wamaJarhitsiyeli, uGuni owabeletha umndeni wamaGuni,

⁴⁹ uJetseri owabeletha umndeni wamaJetseri, uTjhilemu owabeletha umndeni wamaTjhilemu.

⁵⁰ Leyo-ke bekumindeni yakaNafitali. Labo abatlolisweko bebaziinkulungwana ezimatjhumi amane nahlanu namakhulu amane.

⁵¹ Boke abatlolisweko bama-Israyeli bebaziinkulungwana ezimakhulu asithandathu nanye namakhulu alikhomba namatjhumi amathathu.

⁵² USomnini wakhuluma noMosi wathi:

⁵³ “Inarha izakwabelwa abantwabo ibe lilifa labo ngokuya ngesibalo samabizo.

⁵⁴ Ikoro enesibalo esikhulu izakwabelwa inarha ekulu, kuthi enesibalo esincani yabelwe inarha encani. Ikoro nekoro izakwabelwa ilifa layo ngokuya ngesibalo sabatlolisweko bayo.

⁵⁵ Inarha kufuze yabiwe ngefumbe. Izakuba lilifa ngokuya ngamabizo weenkoro zaboyisemkhulu.

⁵⁶ Woke amafa wekoro ekulu nencani azakwabiwa ngefumbe.”

⁵⁷ Napa-ke abatlolisweko bamaLevi ngokwemindenabo: uGeritjhoni owabeletha umndeni wamaGeritjhoni, uKhehathi owabeletha umndeni wamaKhehathi, uMerari owabeletha umndeni wamaMerari.

⁵⁸ Godu eminye imindeni yamaLevi bekunginasi: umndeni wamaLibini, umndeni wamaRhebroni, umndeni wamaMarhili, umndeni wamaMutjhi, umndeni wamaKhorarhi. (UKhehathi wabeletha u-Amramu.

⁵⁹ Ibizo lomka-Amramu bekunguJokobedi indodakazi kaLevi eyabelethelwa eGibhide. Yena wabeletha u-Aroni, uMosi nodadwabo uMiriyamu.

⁶⁰ U-Aroni bekanguyise kaNadaba, u-Abihu, u-Elazara no-Itamara.

⁶¹ Kodwana uNadaba no-Abihu bahlongakala lokha nabathi banikela ngamalahle atjhili phambi kwakaSomnini.)

⁶² Boke abaduna abatlolisweko bamaLevi ukusukela esaneni lenyanga ukuya phezulu bebaziinkulungwana ezimatjhumi amabili nantathu. Bona azange batloliswe kanye nama-Israyeli ngombana akhange bamukele ilifa lenarha hlangana nama-Israyeli.

⁶³ Labo-ke babantu abatloliswa nguMosi no-Elazara umphristi lokha nabatlolisa ama-Israyeli kwaMowabi ngemrhobeni weJordani malungana neJerikho.

⁶⁴ Isibalo sabantu abatloliswekwaba, asifaki noyedwa walabo abatloliswa nguMosi no-Aroni umphristi erhalawumbeni leSinayi,

⁶⁵ ngombana uSomnini bekathe ngabo: “Ngambala bazakufela erhalawumbeni.” Yeke akhange kusale namunye wabo ngaphandle kwakaKalebi umsa kaJefune noJotjhuwa umsa kaNuni.