UNUMERI 12 - IsiNdebele 2012 Translation

UMiriyamu no-Aroni bajamelana noMosi

¹ UMiriyamu no-Aroni bahleba uMosi ngebanga lokuthatha kwakhe umfazi omuKutjhe, bathi: “Kazi uthethe umKutjhe!”

² Godu bathi: “Ingabe mbala uSomnini ukhulume kwaphela ngoMosi? Kanti akakakhulumi nangathi godu na?” USomnini wakwizwa lokho.

³ NakunguMosi yena bekazithobe ukudlula boke abantu abaphila ngaphasi komthunzi welanga.

⁴ Khonapho uSomnini wakhuluma noMosi no-Aroni kanye noMiriyamu wathi: “Yeyi nina, ngobuthathu benu njalo, yizani etendeni lokuhlanganela!” Mbala baphuma beza bobathathu.

⁵ Nje-ke uSomnini wehla ngesika yelifu wajama emnyango wetende lokuhlanganela, wafese wabiza u-Aroni noMiriyamu. Batjhidela-ke bobabili.

⁶ USomnini wathi kibo: “Akhese nilalele la: Nakube kukhona umphorofidi hlangana nani, mina-ke Somnini ngizazazisa kuye ngombono, ngikhulume naye ngebhudango.

⁷ Nokho akusinjalo ngencekwami uMosi, yena ungothembekileko emsebenzinami woke.

⁸ Yena ngikhuluma naye bunqopha, ubuso nobuso ingasi ngekulumo yokugwagwanisa. Iye, yena uyakwazi ukuzibonakalisa kwami. Kubayini-ke nina ningakhange nesabe ukuhleba incekwami uMosi na?”

⁹ Ubukhali bakaSomnini bavutha phezu kwabo, wase uyabatjhiya.

¹⁰ Lithe lisuka nje ilifu phezu kwetende, qala, uMiriyamu gade sele akghamathele ikhwekhwe amhlophe njengesithwathwa. Uthe u-Aroni nakathi uphendukela kuye, madekhethu unekhwekhwe!

¹¹ Nje-ke wabikela uMosi wathi: “Maye, babethu! Bengithi akhe ngikhulume. Ngiyakubawa hle, ungasihlunguphazi ngobudlhayela esone ngabo.

¹² UMiriyamu akangabi njengobelethwa ahlongakele, ophuma esibelethweni sakanina sele onakele.”

¹³ Nje-ke uMosi walila kuSomnini wathi: “Zimu ngiyakuncenga, mphilise hle.”

¹⁴ USomnini waphendula uMosi wathi: “Nangabe gade akhafulelwe nguyise ebusweni, bekangazukuhlala amalanga alikhomba arhubutjhekile na? Yeke akavalelwe amalanga alikhomba ngaphandle kwekampa, kuthi emva kwalokho abuyiswe.”

¹⁵ Nje-ke uMiriyamu wavalelwa ngaphandle kwekampa amalanga alikhomba. Ngesikhatheso abantu akhange bathathe ikhambo, bekwabuyiswa uMiriyamu.

¹⁶ Emva kwalokho abantu bafuduka eRhatserothi bafese bahloma amatendabo erhalawumbeni leParana.