UNUMERI 16 - IsiNdebele 2012 Translation

Ukuhlubuka kwakaKhorarhi, uDatani no-Abiramu

¹ UKhorarhi umsa kaJitsihari omsa kaKhehathi umsa kaLevi kanye namaRubeni okunguDatani no-Abiramu amadodana ka-Eliyabu no-Oni umsa kaPelethi

² bavukela uMosi. Basekelwa madoda amakhulu amabili namatjhumi amahlanu wakwa-Israyeli. Lawo-ke bekubarholi bomkhambathi, abakhethwa ehlanganweni ekubabantu abanedumo.

³ Babuthana ndawonye bajamelana noMosi no-Aroni bathi kibo: “Kwanje khona, sekwanele! Boke abantu bomkhambathi, omunye nomunye wabo ungocwengileko begodu noZimu uphakathi kwabo. Alo, nina kubayini niziphakamisa ngaphezu kwehlangano kaSomnini na?”

⁴ Kuthe lokha uMosi nakezwa lokho, wahloma ihloko phasi,

⁵ wakhuluma noKhorarhi nejima lakhe wathi: “Kusasa ekuseni uSomnini uzozitjengisa bona ngubani ongowakhe nokobana ngubani ongocwengileko begodu uSomnini uzakwenza onjalo atjhidele kuye. Iye, loyo azamkhetha uzamenza atjhidele kuye.

⁶ Nje-ke wena Khorarhi nejima lakho yenzani lokhu: Thathani izitja zokutjhisela itjhwalo,

⁷ bese kuthi kusasa nokhele amalahle nithele itjhwalo phezu kwawo phambi kwakaSomnini. Nje-ke loyo uSomnini amkhethileko kuzakuba nguye ongocwengileko. Kwanje khona, nami senganele ngani madodana kaLevi!”

⁸ Godu uMosi wathi kuKhorarhi: “Lalelani la nina madodana kaLevi:

⁹ Kuyinto encani kini kobana uZimu wakwa-Israyeli anihlukanisele emkhambathini wakwa-Israyeli ukuze anitjhideze kuye bonyana nilotjhe ethaberinakelini lakaSomnini nokobana nijame esikhundleni somkhambathi beniwulotjhe na?

¹⁰ Njengombana anitjhideze hlanu kwakhe nje, nina nabafowenu boke bamaLevi, alo, nisafunana nobuphristi godu?

¹¹ Aninghonghoyili ku-Aroni! Eqinisweni wena nalo loke ijinyana lakhwelo niphambene noSomnini ngokukghuthana kwenu lapha!”

¹² Nje-ke uMosi wathumela bona kubizwe uDatani no-Abiramu amadodana ka-Eliyabu. Bona bathi: “Thina asizi lapho!

¹³ Akukaneli kuwe bona usenyule enarheni egeleza ibisi neliju bonyana uzosibulalela erhalawumbenapha, ubuye uzenze ikosana ngaphezu kwethu?

¹⁴ Ngaphezu kwalokho, akhange usilethe enarheni egeleza ibisi neliju begodu akhange bewusiphe ngitjho kungaba masimu namkha isidiribe bona kube lilifa lethu. Abantu abanjengathi nje ungababeka isandla ebusweni na? Thina asizi lapho!”

¹⁵ UMosi gade anyenye khulu; nje-ke wathi kuSomnini: “Somnini, ungawunaki umnikelwabo! Angikathathi ngitjho nodumbana kibo begodu akhange khe ngikhube noyedwa wabo.”

¹⁶ Waphendukela kuKhorarhi wathi: “Kusasa, ubekhona wena nejima lakhwelo loke phambi kwakaSomnini; iye, wena nalo kanye no-Aroni.

¹⁷ Omunye nomunye wenu akeze nesitja sakhe sokutjhisela itjhwalo, athele itjhwalo phezu kwaso asilethe phambi kwakaSomnini, okutjho izitja ezimakhulu amabili namatjhumi amahlanu. Nawe wena Khorarhi no-Aroni niphathe zenu izitja.”

¹⁸ Nje-ke omunye nomunye wazithathela isitja sakhe, wokhela amalahle wathela netjhwalo phezu kwawo, bajama emnyango wetende lokuhlanganela banoMosi no-Aroni.

¹⁹ Kuthe bona uKhorarhi abuthelele loke ijima lakhe elijamelene noMosi phambi komnyango wetende lokuhlanganela, kwabonakala iphazimulo kaSomnini emkhambathini woke.

²⁰ Nje-ke uSomnini wakhuluma noMosi no-Aroni wathi:

²¹ “Zahlukaniseni nejimelo ukuze ngiliqede kube kanye.”

²² Bona bahloma iinhloko phasi, bathi: “Maye Zimu! Wena Zimu wemiphefumulo yenyama yoke, kanti kuzakona umuntu munye bese ukhaliphela umkhambathi woke na?”

²³ USomnini wakhuluma noMosi wathi:

²⁴ “Khuluma nomkhambathi bonyana usuke magegana nalapha kuhlala khona uKhorarhi, uDatani no-Abiramu.”

²⁵ Nje-ke uMosi wasikima waya kuDatani no-Abiramu. Abaphathi bakwa-Israyeli bamlandela.

²⁶ Wakhuluma nomkhambathi wathi: “Ngiyanibawa, sukani ematendeni wamadoda akhohlakeleko lawo, ningathinti litho lawo ukuze ningathanyelwa ngebanga lazo zoke izono zawo.”

²⁷ Mbala umkhambathi wasuka magegana nalapha bekuhlala khona uKhorarhi, uDatani no-Abiramu. UDatani no-Abiramu baphuma bajama eminyangweni yamatendabo nabafazi babo, abantwana kanye namasanabo.

²⁸ UMosi wathi: “Ngalokhu nizakwazi bona uSomnini ungithumile bona ngenze woke umsebenzi lo, nokobana akuveli kimi.

²⁹ Nangabe abarhalaba bafa ukufa kwabantu boke, behlelwe ngokwehlela abantu boke, khona-ke uSomnini uzabe angakangithumi.

³⁰ Kodwana nangabe uSomnini wenza isiga esitjha, ihlabathi ivule umlomayo ibaginye kanye nakho koke okungekwabo, baye endaweni yabafileko basezwa. Nje-ke nizakwazi bona abarhalaba badelele uSomnini!”

³¹ Kuthe angakaginyi namezwi agade awakhuluma, ihlabathi abarhalabo ebegade bajame kiyo yahlukana phakathi,

³² iphasi lavula umlomalo labaginya nemizabo kanye nabo boke abantu bakaKhorarhi nepahlabo yoke.

³³ Ngendlela leyo behlela endaweni yabafileko nakho koke kwabo basezwa. Ihlabathi yabadibizesa, babhubha baphela ehlanganweni.

³⁴ Ama-Israyeli woke agade amagegana nabo abaleka nakezwa barhuwelela, adlumbana athi: “Baba-ke! Nathi iphaseli lizosiginya!”

³⁵ Kwehla umlilo uvela kuSomnini, waqothula amakhulu amabili namatjhumi amahlanu wabantu abagade banikela itjhwalo.

³⁶ Godu uSomnini wakhuluma noMosi wathi:

³⁷ “Tjela u-Elazara umsa ka-Aroni umphristi bona asuse izitja zokutjhisela itjhwalo emthuthwini bese ukghuthulela amalahle wakhona kude le ngombana amalahle lawo acwengile.

³⁸ Izoni lezo zife ngebanga lokobana bezinikela itjhwalo ngezitjezo. Nje-ke izitjezo zibe ngezicwengileko ngokulethwa kwazo phambi kwakaSomnini. Yeke zikhandeni zibe sipara nizinamathisele e-aldarini. Ngendlela leyo zizakuba siyeleliso kuma-Israyeli.”

³⁹ Nje-ke u-Elazara umphristi wathatha izitja zokutjhisela itjhwalo zekoporo egade zisetjenziswa ngabatjhisiweko, zakhandwa zaba sipara bona zinamathiselwe e-aldarini.

⁴⁰ Zaba siyeleliso kuma-Israyeli bonyana kungabi khona noyedwa ongasuye umphristi nongasiso isizukulwana saka-Aroni ozakutjhidela phambi kwakaSomnini batjho utjhisa itjhwalo. Nakungasinjalo uzakufana noKhorarhi nejima lakhe. Kwaba njengombana uSomnini ayala u-Elazara ngoMosi.

⁴¹ Ngakusasa kwamhlokho umkhambathi woke wama-Israyeli wanghonghoyila ngoMosi no-Aroni wathi kibo: “Nina, nibulele abantu bakaSomnini!”

⁴² Kwathi lokha umkhambathi lowo nawukghuthanako bona ujamelane noMosi no-Aroni, wajika etendeni lokuhlanganela; qala nanto ilifu lembatha itende, kwabonakala iphazimulo kaSomnini.

⁴³ Nje-ke uMosi no-Aroni batjhidela phambi kwetende lokuhlanganela;

⁴⁴ uSomnini wakhuluma noMosi wathi:

⁴⁵ “Tjhidani hlangana nomkhambathi lowo ukuze ngiwuqede kube kanye.” Bobabili bahloma iinhloko phasi.

⁴⁶ UMosi wathi ku-Aroni: “Thatha isitja sakho sokutjhisela itjhwalo bese wokhela amalahle e-aldarini ngakiso, uthele itjhwalo phezu kwawo, usithathe masinyana uye naso emkhambathini uwenzele itethelelo ngombana ilaka lakaSomnini liyavutha begodu sekusunguleke nesifo.”

⁴⁷ Nje-ke u-Aroni wathatha isitja sakhe njengombana uMosi atjhwile, wagijimela phakathi kwehlangano lapha isifo besele sisunguleke khona. Wathela itjhwalo phezu kwamalahle bona enzele abantu itethelelo.

⁴⁸ Wajama phakathi kwabasaphilako nesele bafile, isifo saphela.

⁴⁹ Labo ebe basele babulewe sisifo bebaziinkulungwana ezilitjhumi nane namakhulu alikhomba, ngaphandle kwalabo abafa ngesigemegeme sakaKhorarhi.

⁵⁰ U-Aroni wabuyela kuMosi emnyango wetende lokuhlanganela emva kokuphela kwesifo.