UNUMERI 21 - IsiNdebele 2012 Translation

Ukubhujiswa kwe-Aradi

¹ Ikosi ye-Aradi egade imKanana ihlala ngesewula yenarha, yezwa bona u-Israyeli uza ngendlela yange-Atarimu. Yasahlela ama-Israyeli beyathumba amanye wawo.

² Ama-Israyeli enza isifungo kuSomnini athi: “Nange mbala uSomnini anganikela abantwaba esandleni sethu, amadorobhabo sizowabhubhisa nya.”

³ USomnini wezwa isibawo sama-Israyeli, wanikela amaKanana esandleni sawo. Ama-Israyeli abhubhisa amaKanana lawo nya kanye namadorobhawo. Nje-ke ibizo lendawo leyo labizwa bona yiRhorima.

Inyoka yekoporo

⁴ Ama-Israyeli asuka entabeni yeHori alunga ngendlela eya elwandle lomGaba ukuze abhode inarha yakwa-Edomu. Khonapho endleleni banyefa ummongo.

⁵ Abantu banyefula uZimu noMosi bathi: “Nisikhupheleni eGibhide bona sizokufela erhalawumbenapha? Akunakudla! Namanzi awekho lapha! Begodu sese sidinwe nakukudlanyana okungazisikokhu!”

⁶ Nje-ke uSomnini wathumela iinyoka ezinesihlungu ebantwini, zabaluma; kwafa ama-Israyeli amanengi.

⁷ Abantu beza kuMosi bafese bathi: “Sonile ngombana sinyefule uSomnini kanye nawe. Yeke sithandazela kuSomnini bona asuse iinyokezi kithapha.” Nje-ke uMosi wabathandazela-ke.

⁸ USomnini wathi kuMosi: “Yenza umfanekiso wenyoka enesihlungu uyiphakamise ibe liphawu okuzakuthi omunye nomunye olunyiweko nakayiqalako, aphiliswe.”

⁹ UMosi wenza inyoka yekoporo, wayiphakamisa kobana ibe liphawu. Bekuthi nanyana ngubani olunywa yinyoka nakaqala inyoka yekoporo, aphile.

Ikhambo ukusuka e-Obhothi ukuya ePisiga

¹⁰ Ama-Israyeli afuduka ayokuhloma amatendawo nge-Obhothi.

¹¹ Afuduka godu e-Obhothi ayokuhloma e-Iye-Habharimu, eserhalawumbeni elingepumalanga yakwaMowabi.

¹² Ukusuka lapho afuduka ayokuhloma emlanjaneni iZeredi.

¹³ Ukusuka lapho afuduka godu ayokuhloma ngale kwe-Arinoni, ngerhalawumbeni elinabela ngemkhawulweni wama-Amori. Kwakhona i-Arinoni le, isemkhawulweni hlangana neMowabi nendawo yama-Amori.

¹⁴ Kungalokho encwadini yezipi zakaSomnini kuthiwa: “ ... eWahebe eseSufa emilanjaneni ye-Arinoni

¹⁵ namadonga wemirhoba enabela ngebuhlalweni be-Ari, izeyame ngemikhawulo yakwaMowabi.”

¹⁶ Ukusuka lapho ama-Israyeli aragela phambili aya eBheri, ekumthombo lapha uSomnini akhuluma khona noMosi wathi: “Buthelela abantu ndawonye ukuze ngibaphe amanzi.”

¹⁷ Nje-ke ama-Israyeli avuma nasi ingoma: “Gobhoza mthombo! Vumani njalo

¹⁸ ngomthombo owenjiwe barholi, warhujwa ngitjho nangani makhosi wabantu ngentonga yombusi nangamadondolwawo.” Asuka erhalawumbenapho aya eMatana,

¹⁹ ukusuka eMatana aya eNarhaliyeli, eNarhaliyeli aya eBhamothi.

²⁰ Ukusuka eBhamothi kwayiwa emrhobeni ongesifundeni sakwaMowabi lapha esiqongweni sePisiga umuntu angabona khona iJetjhimoni.

Ama-Israyeli asahlela uSirhoni no-Ogi

²¹ Ama-Israyeli athumela iinthunywa kuSirhoni ikosi yama-Amori athi:

²² “Sivumela bonyana sidlule enarhenakho. Angeze satlaya emasimini namkha esidiribeni begodu asizukusela amanzi wemithombakho. Sizokukhamba endleleni ekhanjwa makhosi, size sidlule emkhawulwenakho.”

²³ Kodwana uSirhoni akhange avumele u-Israyeli bona adlule emkhawulwenakhe. Wahlanganisa loke ibutho lakhe waphuma bonyana asahlele u-Israyeli erhalawumbeni. Wafika eJahatsi walwa no-Israyeli.

²⁴ Ama-Israyeli alwa naye ngesabula amhlula abe athumba inarhakhe ukusukela emlanjeni i-Arinoni bekwaba semlanjeni iJabokhi. IJabokhi bekumkhawulo oqinisiweko wama-Amoni.

²⁵ Ama-Israyeli athatha woke amadorobho wakhona, ahlala ngemadorobheni wama-Amori, ngeRhetjhibhoni nemizanayo yoke.

²⁶ IRhetjhibhoni bekulidorobho lakaSirhoni ikosi yama-Amori. USirhoni lo, gade alwe nekosi yaphambilini yakwaMowabi bewayemuka inarhayo yoke bekube semlanjeni i-Arinoni.

²⁷ Ngikho nje iimbongi zithi: “Yizani eRhetjhibhoni ukuze lakhiwe, idorobho lakaSirhoni aliqiniswe.

²⁸ Phambilini kwaphuma umlilo eRhetjhibhoni, iye, amalangabi edorobheni lakaSirhoni. Aginya i-Ari kwaMowabi, nabanini beendunduma hlangana ne-Arinoni.

²⁹ Maye kuwe Mowabi! Niphelile nina balotjhi bakaKemotjhi! Wenze amadodanakhe aba bakhoseli, namadokazakhe aba bathunjwa bekosi yama-Amori, uSirhoni.

³⁰ Amasimabo atjhabalele ukusukela eRhetjhibhoni ukuya eDibhoni, begodu ukusukela eNatjhimu ukuya eNofarhi.” (INofarhi le iseduze neMedeba.)

³¹ Ngendlela leyo-ke ama-Israyeli ahlala enarheni yama-Amori.

³² UMosi wathumela bona kuyokuhlolwa iJazeri. Ama-Israyeli athumba imizanayo, aqotjha nama-Amori agade alapho.

³³ Nje-ke ama-Israyeli ajika akhuphuka ngendlela eya eBhatjhani. U-Ogi ikosi yakhona yaphuma nebutho layo loke bonyana ibasahlele ngepi e-Edreyi.

³⁴ Kodwana uSomnini uZimu wathi kuMosi: “Ungamesabi ngombana ngimnikele esandleni sakho, iye, yena nebutho lakhe kanye nenarhakhe. Uzakwenza kuye njengombana wenze kuSirhoni ikosi yama-Amori ebe yakhe eRhetjhibhoni.”

³⁵ Mbala ama-Israyeli abulala u-Ogi namadodanakhe kanye nabantu bakhe boke, kwangabi khona noyedwa wakhe osindako. Ngendlela leyo athumba inarhakhe.