UNUMERI 14 - IsiNdebele 2012 Translation

Ukuhlubuka kwabantu

¹ Umkhambathi woke wapongoloza, iye, abantu barhahlawula ngobusukobo.

² Woke ama-Israyeli anghonghoyila kuMosi no-Aroni. Umkhambathi woke wathi kibo: “Ibe thana sase safela enarheni yeGibhide leya namkha ngathana sesafela erhalawumbenapha.

³ Kubayini uSomnini asilethe enarheni le bona sibulawe ngesabula na? Abomkethu nabantwabethu bazakuba yipango. Akusingcono sizibuyelele eGibhide na?”

⁴ Wakhulumisana wodwa wathi: “Asizikhetheleni induna, sibuyele eGibhide.”

⁵ Nje-ke uMosi no-Aroni bawa ngobuso ngaphambi kwayo yoke ihlangano yakwa-Israyeli.

⁶ UJotjhuwa umsa kaNuni noKalebi umsa kaJefune, ebegade kungabanye ebe baphakathi kweenhloli zenarha, badabula izambatho zabo,

⁷ bakhuluma nomkhambathi woke wama-Israyeli bathi: “Niyazi, inarha esakhamba sayoyihlola, kuyinarha ehle kwamambala.

⁸ Nakukuhle emehlweni kaSomnini ngathi, uzosifikisa enarheni leyo abe asiphe yona. Iye, kuyinarha egeleza ibisi neliju.

⁹ Into nje masani ukuhlubuka uSomnini begodu ningabesabi abantu benarha leyo ngombana bakukudla kwethu. Ukuvikeleka kwabo kususiwe kibo begodu uSomnini ujame nathi; nje-ke ningabesabi.”

¹⁰ Kodwana umkhambathi wakhulumisana bona ubakhande ngamatje. Nje-ke iphazimulo kaSomnini yabonakala etendeni lokuhlanganela kiwo woke ama-Israyeli.

¹¹ USomnini wakhuluma noMosi wathi: “Kuzabe kube nini abantwaba bangidelela na? Begodu kuzabe kube nini bangakholwa kimi ngaphezu kwazo zoke iimbonakaliso engiziveze phakathi kwabo na?

¹² Ngiyakutjela yi, ngizobamadlha ngamahlungu bengibamuke ilifa labo. Kodwana nakunguwe ngizokwenza ube sisizwe esikhulu nesinamandla, undlondlobale kunabo.”

¹³ UMosi wathi kuSomnini: “AmaGibhide owenyula kiwo abantwaba ngamandlakho azokwizwa lokho

¹⁴ bese atjela abantu benarha le iindabezo. Bona sebezwile bonyana wena Somnini uphakathi kwabantu bakho, nokobana ubonakele kibo ubuso nobuso, nelifu lakho lihlala lijame ngehla kwabo begodu ukhamba phambi kwabo ngesika yelifelo emini kuthi ebusuku ube yisika yomlilo.

¹⁵ Nje-ke nawubulala abantwaba kube kanye, izizwe ezizwe ngedumo lakho zizokuthi,

¹⁶ ‘Ngebanga lokobana uSomnini uhlulekile ukufikisa abantwaba enarheni abafungela yona, yeke ubabulalele erhalawumbeni.’

¹⁷ Nje-ke ngiyancenga, kwanga uSomandla angabonakalisa amandlakhe njengokutjho kwakhe nasithi,

¹⁸ ‘USomnini ubuthaka ekusilingekeni, uzele ukwethembeka, ulibalela imilandu nemitjhapho, kodwana akazumlisa onomlandu. Wehlisela isibetho sezono zaboyise phezu kwabantwababo besizukulwana sesithathu nesesine.’

¹⁹ Ngiyabawa Somnini, ngebanga lokwethembeka kwakho okukhulu, colela ubukhohlakali babantwaba, kube njengombana wabacolela kusukela eGibhide bekube lapha.”

²⁰ USomnini waphendula uMosi wathi: “Awa, ngamezwakho lawo, ngibacolele.

²¹ Kodwana wazi-ke, ngifunga ngepilwami nephazimulwami ezele iphasi loke ngithi:

²² Woke amadoda abone iphazimulwami neembonakaliso zami engazenza eGibhide nerhalawumbeni, kwathi kunjalo angilinga kalitjhumi ngokungalaleli ilizwi lami,

²³ angekhe ayibona inarha engayifungela aboyise. Iye, akakho namunye wabangidelelako ozayibona inarha leyo.

²⁴ Kodwana ngebanga lokobana incekwami uKalebi inommoya owehlukileko nokobana ingilandele ngokupheleleko, ngizayingenisa enarheni eye kiyo yayoyihlola begodu izakuba lilifa leenzukulwana zayo.

²⁵ Nje-ke, njengombana ama-Amalekhi namaKanana ahlala ngemirhobeni yeentaba, jikani kusasa nitjhinge nca ngerhalawumbeni ngendlela elunge elwandle lomGaba.”

²⁶ USomnini wakhuluma noMosi no-Aroni wathi:

²⁷ “Kuzabe kube nini umkhambathi okhohlakeleko lo usoloko unginghonghoyilela? Yazini bona ngikuzwile ukungibalabalela kwama-Israyeli anghonghoyilako lawo.

²⁸ Atjeleni bona uSomnini uthi, ‘Ngifunga ngepilwami, lokho engikwizwe nikukhuluma, ngizokwenza kini:

²⁹ Iindumbu zenu zizokurabhalaliswa erhalawumbenapha. Noke enitlolisweko ukusukela kwabaneminyaka ematjhumi amabili ukuya phezulu eninghonghoyile ngami,

³⁰ angeze nangena enarheni engafunga bona nizakuhlala kiyo, ngaphandle kwakaKalebi umsa kaJefune noJotjhuwa umsa kaNuni.

³¹ Kodwana iinzukulwana zenu enikhulume ngazo nathi zizokuba yipango, ngizozingenisa begodu zizayifunda inarha enayinyefulako nina.

³² Kodwana nakungini, iindumbu zenu zizokurabhalala erhalawumbenapha.

³³ Abantwabenu bazakuba belusi erhalawumbeni iminyaka ematjhumi amane, bahlupheke ngebanga lokungathembeki kwenu bekube kulapha iindumbu zenu zibolela khona erhalawumbeni.

³⁴ Isibalo samalanga amatjhumi amane enahlola ngawo inarha, sizakuba minyaka ematjhumi amane nisoloko nihlunguphazelwa izono zenu. Ilanga linye libe mnyaka. Nje-ke nizakwazi bona kunjani nanginifulathelako.

³⁵ Ngikhulumile mina Somnini, ngiyafunga ngithi kwamambala ngizokwenza koke lokho emkhambathini okhohlakeleko nobuthene bona ujamelane nami lo. Kilo lona leli irhalawumba, kulapha uzakuphelela khona, iye, uzokufa nya.’ ”

³⁶ (Amadoda agade athunywe nguMosi bona ayokuhlola inarha, abuya enza bona woke umkhambathi unghonghoyile ngokujamelana naye ngokuletha umbiko omumbi ngenarha.

³⁷ Ngemva kwesikhathi amadoda lawo abhubha phambi kwakaSomnini ngesifo. Lokho kwenzeka njalo ngombana aletha umbiko omumbi ngenarha.

³⁸ Kodwana uJotjhuwa umsa kaNuni noKalebi umsa kaJefune baba ngabasindileko kilabo abayokuhlola inarha.)

³⁹ Kuthe lokha uMosi nakabikela ama-Israyeli umbiko lowo, abantu balila khulu.

⁴⁰ Bavuka ekuseni kobana banyukele esiqongolweni seentaba bathi: “Sonile, kodwana qalani sesilungele ukuya enarheni uSomnini akhuluma ngayo.”

⁴¹ UMosi wathi: “Niweqelani umyalo wakaSomnini na? Anizukuphumelela.

⁴² Ningenyuki ngombana uSomnini akakho phakathi kwenu. Nakungasinjalo, nizakumadlhwa zizitha zenu

⁴³ ngombana nako ama-Amalekhi namaKanana phambi kwenu. Nizokubulawa yisabula ngokufulathela kwenu uSomnini. USomnini angeze abe ajame nani.”

⁴⁴ Kodwana banghakalala bakhuphukela esiqongolweni seentaba nanyana umfaji wesivumelwano sakaSomnini noMosi bebasese ngekampeni.

⁴⁵ Nje-ke ama-Amalekhi namaKanana ahlala ngeentabeni zenarha leyo ehla abamadlha abe abagijimisa bekwaba seRhorema.