UNUMERI 24 - IsiNdebele 2012 Translation

¹ Kwathi lokha uBhiliyamu nakabona bona okuhle kuSomnini kukobana abusise ama-Israyeli, azange aphendukele emilingweni njengesiqhelo, kodwana waqala erhalawumbeni.

² Kwathi lokha nakaphakamisa amehlwakhe, wabona u-Israyeli ahlome amatendakhe ikoro ngekoro. UMoya kaZimu wehlela phezu kwakhe,

³ waphimisa umlayezwakhe wathi: “Isitjho sakaBhiliyamu umsa kaBhewori, isitjho somuntu onelihlo elibukhali,

⁴ isitjho somuntu olalela amezwi kaZimu, nobona isambulo soSabekako, obona kuhle nakasemmoyeni:

⁵ Maye mahle kangangani amatendakho Jakopo, imitlhatlhanakho wena Israyeli!

⁶ Anjengemithi emide yamasundu, nanjengeemvande ezimagegana nomlambo, nanjengesilele esitjalwa nguSomnini, nanjengemithi yomsedari emile hlanu kwamanzi.

⁷ Amanzi azakukhelelwa ngeenkhwama zabo zesikhumba, nembewabo izakuba namanzi aneleko. Ikosabo izakuphakamela ngehla kwaka-Agagi, nombuswayo uzakuphakanyiswa.

⁸ UZimu wabakhupha eGibhide, kibo unjengeempondo zekukhama. Bazakuginya izizwe ezizizitha zabo bephule amathambazo abe ziinquqwana, baphihlize ababagandelelako.

⁹ Bayakhothama bazigedagede phasi njengebhubezi nanjengebhubezikazi; akakho ongalinga ukubavusa! Abanibusisako bazakubusiswa, nabaninikelelako bazakunikelelwa.”

¹⁰ Ilaka lakaBhalakhi lavutha kuBhiliyamu, wathintitha izandla wathi: “Ngikubizele bona uzongithiyela izitha zami ngemilingo! Qala-ke wena uzibusise bekwaba kathathu!

¹¹ Yeke goduka khona nje, utjhinge ekhenu. Bengithi ngizokuvuza kuhle, kodwana uSomnini ukwenze bona ungavuzeki.”

¹² UBhiliyamu wathi kuBhalakhi: “Angitjho ngizitjelile iinthunywa ogade uzithume kimi ngathi,

¹³ ‘Nanyana uBhalakhi gade angangipha isigodlo sakhe sigcwele isiliva negolide bengingeze ngeqa umyalo kaSomnini ngenze okuhle namkha okumbi. Kwaphela lokho uSomnini athi ngikutjho.’

¹⁴ Iye, ngiyagoduka-ke nje, ngiya ekhethu. Yizapha ngikulemukise bona abantwaba bazokwenzani ebantwini bakho ngomuso.”

¹⁵ Nje-ke godu uBhiliyamu waphimisa umlayezwakhe wathi: “Isitjho sakaBhiliyamu umsa kaBhewori, isitjho somuntu onelihlo elibukhali,

¹⁶ isitjho somuntu olalela amezwi kaZimu, owazi ilwazi lakaZimu ongoPhezulu, obona isambulo soSabekako nobona kuhle nakasemmoyeni:

¹⁷ Ngiyambona yena kodwana ingasi manjesi, ngiyambona kodwana ingasi eduze. Iye, ikwekwezi izakuvumbuka kuJakopo, intonga yobukhosi izakuvela ku-Israyeli; izakuphihliza iindlani zombili zakwaMowabi, neenhloko zamaTjhethi woke.

¹⁸ U-Edomu uzakuba sisabelo sayo, iye, uSeyiri, isitha sayo, uzakuba sisabelo. Iye, u-Israyeli uzakubonisa amandlakhe

¹⁹ lokha loyo ovela kuJakopo nakabusako. Uzakubhubhisa abasindileko emadorobheni.”

Umlayezo wokugcina kaBhiliyamu

²⁰ Nje-ke uBhiliyamu waqala ngaku-Amalekhi waphimisa umlayezwakhe wathi: “U-Amalekhi uyindlondlo hlangana nezizwe kodwana ekugcineni uzakuwa ngephondo.”

²¹ UBhiliyamu waqala amaKheni waphimisa umlayezwakhe wathi: “Indawakho yokuhlala ingeyasafuthi, isihlakana sakho sakhiwe edwaleni.

²² Kodwana uKhayini uzokutjhiswa. Akuzukuba kade bona u-Asiriya akuthumbe.”

²³ UBhiliyamu waphimisa nomlayezo lo: “Maye! Kazi ngubani ozakuphila lokha uZimu nakenza lokho?

²⁴ Iye, kuzakuvela iinthayamanzi endaweni yamaKithi, zihlunguphaze u-Asiriya no-Ebhere; kanti-ke no-Asiriya uzakuhloma ngephondo phasi.”

²⁵ Nje-ke uBhiliyamu wasikima wagoduka waya ekhabo. UBhalakhi naye wabona eze ngayo.