UNUMERI 19 - IsiNdebele 2012 Translation

Amanzi wokuhlambulula

¹ USomnini wakhuluma noMosi no-Aroni wathi:

² “Nasi isimiso somthetho uSomnini ayale ngaso: Tjelani ama-Israyeli bona anilethele ithokazi elibovu libe msulwa, lingabi nomphambo begodu libe ngelingazange khe libotjhelwe.

³ Alinikele u-Elazara umphristi bese likhutjhelwa ngaphandle kwekampa lihlatjelwe lapho phambi kwakhe.

⁴ Nje-ke u-Elazara umphristi uzakuthatha ezinye zeengazi zalo ngomuno, afafaze kalikhomba aqalise ngaphambi kwetende lokuhlanganela.

⁵ Ithokazelo lizakutjhiswa umphristi aliqalile. Kutjhiswe isikhumba, inyama, iingazi kanye nomswanalo.

⁶ Godu umphristi uzakuthatha isigojwana somsedari, ihlukuzo lehisophi nomtiya otlerebede, akuphosele emlilweni lapha kutjhiswa khona ithokazelo.

⁷ Umphristi loyo uzakuhlanza izambatho zakhe, adude nomzimba, emva kwalokho angabuyela ngekampeni, kodwana uzakuba ngosilapheleko bekuhlwe.

⁸ Naloyo otjhise ithokazi kufuze ahlanze izambatho zakhe adude nomzimba, naye uzakuba ngosilapheleko bekuhlwe.

⁹ Indoda ehlambulukileko izakuwola umlotha wethokazi bese iwubeka ngaphandle kwekampa endaweni ekhethekileko. Uzakulondwa lapho bona usetjenziswe emanzini wehlambululo yomkhambathi wama-Israyeli ukuze uhlanjululwe ezonweni.

¹⁰ Naloyo owola umlotha wethokazi kufuze ahlanze izambatho zakhe, abe ngosilapheleko bekuhlwe. Lokhu kuzakuba simiso sanini nanini kuma-Israyeli nesikhonzini esiphakathi kwawo.

¹¹ “Nanyana ngubani othinta isidumbu somunye nomunye umuntu, uzakuba ngosilapheleko amalanga alikhomba.

¹² Kufuze azihlambulule ngamanzi wehlambululo elangeni lesithathu nelekhomba, nje-ke uzakuba ngohlambulukileko. Kodwana nangabe akazihlambululi ngelanga lesithathu nelekhomba, angeze aba ngohlambulukileko.

¹³ Nanyana ngubani othinta isidumbu somuntu ohlongakeleko bese angazihlambululi, usilaphaza ithaberinakeli lakaSomnini. Onjalo akajutjwe ebantwini bakwa-Israyeli ngombana akakafafazwa ngamanzi wehlambululo. Yeke uzakuhlala angosilapheleko. Iye, usananyathelwe kusilaphala.

¹⁴ “Naku umthetho lokha umuntu nakahlongakalela ngetendeni lokuhlala: Woke umuntu ongena ngetendenelo namkha ongaphakathi kwalo uzakuba ngosilapheleko amalanga alikhomba.

¹⁵ Kanti-ke nesitja esingetendeni esingakavalwa sabotjhwa ngesisibekelo, sisilaphele.

¹⁶ “Nanyana ngubani osemmangweni othinta obulewe ngesabula, isidumbu somuntu ohlongakele ngemvelo, ithambo lomuntu namkha ithuna, uzakuba ngosilapheleko amalanga alikhomba.

¹⁷ “Mayelana nomuntu osilapheleko, kufuze kuthathwe emlotheni wethokazi egade litjhiselwe ihlambululo, uthelwe ngesitjeni esinamanzi agelezako.

¹⁸ Kuthi umuntu ohlambulukileko athathe ihlukuzo lehisophi alenye ngemanzinapho bese afafaze itendelo, ipahla yoke yetende nomuntu woke ogade alapho. Godu afafaze nomuntu okhe wathinta ithambo, isidumbu sobulewe ngesabula, isidumbu sozihlongakaleleko namkha ithuna.

¹⁹ Umuntu ohlambulukileko loyo uzakufafaza godu phezu kokusilapheleko elangeni lesithathu nelekhomba. Ngendlela leyo uzakuhlambulula umuntu loyo ngelanga lekhomba. Ohlanjululweko uzakuhlanza izambatho zakhe, adude nomzimba, kuthi nakuhlwako abe ngohlambulukileko.

²⁰ “Kodwana nangabe osilapheleko akazihlambululi, uzakujutjwa ehlanganweni ngombana usilaphaze indawo ecwengileko kaSomnini. Ngebanga lokobana akakafafazwa ngamanzi wehlambululo, ungosilapheleko.

²¹ Lokho kuzakuba simiso sanini nanini kuma-Israyeli. Umuntu ofafaza amanzi wokuhlambulula uzakuhlanza izambatho zakhe bese kuthi othinta amanzi wokuhlambulula abe ngosilapheleko bekuhlwe.

²² Nanyana yini ethintwa mumuntu ongakahlambuluki izakuba ngesilapheleko. Nothinta okusilapheleko uzakuba ngosilapheleko bekuhlwe.”