UNUMERI 25 - IsiNdebele 2012 Translation

Ama-Israyeli alotjha uBhali wePewori

¹ Kwathi lokha ama-Israyeli asahlezi eTjhithimu, amadoda athoma ukungwadla namadodakazi wakwaMowabi.

² Amadodakazi lawo awamema emihlatjelweni yabozinyana bawo. Amadoda lawo adla abe alotjha abozinyana bamadodakazi lawo.

³ Ngalokho ama-Israyeli azibophelela kuBhali wePewori. Nje-ke ilaka lakaSomnini lavutha ngama-Israyeli

⁴ bewathi kuMosi: “Thatha boke abarholi babantwaba bese ubaphanyeka babe selangeni phambi kwakaSomnini ukuze ilaka lakaSomnini lizokwazi ukusuka kuma-Israyeli.”

⁵ Yeke uMosi wathi ebagwebini bakwa-Israyeli: “Omunye nomunye wenu akabulale abantu abengameleko abazibophelele kuBhali wePewori.”

⁶ Khonapho, nango omunye wama-Israyeli aletha umfazi wakwaMidiyani emndeninakhe, uMosi nomkhambathi woke wakwa-Israyeli baqalile. Ngesikhatheso bebasalila phambi kwetende lokuhlanganela.

⁷ Kwathi lokha uFiniyasi umsa ka-Elazara omsa ka-Aroni umphristi nakabona lokho, wasikima watjhiya umkhambathi, wathatha umkhontwakhe,

⁸ walandela umuntu wakwa-Israyeli loyo ngencabafazi ngetendeni. Kwathi basalele wabahlaba bobabili, indoda nomfazi loyo, umkhonto waphundlukela esiswini somfazi. Emva kwalokho isifo sasuka kuma-Israyeli.

⁹ Labo ebegade sele bafe ngesifo bebaziinkulungwana ezimatjhumi amabili nane.

¹⁰ USomnini wathi kuMosi:

¹¹ “UFiniyasi umsa ka-Elazara omsa ka-Aroni umphristi, urhobhise ilaka lami kuma-Israyeli ngombana yena ube netjisakalo ngami. Ngalokho akhange ngiwabhubhise ama-Israyeli ngesikhwele enginaso.

¹² Yeke mtjele bona ngenza naye isivumelwano sokuthula:

¹³ Yena neenzukulwana zakhe bazakwamukeliswa isivumelwano sobuphristi nini nanini ngombana ube nesikhwele ngoZimakhe, wabuye wenzela ama-Israyeli itethelelo.”

¹⁴ Ibizo lendoda yakwa-Israyeli eyabulawa nomfazi wakwaMidiyani bekunguZimri umsa kaSalu oyihloko yomndeni wakwaSimiyoni.

¹⁵ Ibizo lomfazi wakwaMidiyani owabulawako bekunguKozibi indodakazi kaTsuri oyihloko yemindeni yekoro yakwaMidiyani.

¹⁶ USomnini wathi kuMosi:

¹⁷ “Phathani amaMidiyani njengezitha zenu bese niyawabulala,

¹⁸ ngombana nawo aniphatha njengezitha ngobuqili bawo lokha nakaniyenga ngendaba yePewori. Kwaba njalo nangendaba kadadwawo uKozibi indodakazi yomrholi wakwaMidiyani, owabulawa ngelanga lesifo esabangwa yiPewori.”