UNUMERI 15 - IsiNdebele 2012 Translation

Imihlabelo yokutjhiswa neyetjhebiswano neminikelo yakhona

¹ USomnini wakhuluma noMosi wathi

² akakhulume nama-Israyeli athi kiwo: “Lokha naningena enarheni enizokuhlala kiyo, ekuyinarha enginipha yona,

³ begodu naninikela umhlabelo wokutjhiswa namkha umhlabelo wetjhebiswano njengomnikelo okhethekileko kuSomnini emhlambini weenkomo, wezimvu noweembuzi kobana nizalise isifungo namkha ukunikelela isihle nanyana lokha nanineminyanya, kufuze niwulethe bonyana ube ngowamukelekako kuSomnini.

⁴ Umuntu oletha umnikelwakhe kuSomnini kufuze angezelele ngomnikelo weenthoro ekulithungana leflowuru esefiweko, edutjwe ngelitha nesiquntu samafutha we-oliva

⁵ kanye nelitha nesiquntu sewayini njengomnikelo wokuselwako. Lokho akunikelako akukhambisane nenye nenye imvana ehlatjwa njengomhlabelo wokutjhiswa namkha wetjhebiswano.

⁶ Lokha nawunikela iqama ungezelele ngomnikelo weenthoro, ekumathungana amabili weflowuru esefiweko edutjwe namalitha amabili wamafutha we-oliva

⁷ kanye namalitha amabili wewayini njengomnikelo wokuselwako, kube mnikelo owamukelekako kuSomnini.

⁸ Lokha nawunikela ikunzana njengomhlabelo wokutjhiswa namkha wetjhebiswano kobana uzalise isifungo kuSomnini

⁹ kufuze ungezelele emhlabelweni lowo ngomnikelo weenthoro ekumathungana amane weflowuru esefiweko, edutjwe ngamalitha amane wamafutha we-oliva

¹⁰ kanye namalitha amane wewayini njengomnikelo wokuselwako kube mnikelo okhethekileko, owamukelekako kuSomnini.

¹¹ Kuzakwenziwa njalo-ke ngenye nenye ikunzana, iqama, iqamanyana nepongwana.

¹² Ngokuya ngobungako bomhlabelo onikelwako, ungezeleleni ngeminikelo ekhambisana nawo.

¹³ “Boke abantu bendabuko bazakwenza lokho ngendlela leyo lokha nabanikela umnikelo okhethekileko, owamukelekako kuSomnini.

¹⁴ Isikhonzi esikhonze phakathi kwenu namkha esihlala nani kufuze naso sinikele njengani lokha nasifuna ukunikela umnikelwaso okhethekileko, owamukelekako kuSomnini.

¹⁵ Lokha nanihlanganako phambi kwakaSomnini, kuzakuba nesimiso sinye ekungesenu nesesikhonzi esiphakathi kwenu. Lokho kufuze kube simiso sanini nanini eenzukulwaneni zenu: Njengombana kunjalo kini, kuzakuba njalo nesikhonzini.

¹⁶ Kuzakuba mthetho munye nomyalo munye kini nesikhonzini esiphakathi kwenu.”

Isibiko sehlama yokuthoma

¹⁷ USomnini wakhuluma noMosi wathi

¹⁸ akakhulume nama-Israyeli athi kiwo: “Lokha naningena enarheni enginisa kiyo,

¹⁹ nalokha nanidla isikwa sakhona, akube nesibiko kuSomnini.

²⁰ Ehlamenenu yokuthoma nikelani isikwa esimasongo, kube sibiko kuSomnini njengombana ninikela isibiko esiphuma eselelweni.

²¹ Iye, iinzukulwana ngeenzukulwana nizakunikela umnikelo onjalo kuSomnini, uphume ehlamenenu yokuthoma.”

Imihlabelo yesono esenziwa ngokungakahlosi

²² Godu uSomnini wathi: “Kungenzeka bonyana none ngokungakahlosi ngokungenzi nanyana ngimiphi yemiyalo mina Somnini engiyikhulume ngawe wena Mosi,

²³ okutjho koke engayala ngakho kusukela mhlana nginikela imiyalo eenzukulwaneni ngeenzukulwana ukuya phambili.

²⁴ Nakube kwenzeke ngokungakahloswa nomkhambathi ungazi, nje-ke woke umkhambathi lowo uzakunikela ngekunzana yinye ibe mhlabelo wokutjhiswa kube mnikelo okhethekileko, owamukelekako kuSomnini, okhambisana nomnikelo weenthoro zawo newokuselwako ukuya ngomyalo. Godu kunikelwe nepongo yinye ibe ngeyomhlabelo wehlambululo.

²⁵ Nje-ke umphristi uzakwenzela umkhambathi woke wama-Israyeli itethelelo. Ngalokho-ke umkhambathi uzakuhlambuluka esonweni sawo ngombana wone ngokungakahlosi nokobana ulethe nomnikelo okhethekileko kuSomnini kanye nomhlabelo wehlambululo ngokona kwawo ungakahlosi.

²⁶ Woke umkhambathi wama-Israyeli uzakuhlambuluka kanye nesikhonzi esiphakathi kwawo ngombana woke umuntu gade athinteke ngokona angakahlosi.

²⁷ “Nangabe kona umuntu munye ngokungakahlosi, uzakunikela imbuzi esikazi enomnyaka munye kube mhlabelo wehlambululo.

²⁸ Umphristi uzakwenzela umuntu loyo itethelelo phambi kwakaSomnini mayelana nesono asenze angakahlosi. Iye, ngokumenzela itethelelo, uzakucolelwa.

²⁹ Kuzakuba nomthetho munye kiloyo owona angakahlosi, kungaba mumuntu wendabuko kwa-Israyeli namkha osikhonzi.

³⁰ Kodwana umuntu owona ngamabomu, kungaba ngowendabuko namkha osikhonzi, udelela uSomnini. Umuntu onjalo akajutjwe ebantwini bekhabo

³¹ ngombana anyaze ilizwi lakaSomnini begodu wephula nomyalwakhe. Iye, umuntu loyo uzakujutjwa nya ebantwini bekhabo, athwale isono sakhe.”

Isibetho sokuphula umthetho weSabatha

³² Kwathi lokha ama-Israyeli nakaserhalawumbeni, kwafunyaneka indoda itheza iinkuni ngeSabatha.

³³ Labo abayifunyanako, bayiletha kuMosi no-Aroni nakiwo woke umkhambathi.

³⁴ Bavalela indoda leyo ngesikhungweni ngombana bekungakazeki bona kufuze kwenziweni ngayo.

³⁵ USomnini wathi kuMosi: “Indoda leyo ayibulawe nokubulawa. Umkhambathi woke uyikhande ngamatje ngaphandle kwekampa.”

³⁶ Mbala umkhambathi woke wathatha indoda leyo wayikhuphela ngaphandle kwekampa, wafese wayikhanda ngamatje bonyana ifele lapho. Kwaba njengombana uSomnini ayala uMosi.

³⁷ Emva kwalokho uSomnini wakhuluma noMosi wathi:

³⁸ “Tjela ama-Israyeli bona wona neenzukulwana zawo azenzele amatjharhatjharha emiphethweni yezambatho zawo lapha kuzakuthungelelwa khona imicwana elihlaza komkayi.

³⁹ Kuzakuthi nanibona amatjharhatjharha lawo, nikhumbule ukwenza imiyalo kaSomnini ukuze ningabi ngabangakathembeki ngokulandela iinkanuko zeenhliziyo zenu nezamehlwenu.

⁴⁰ Nizakukhumbula benenze yoke imiyalwami ukuze nibe ngabacwengileko kuZimenu.

⁴¹ NginguSomnini uZimenu owanenyula enarheni yeGibhide bona ngibe nguZimu kini. NginguSomnini uZimenu.”