UNUMERI 13 - IsiNdebele 2012 Translation

Ukuhlolwa kweKanana

¹ USomnini wakhuluma noMosi wathi:

² “Thumela amadoda bona ayokuhlola inarha yeKanana engiyinikele ama-Israyeli. Ekorweni ngayinye yaboyise nithumele umrholi oyedwa.”

³ Nje-ke uMosi wathuma amadoda lawo asuka erhalawumbeni leParana njengokomyalo kaSomnini. Boke bekumadoda aziinhloko zeenkoro zakwa-Israyeli.

⁴ Naka-ke amabizwawo: Ekorweni yakwaRubeni bekunguTjhamuwa umsa kaZakuru,

⁵ keyakwaSimiyoni kunguTjhafathi umsa kaRhori,

⁶ keyakwaJuda kunguKalebi umsa kaJefune,

⁷ keyakwa-Isakari kunguYigali umsa kaJosefa,

⁸ keyakwa-Efrayimu kunguHosiya umsa kaNuni,

⁹ keyakwaBhenjamini kunguPalithi umsa kaRafu,

¹⁰ keyakwaZebuloni kunguGadiyeli umsa kaSodi,

¹¹ keyakwaJosefa (okutjho ikoro yakwaManase) kunguGadi umsa kaSusi,

¹² keyakwaDani kungu-Amiyeli umsa kaGemali,

¹³ keyakwa-Atjheri kunguSeturi umsa kaMikayeli,

¹⁴ keyakwaNafitali kunguNarhibi umsa kaVofsi,

¹⁵ keyakwaGadi kunguGewuyeli umsa kaMaki.

¹⁶ Lawo-ke bekumabizo wamadoda uMosi awathuma bona ayokuhlola inarha. UMosi wathiya uHosiya umsa kaNuni bona nguJotjhuwa.

¹⁷ Lokha uMosi nakawathumako bona ayokuhlola inarha yeKanana, wathi kiwo: “Nqombani ngesewula yenarha, nenyukele entatjaneni yakhona,

¹⁸ niqale bona inarha injani, abantu abakhe kiyo baqinile namkha mitheretherana, banengi namkha lidlanzana,

¹⁹ nokobana inarha leyo yihle namkha yimbi, iindawo abahlala kizo zikhamukhamu namkha zimadorobho abiyelwe ngomthangala na.

²⁰ Niqale bona ihlabathi ivundile namkha ilibhudu nokobana inemithi namkha awa na. Qinani isibindi nibuye neenthelo zayo.” (Ngesikhatheso bekusikhathi sokuvuthwa kwamadiribe wokuthoma.)

²¹ Akhamba-ke ayokuhlola inarha leyo ukusukela erhalawumbeni leTsini ukufikela eRerhobho eduze neLebo-Rhamathi.

²² Akhuphukela ngesewula yenarha, afika eRhebroni lapha bekuneenzukulwana zaka-Anakhi, okungu-Arhimani, uTjhetjhayi noTalimayi. (IRhebroni beyakhiwe iminyaka elikhomba ngaphambi kokwakhiwa kweTsowani eGibhide.)

²³ Afika emrhobeni we-Etjhikolo afese aquntula lapho ipande enesitjhutha samadiribe. Amadoda amabili atjatha isitjhutheso ngesigodo saba phakathi kwawo. Godu bekathwele amarharinada namakhiwani.

²⁴ Indawo leyo yabizwa bona mrhoba we-Etjhikolo ngebanga lesitjhutha samadiribe esakhiwa madoda wama-Israyeli lapho.

²⁵ Abuya ekuhloleni inarha ekupheleni kwamalanga amatjhumi amane.

²⁶ Afika kuMosi no-Aroni kanye nemkhambathini woke wama-Israyeli eKhadetjhi eserhalawumbeni leParana. Abikela aboMosi nomkhambathi woke umbiko abuye nawo, abe abakhombisa neenthelo zenarha leyo.

²⁷ Atjela uMosi athi: “Kazi besafika-ke enarheni owasithuma kiyo. Kuyinarha egeleza ibisi neliju, neenthelo zakhona nanzi.

²⁸ Nokho abantu bakhona ziinkakaramba namadorobho wakhona anemithangala begodu aziinthabathaba. Phezu kwalokho sabona neenzukulwana zaka-Anakhi lapho.

²⁹ Ama-Amalekhi ahlala ngesewula yenarha. AmaRhithi, amaJebusi nama-Amori wona ahlala ngeentatjaneni zenarha leyo. Kuthi amaKanana ahlala eduze nelwandle namagegana neJordani.”

³⁰ UKalebi wathulisa amadoda lawo phambi kwakaMosi wathi: “Asikhuphukeni khona nje sithumbeni inarha ngombana vele singaphumelela ukukwenza lokho.”

³¹ Kodwana amadoda agade akhambe naye athi: “Awa, akukghonakali bona singajamelana nabantu labaya ngombana baziinkakaramba kunathi.”

³² Nje-ke aletha kuma-Israyeli umbiko omumbi ngenarha akhamba bona ayoyihlola athi: “Thina inarha esaya kiyo bona siyoyihlola, kuyinarha eginya abantu abahlala kiyo. Begodu boke abantu esibabone khona, kubabantu abaziinkakaramba.

³³ Godu sabona lapho neentsitsirimba, okutjho ama-Anakhi iinzukulwana zeentsitsirimba. Thina-ke sazibona sifana neentethe kizo; khisibe nazo vele zasibona sinjalo.”