UNUMERI 17 - IsiNdebele 2012 Translation

Ukuhluma kwentonga ka-Aroni

¹ USomnini wakhuluma noMosi wathi:

² “Khuluma nama-Israyeli akunikele iintonga ezilitjhumi nambili, kube yintonga yinye ephuma kumrholi wekoro enye nenye. Utlole ibizo lomrholi phezu kwentongakhe.

³ Ibizo laka-Aroni litlolwe phezu kwentonga yekoro kaLevi. Kufuze kube nentonga yinye yehloko yekoro.

⁴ Beka iintongezo ngetendeni lokuhlanganela phambi komfaji wobufakazi, lapha vane ngihlangane nawe khona.

⁵ Intonga yomuntu engizakumkhetha izakuhluma. Ngalokho ngizakuqeda ukubelesela kokunghonghoyila kwama-Israyeli kini.”

⁶ UMosi wakhuluma nama-Israyeli, nje-ke omunye nomunye umrholi wamnikela intonga, zaba litjhumi nambili. Kwaba mrholi nomrholi intonga ngokuya ngokweenkoro zawo. Intonga ka-Aroni beyihlangana nazo.

⁷ Nje-ke uMosi wabeka iintonga phambi kwakaSomnini ngetendeni elinobufakazi.

⁸ Kwathi ngakusasa uMosi nakaya ngetendeni elinobufakazi, qala, intonga ka-Aroni ongowendlu kaLevi beyihlumile! Beyinamaqumbe, amakhwa nama-alimodi avuthiweko!

⁹ Nje-ke uMosi wakhupha zoke iintonga phambi kwakaSomnini waziletha kuma-Israyeli woke. Emva kokobana sele azibonile iintongezo, umrholi omunye nomunye wathatha yakhe.

¹⁰ Godu uSomnini wathi kuMosi: “Buyisela intonga ka-Aroni phambi komfaji wobufakazi bona ibe siyeleliso samahlubuka. Akuphele ukunghonghoyila kwabo kimi, nakungasinjalo bazakufa bokanyana nje.”

¹¹ Mbala uMosi wenza njengombana uSomnini amyalile.

¹² Ama-Israyeli athi kuMosi: “Qala siyafa, siphelile nasinje, iye siphele sokanyana nje.

¹³ Ngambala, omunye nomunye otjhidela ethaberinakelini lakaSomnini uzokufa! Alo, sifanele sife sokanyana nje?”