UNUMERI 22 - IsiNdebele 2012 Translation

UBhalakhi uyala uBhiliyamu

¹ Ama-Israyeli afuduka afese ahloma amatendawo ngemrhobeni weJordani kwaMowabi malungana neJerikho.

² UBhalakhi umsa kaTsipori wakubona koke ama-Israyeli agade akwenze kuma-Amori.

³ AmaMowabi aba nevalo elikhulu ngama-Israyeli ngombana gade amanengi. Iye, akhathazeka khulu ngawo.

⁴ UMowabi wakhuluma nabaphathi bamaMidiyani wathi: “Nje-ke isiqubuthwesi sizokutjhwamadela koke okusizombileko njengekomo nayitjhwamadela utjani emrhuleni.” UBhalakhi umsa kaTsipori, ogade ayikosi yakwaMowabi ngesikhatheso,

⁵ wathumela iinthunywa kuBhiliyamu umsa kaBhewori ngePetora emagegana nomlambo iYufrathe enarheni lapha adabuka khona, bona ziyombiza zithi kuye: “Yelela, kunabantu abaphuma eGibhide, abasibekele ubuso bephasi begodu bakhe eduze kwami.

⁶ Nje-ke yewize, uzonginikelelela abantwaba ngamanikelela ngombana banamandla khulu kunami. Mhlamunye kungahle kwenzeke bona ngibahlule bengibaqotjhe enarheni. Iye, ngiyazi bona obusiswa nguwe, ubusisiwe nonikelelwa nguwe unikelelwe.”

⁷ Nje-ke abaphathi bakwaMowabi nebakwaMidiyani basuka baphethe isiliva yokuthukula ezandleni zabo. Bafika kuBhiliyamu, bambikela umlayezo kaBhalakhi.

⁸ Yena wathi kibo: “Lalani lapha namhlanje, kuzakuthi kusasa nginibuyele nelizwi engilifumene kuSomnini.” Mbala iinkhulu zakwaMowabezo zalala kwaBhiliyamu.

⁹ UZimu wabonakala kuBhiliyamu wambuza wathi: “Bobani amadoda anawe la?”

¹⁰ UBhiliyamu waphendula uZimu wathi: “UBhalakhi ikosi yakwaMowabi omsa kaTsipori ungithumelele umbiko ngawo wathi,

¹¹ ‘Yelela, kunabantu abaphuma eGibhide, abasibekele ubuso bephasi begodu bakhe eduze kwami. Nje-ke yewize, uzongithiyela abantwaba ngemilingo. Mhlamunye kungahle kwenzeke bona ngibahlule bengibaqotjhe.’ ”

¹² UZimu wathi kuBhiliyamu: “Ungakhambi nawo. Begodu unganikeleli abantwabo ngombana bangababusisiweko.”

¹³ UBhiliyamu wavuka ekuseni wathi eenkhulwini zakaBhalakhi: “Buyelani enarheni yekhenu ngombana uSomnini walile bona ngikhambe nani.”

¹⁴ Nje-ke iinkhulu zakwaMowabi zasuka zabuyela kuBhalakhi zafese zathi: “UBhiliyamu walile ukuza nathi.”

¹⁵ Godu uBhalakhi wathumela iinkhulu ezinengi nezinesithunzi kunezokuthoma.

¹⁶ Zeza kuBhiliyamu zafese zathi kuye: “Nakhu okutjhiwo nguBhalakhi umsa kaTsipori uthi, ‘Hle, akungabi khona into ekuthiyako ukuza kimi

¹⁷ ngombana ngizakupha umvuzo omkhulu. Nanyana yini oyitjhoko kimi ngizayenza. Yewize wena, uzongithiyela abantwaba ngemilingo.’ ”

¹⁸ Kodwana uBhiliyamu waphendula iinceku zakaBhalakhi wathi: “Ngitjho nanyana uBhalakhi gade angangipha isigodlo sakhe sigcwele isiliva negolide bengingeze ngeqa umyalo kaSomnini uZimami ngenze nanyana yini.

¹⁹ Nje-ke akhese nilale lapha nani ubusukobu, khengizwe bona yini enye into uSomnini azayitjho kimi.”

²⁰ UZimu wabonakala kuBhiliyamu ngobusukobo wathi kuye: “Nangabe amadoda lawo eze bona azokubiza, zilungiselele ukhambe nawo. Kodwana uzakwenza kwaphela lokho mina engikutjela khona.”

²¹ Nje-ke uBhiliyamu wavuka ekuseni wabophela udumbanakhe wemuka neenkhulu zakwaMowabi.

²² Kodwana gade asese sendleleni, akhwele udumbanakhe akhamba neenceku zakhe ezimbili, lokha ilaka lakaZimu nalithoma ukuvutha ngokukhamba kwakhe neenkhulwezo. Nje-ke ingilozi kaSomnini yajama endleleni phambi kwakhe kobana imkhandele.

²³ Udumbana wabona ingilozi kaSomnini ijame endleleni irhwatjhe isabulayo. Nje-ke udumbana waphuma endleleni wavundla ummango. UBhiliyamu wadula udumbana loyo bona abuyele endleleni.

²⁴ Ingilozi kaSomnini yajama emzilaneni phakathi kwesidiribe hlanu komthangala ngapha nangapha.

²⁵ Kuthe lokha udumbana nakabona ingilozi kaSomnini, waziyama ngomthangala, warhuhlisa inyawo lakaBhiliyamu ngomthangala lowo. Nje-ke uBhiliyamu wamdula godu.

²⁶ Ingilozi kaSomnini yaragela phambili yafese yajama emkghothaneni womthangala lapha kunganandawo yokujikela ngesidleni namkha ngesinceleni.

²⁷ Kwathi lokha udumbana nakabona ingilozi kaSomnini walala phasi uBhiliyamu asakhwele njalo. UBhiliyamu wabila khulu, watutlula udumbana loyo ngomtjhizakhe.

²⁸ Nje-ke uSomnini wavula umlomo kadumbana, wakhuluma noBhiliyamu wathi: “Ngikwenzeni mntabantu njengombana sekulihlandla lesithathu usoloko ungidula nje?”

²⁹ UBhiliyamu waphendula udumbana wathi: “Kungebanga lokobana ungitshime isidlhayela. Sengathi ngathana bengiphethe isabula esandleni samapha; bengizokubulala nya wena, khona nje!”

³⁰ Udumbana wathi kuBhiliyamu: “Kanti angisuye udumbanakho omkhwelileko esikhathini eside esidlulileko bekube namhlanje na? Bengiphele ngenze lokhu kuwe na?” UBhiliyamu wathi: “Awa.”

³¹ Nje-ke uSomnini wavula amehlo kaBhiliyamu, wabona ingilozi kaSomnini ijame endleleni irhwatjhe isabulayo. Khonapho waguqa wahloma ihloko phasi.

³² Ingilozi kaSomnini yathi kuye: “Kubayini ututlule udumbanakho bekube kathathu na? Yelela-ke, mina ngize bona ngizokukhandela ngombana indlela leyo inameva ngokubona kwami.

³³ Udumbana ungibonile bewaphambuka kathathu phambi kwami. Nangathana udumbana akhange aphambuke phambi kwami, ngiqinisile yi, wena ngasele ngikubulele nya, yena ngamlisa waphila.”

³⁴ Nje-ke uBhiliyamu wathi engilozini kaSomnini: “Ngonile ngombana akhange ngazi bona ujame endleleni kobana ungihlangabeze. Yeke nangabe akuthandeki emehlweni wekosami, ngizokubuyela emuva.”

³⁵ Ingilozi kaSomnini yathi kuBhiliyamu: “Khamba namadoda lawo, kodwana ukhulume kwaphela amezwi engizakutjela wona.” Nje-ke uBhiliyamu wakhamba neenkhulu zakaBhalakhi lezo.

³⁶ Kwathi lokha uBhalakhi nakezwa bona uBhiliyamu usendleleni, waphuma wayomhlangabeza edorobheni lakwaMowabi elisemlanjeni i-Arinoni, ngemaphelelweni womkhawulo.

³⁷ UBhalakhi wathi kuBhiliyamu: “Akhange ngithumele bona ubizwe na? Alo, kubayini ungakhange uze kimi ngesikhatheso? Kghani ngiyahluleka ukukuvuza na?”

³⁸ UBhiliyamu waphendula uBhalakhi wathi: “Lalela-ke, kwanje sengifikile kuwe. Kodwana ungacabangi bonyana ngizakukhuluma ilizwi uSomnini angakalitjho kimi. Kwaphela lokho uSomnini athe ngikutjho.”

³⁹ Nje-ke uBhiliyamu wakhamba noBhalakhi bebafika eKiriyathi-Rhutsothi.

⁴⁰ UBhalakhi wenza umhlabelo weenkomo nezimvu wabese uthumela isabelo kuBhiliyamu neenkhulu egade zinaye.

⁴¹ Kwathi ngakusasa kwakhona uBhalakhi wathatha uBhiliyamu wenyukela naye eBhamothi-Bhali. Lapho uBhiliyamu wabona ingcenye yabantu bakwa-Israyeli.