UNUMERI 11 - IsiNdebele 2012 Translation

Itukuthelo kaSomnini kuma-Israyeli nokusekela kwakhe uMosi

¹ Abantu bakwa-Israyeli bakhola uSomnini ngokumbalabalela ngobudisi abanabo. Kwathi lokha uSomnini nabezwako wavutha khulu ngelaka lakhe. Nje-ke kwaqubuka umlilo kaSomnini hlangana nabantwabo watjhisa amahlangothi wekampa.

² Abantu balila kuMosi, yena wabathandazela kuSomnini, umlilo wacima.

³ Bathiya indawo leyo ibizo bona yiTabhera ngombana kwavutha umlilo kaSomnini phakathi kwabo.

⁴ Phakathi kwama-Israyeli bekunecubevange yabantu egade imarhamaru ifuna ukutla. Kanti-ke nama-Israyeli athoma abubula godu athi: “Uyazi bona sikhanuka inyama kangangani!

⁵ Sese sikhumbula neenhlambi ebegade sizidlela zona eGibhide singazithengi, iinkomukomu, amakhabe, imihlobohlobo yama-eyi namakonofula.

⁶ Kodwana kwanjesi khona imiphimbo le sese yome kere, akunanja ngaphandle kwemana esikholileko le.”

⁷ (Imana beyinjengembewu yekhoriyanda, ifana noburegu obunuka kamnandi.

⁸ Abantu bebakhambakhamba bayibuthe bese bayayisila ngelitje lokugaya namkha ngesigigo. Gade bayipheka ngembiza namkha bayenze iimphaphatha. Yona beyizwakala inga litjhatjhatjha elenziwe ngamafutha we-oliva.

⁹ Imana beyikhithika ekampeni lokha nakukhithika umbethe ebusuku.)

¹⁰ UMosi wezwa ukulila kwabantu kiyo yoke imindenabo kungiloyo naloyo ngaphambi komnyango wetende lakhe. USomnini naye wabhoka khulu ngelaka lakhe. Lokho kwamkhathaza khulu uMosi.

¹¹ Nje-ke wabuza uSomnini wathi: “Kubayini uSomnini aphathe incekwakhe ngesihluku esingaka? Somnini awusangithandi na, kobana ungabeze uthwese umthwalo wabantwaba phezu kwami?

¹² Akhange ngizithwale ngabantwaba begodu ababelethwa ngimi. USomnini utjho njani nakathi ngigone boke abantwaba esifubeni sami njengomdlezana omunyisa umntwana? Alo, kufuze ngibabhebhule ngibase enarheni uSomnini ayithembisa aboyise na?

¹³ Ngizoyifunyanaphi inyama yabantwaba boke nje? Angithi balilela mina bathi, ‘Sipha inyama sidle.’

¹⁴ Awa mina, angizukukghona ukuthwala boke abantwaba ngingedwa. Umthwalo lowo ubudisi khulu kimi!

¹⁵ Nakube mbala Somnini uzongiphatha bunje, dumbana ungibulale nya. Nangabe uSomnini uyangithanda, akenze ngingasabona amatlhuwami la.”

¹⁶ Nje-ke uSomnini wakhuluma noMosi wathi: “Yewungihlanganisele amadoda amatjhumi alikhomba ebaphathini bakwa-Israyeli owaziko bona babaphathi abakwazi ukwengamela abantu. Atjhideze etendeni lokuhlanganela bese ajame nawe lapho.

¹⁷ Mina-ke ngizakwehla ngikhulume nawe lapho. Begodu ngizakuthatha ingcenye yommoya ophezu kwakho ngiyithele kiwo. Wona-ke, azakuthwalisa umthwalo wabantwaba ukuze ungasawuthwali uwedwa.

¹⁸ Bese utjela abantu uthi, ‘Zihlambululeni ngombana kusasa nizokudla inyama. Angithi nililile nakhola uSomnini ngokuthi ngubani ozanipha inyama, godu nathi eGibhide bekungcono, angitjho? Nje-ke uSomnini uzonipha inyamenu leyo bona nidle.

¹⁹ Anikazuyidla ilanga elilodwa, amabili, amahlanu, alitjhumi namkha amatjhumi amabili,

²⁰ kodwana inyanga yoke, ize ininukele beyinigonyulukise ngombana nidele uSomnini ophakathi kwenu ngokubuza bona kubayini naphuma enarheni yeGibhide.’ ”

²¹ UMosi waphendula uSomnini wathi: “Qala, abantu engikhamba phakathi kwabo baziinkulungwana ezimakhulu asithandathu, kodwana khonapho uSomnini uthi uzabapha inyama abazayidla inyanga yoke!

²² Imihlambi yezimvu neembuzi kanye neenkomo ezizakuhlatjwa zingabanela na? Namkha kuzakubuthelelwa zoke iinhlambi zelwandle bona zibanele?”

²³ USomnini wathi kuMosi: “Kanti uSomnini unesandla esifitjhani na? Manje uzokubona-ke bona ilizwi lami liyafezeka namkha awa.”

²⁴ Ngalokho uMosi waphuma wafese watjela abantu amezwi kaSomnini. Begodu wahlanganisa amadoda amatjhumi alikhomba ekubaphathi babantu wawajamisa etendeni mazombe.

²⁵ Nje-ke uSomnini wehla ngelifu wakhuluma naye, wathatha nengcenye yommoyakhe wawuthela ebaphathini abamatjhumi alikhomba. Kuthe lokha ummoya wehlela phezu kwabo baphorofida. Ngemva kwalokho akhange asaphorofida.

²⁶ Ngekampeni bekusele amanye amadoda amabili u-Elidada noMedada egade asesibalweni sabamatjhumi alikhomba. Wona akhange aphumelele ukuya etendeni. Amadoda lawo ehlelwa mumoya, nawo abe aphorofida khona ngekampenapho.

²⁷ Isokana elithileko lagijima lafese labikela uMosi lathi: “Kazi ngekampenaphaya, u-Elidada noMedada bayaphorofida!”

²⁸ UJotjhuwa umsa kaNuni noyinceku kaMosi ukusukela ebutjheni bakhe, gade angomunye wamadoda akhethiweko, wathi kuMosi: “Kosami, Mosi, bathulise!”

²⁹ Kodwana uMosi wathi kuye: “Kanti awufuni ngami na? Mina bengingafisa ngathana boke abantu bakaSomnini bekungaba baphorofidi, nokobana sengasuthi uSomnini bakangathela ummoya ovela kuye phezu kwabo.”

³⁰ Nje-ke uMosi nabaphathi bakwa-Israyeli babuyela ngekampeni.

USomnini wathumela iinkwali

³¹ USomnini wavusa ummoya ovela elwandle waphaphisela iinkwali ekampeni, zaphuphuruza pheze ngemitha ukuphakama. Zazigcwele ikampa yoke begodu kulikhambo lelanga mahlangothi woke ukuzibamba.

³² Mhlokho abantu baphuma imini yoke nobusuku bakhona kanye nelanga elilandelako bona bayokubutha iinkwalezo. Owabutha kancani ngogade abuthe amaqubi alitjhumi. Nje-ke baneka iinkwalezo magegana nekampa.

³³ Kuthe inyama yeenkwalezo isese semazinyweni, ingakahlafunywa, ubukhali bakaSomnini bavutha phezu kwabantu. Khonapho uSomnini wamadlha abantu ngehlupheko ekulu.

³⁴ Ngebangelo indawo leyo yathiywa bona yiKhibrothi-Hatava, ngombana lapho kwangcwatjwa abantu ebe bamarhamaru.

³⁵ Ukusuka eKhibrothi-Hatava ama-Israyeli afudukela eRhatserothi, afese ahlala khona.