UNUMERI 23 - IsiNdebele 2012 Translation

Ukuthoma kokukhuluma kwakaBhiliyamu

¹ UBhiliyamu wathi kuBhalakhi: “Ngakhelani ama-aldari alikhomba bese ningilethela iinkunzi ezilikhomba namaqama alikhomba.”

² UBhalakhi wenza njengombana uBhiliyamu atjhwile. Nje-ke uBhalakhi noBhiliyamu banikela ngekunzi neqama phezu kwelinye nelinye i-aldari.

³ UBhiliyamu wathi kuBhalakhi: “Jama hlanu kwemihlabelwakho yokutjhiswa le, mina ngisathi ukubethwa mumoya; mhlamunye uSomnini uzazibonakalisa kimi. Nje-ke nanyana yini azakwambula kimi, ngizakutjela khona.” Mbala wakhamba waya embunjwaneni onganalitho.

⁴ UZimu wazibonakalisa kuBhiliyamu. UBhiliyamu wathi kuye: “Ngilungise ama-aldari alikhomba, kwathi phezu kwelinye nelinye nganikela ikunzi neqama.”

⁵ USomnini wafaka uBhiliyamu ilizwi ngemlonyeni. Begodu wathi: “Buyela kuBhalakhi ufese umtjele engikutjele khona.”

⁶ Nje-ke wabuyela kuBhalakhi, qala, yena neenkhulu zoke zakwaMowabi bebajame hlanu kwemihlabelwakhe yokutjhiswa.

⁷ UBhiliyamu waphimisa umlayezwakhe wathi: “UBhalakhi wangilanda ukusukela e-Aramu, iye, ikosi yakwaMowabi yangisusa ngeentabeni zepumalanga ngokuthi, ‘Yewize uzonginikelelela uJakopo ngamanikelela; yewize uzokuthuwelelisa u-Israyeli!’

⁸ Ngingamnikelela njani ongakanikelelwa nguZimu? Ngimthuwelelise njani ongakathuweleliswa nguSomnini na?

⁹ Iye, ukusukela phezu kwamadwala ngiyababona, naphezu kwemibundu basavelile: Qala, kubabantu abahlala bodwa, begodu abazibali nezinye izizwe!

¹⁰ Ngubani ongabala uJakopo onjengethuli, u-Israyeli onjengesibalo sethuli lesivunguvungu? Angife ukufa kolungileko, nokuphela kwami kube njengokwakhe!”

¹¹ UBhalakhi wathi kuBhiliyamu: “Kanti ndoda ungisebenze njani? Angitjho ngikuthethe bona uzongithiyela izitha zami ngemilingo! Qala, sewazibusisa kwaphela!”

¹² Yena waphendula wathi: “Kanti akukafaneli bona ngiyelele lokho uSomnini akufake emlonyenami na?”

¹³ UBhalakhi wathi kuye: “Akhese unambe nami siye kenye indawo lapha uzababona khona abantwabo. Lapho-ke uzakubona ingcenye yabo ingasi boke. Nje-ke ungithiyele bona ngemilingo usendaweni leyo.”

¹⁴ Mbala uBhalakhi wamthatha wakhamba emmangweni weTsofimu esiqongweni sePisiga, wafese wakha ama-aldari alikhomba lapho bewanikela ngekunzi nangeqama phezu kwelinye nelinye lawo.

¹⁵ UBhiliyamu wathi kuBhalakhi: “Akhusuje ujame hlanu kwemihlabelo yokutjhiswa, mina ngisafuna ukuzihlanganisa noSomnini ngaphetjheyaphaya.”

¹⁶ USomnini wahlangana noBhiliyamu wafese wafaka ilizwi ngemlonyenakhe. Begodu wathi: “Buyela kuBhalakhi ufese umtjele engikutjele khona.”

¹⁷ Mbala uBhiliyamu wabuyela kuye wamfunyana ajame hlanu kwemihlabelwakhe yokutjhiswa neenkhulu zakwaMowabi ezikanye naye. UBhalakhi wambuza wathi: “Alo, uSomnini utheni?”

¹⁸ UBhiliyamu waphimisa umlayezo okuye wathi: “Sikima wena Bhalakhi, ulalele, iye, lalela kuhle wena msa kaTsipori:

¹⁹ UZimu akasuye umuntu bona angabeze aleye amala, namkha indodana yomuntu bona angabeze aphenduke. Uyakhuluma yena angenzi na? Uyathembisa angaphethi na?

²⁰ Yelela-ke mina ngamukele umyalo wokubusisa, yena ubusisile, yeke mina angeze ngakuphendula lokho.

²¹ KwaJakopo akufunyanwa iinthuweleliso, akubonwa umonakalo kwa-Israyeli. USomnini uZimabo unabo, ukusasela kwabo uSomnini kuphakathi kwabo.

²² UZimu wabakhupha eGibhide, kibo unjengeempondo zekukhama.

²³ Kwamambala awukho umlingo ongaphumelela kuJakopo, akukho ukufunisela okungajamelana no-Israyeli. UZimu ukhuluma ngoJakopo ngesikhathi esifaneleko, iye, uZimu ngokwakhe uhlosa okuzokwenzeka ngo-Israyeli.

²⁴ Isizwesi sifana nengwenyamakazi esikimako, iye, sifana nengwenyama ezisikimisako; ayilali phasi ingakadli inyamazana, ikhothe iingazi zesibandana esidabulileko.”

²⁵ Nje-ke uBhalakhi wathi kuBhiliyamu: “Khona-ke nakube awubathiyi ngemilingo, ungababusisi!”

²⁶ Kodwana uBhiliyamu waphendula uBhalakhi wathi: “Angitjho ngikutjelile bona kufuze ngenze kwaphela lokho uSomnini akutjhwileko.”

²⁷ UBhalakhi wathi kuBhiliyamu: “Namba khengikuthathe ngikuse kenye indawo. Mhlambe nawulapho kungahle kuthokozise uZimu bona ungithiyele abantwaba ngemilingo.”

²⁸ Nje-ke uBhalakhi wathatha uBhiliyamu wamusa esiqongweni sePewori lapha umuntu angabona khona iJetjhimoni.

²⁹ UBhiliyamu wathi kuBhalakhi: “Yewungakhele ama-aldari alikhomba bese ungilethela iinkunzi ezilikhomba namaqama alikhomba.”

³⁰ Mbala uBhalakhi wenza njengombana uBhiliyamu atjhwile bewanikela ngekunzi nangeqama e-aldarini elinye nelinye.