UNUMERI 2 - IsiNdebele 2012 Translation

Ukuhlelwa kweenkoro

¹ USomnini wakhuluma noMosi no-Aroni wathi:

² “Lokha ama-Israyeli nakahloma amatendawo kufuze ahlome magegana netende lokuhlanganela kudanyana nalo. Omunye nomunye ahlome itende lakhe esibekisweni sekoro yekhabo ngokwetshwayo lomndeni waboyise.

³ “BakwaJuda kufuze bahlome amatendabo esibekisweni sabo ukuyela ngepumalanga. Umrholi wekoro yakwaJuda kube nguNarhitjhoni umsa ka-Aminadaba.

⁴ Abatlolisweko bebutho lakhe bazakuba ziinkulungwana ezimatjhumi alikhomba nane namakhulu asithandathu.

⁵ Bakwa-Isakari kufuze bahlome amatendabo ngehlangothini lakwaJuda. Umrholi wekoro leyo kube nguNataneli umsa kaTsuwari.

⁶ Abatlolisweko bebutho lakhe bazakuba ziinkulungwana ezimatjhumi amahlanu nane namakhulu amane.

⁷ BakwaZebuloni nabo bahlome khonapho. Umrholi wekoro leyo kube ngu-Eliyabu umsa kaRheloni.

⁸ Abatlolisweko bebutho lakhe bazakuba ziinkulungwana ezimatjhumi amahlanu nalikhomba namakhulu amane.

⁹ Isibalo soke samabutho ahlome noJuda sizakuba ziinkulungwana ezilikhulu namatjhumi abunane nasithandathu namakhulu amane wabatlolisweko. Ngibo abazakuphuma qangi.

¹⁰ “Isibekiso sakwaRubeni sizakuba ngesewula lapha bazakuhloma khona amatendabo. Umrholi wekoro leyo kube ngu-Elitsuri umsa kaTjhedewuri.

¹¹ Abatlolisweko bebutho lakhe bazakuba ziinkulungwana ezimatjhumi amane nasithandathu namakhulu amahlanu.

¹² BakwaSimiyoni kufuze bahlome amatendabo ngehlangothini lakwaRubeni. Umrholi wekoro leyo kube nguTjhelumiyeli umsa kaTsuritjhadayi.

¹³ Abatlolisweko bebutho lakhe bazakuba ziinkulungwana ezimatjhumi amahlanu nalithoba namakhulu amathathu.

¹⁴ BakwaGadi nabo bahlome khonapho. Umrholi wekoro leyo kube ngu-Eliyasafa umsa kaDewuyeli.

¹⁵ Abatlolisweko bebutho lakhe bazakuba ziinkulungwana ezimatjhumi amane nahlanu namakhulu asithandathu namatjhumi amahlanu.

¹⁶ Isibalo soke samabutho ahlome noRubeni sizakuba ziinkulungwana ezilikhulu namatjhumi amahlanu nanye namakhulu amane namatjhumi amahlanu. Ngibo abazakuphuma kwesibili.

¹⁷ “Ngemva kwalokho itende lokuhlanganela lizakuwiswa kanye nekampa yamaLevi ephakathi kweenkampa ezinye. Ama-Israyeli azakuwisa amatendawo ngendlela awahlome ngayo, ikoro ngekoro endawenayo njengokwesibekiso.

¹⁸ “Isibekiso sakwa-Efrayimu sizakuba ngetjingalanga lapha bazakuhloma khona amatendabo. Umrholi wekoro leyo kube ngu-Elitjhama umsa ka-Amihudi.

¹⁹ Abatlolisweko bebutho lakhe bazakuba ziinkulungwana ezimatjhumi amane namakhulu amahlanu.

²⁰ BakwaManase kufuze bahlome amatendabo ngehlangothini lakwa-Efrayimu. Umrholi wekoro leyo kube nguGamaliyeli umsa kaPedatsuri.

²¹ Abatlolisweko bebutho lakhe bazakuba ziinkulungwana ezimatjhumi amathathu nambili namakhulu amabili.

²² BakwaBhenjamini nabo bahlome khonapho. Umrholi wekoro leyo kube ngu-Abidani umsa kaGidiyoni.

²³ Abatlolisweko bebutho lakhe bazakuba ziinkulungwana ezimatjhumi amathathu nahlanu namakhulu amane.

²⁴ Isibalo soke samabutho ahlome no-Efrayimu sizakuba ziinkulungwana ezilikhulu nabunane nekhulu. Ngibo abazakuphuma kwesithathu.

²⁵ “Isibekiso sakwaDani sizakuba ngetlhagwini lapha bazakuhloma khona amatendabo. Umrholi wekoro leyo kube ngu-Arhiyezeri umsa ka-Amitjhadayi.

²⁶ Abatlolisweko bebutho lakhe bazakuba ziinkulungwana ezimatjhumi asithandathu nambili namakhulu alikhomba.

²⁷ Bakwa-Atjheri kufuze bahlome amatendabo ngehlangothini lakwaDani. Umrholi wekoro leyo kube nguPagiyiyeli umsa ka-Okirani.

²⁸ Abatlolisweko bebutho lakhe bazakuba ziinkulungwana ezimatjhumi amane nanye namakhulu amahlanu.

²⁹ BakwaNafitali nabo bahlome khonapho. Umrholi wekoro leyo kube ngu-Arhira umsa ka-Enani.

³⁰ Abatlolisweko bebutho lakhe bazakuba ziinkulungwana ezimatjhumi amahlanu nantathu namakhulu amane.

³¹ Isibalo soke samabutho ahlome noDani sizakuba ziinkulungwana ezilikhulu namatjhumi amahlanu nalikhomba namakhulu asithandathu. Ngibo abazakuphuma kokugcina ngaphasi kwesibekiso sabo.”

³² Lawo-ke ma-Israyeli atloliswa ngokuya ngokwezindlu zaboyise. Isibalo sawo woke atloliswako ngokwamabuthwawo saba ziinkulungwana ezimakhulu asithandathu nantathu namakhulu amahlanu namatjhumi amahlanu.

³³ Ikoro yakwaLevi yona akhange itloliswe neenkoro ezinye. Kwaba njengombana uSomnini bakayale uMosi.

³⁴ Ama-Israyeli enza koke uSomnini ebe ayale uMosi ngakho. Nje-ke ahloma amatendawo ngokweembekiso zawo begodu aphuma ngokwemindeni yaboyise nangokwezindlu zawo.