UNUMERI 10 - IsiNdebele 2012 Translation

Ukuliliswa kweemporompita zesiliva

¹ USomnini wakhuluma noMosi wathi:

² “Yenza iimporompita ezimbili ezikhandwe ngesiliva. Zona zizakuba libika lokubiza umkhambathi nokufudusa ikampa.

³ Kuzakuthi lokha nazililiswa zombili, umkhambathi woke ubuthane phambi kwakho emnyango wetende lokuhlanganela.

⁴ Kodwana lokha nakuliliswa yinye, kuzakubuthana phambi kwakho abarholi abaziinhloko zeenkoro zakwa-Israyeli kwaphela.

⁵ Lokha iporompita nayipopozako, akufuduswe iinkampa ezingepumalanga.

⁶ Kuthi lokha nayipopoza ihlandla lesibili, kufuduswe iinkampa ezingesewula. Ukupopoza kuzakuba liphawu lokufuduka.

⁷ Kodwana nakufuze ihlangano ibuthane, kuzakuliliswa iporompita, nokho ingaliliswa ngokupopoziswa.

⁸ “Ekufuze bavuthele iimporompita baphristi okumadodana ka-Aroni. Lowo kuzakuba myalo wanini nanini kini ngitjho neenzukulwaneni zenu.

⁹ Lokha naniphuma ipi bona nilwe nabajamelani benu enarhenenu, popozisani iimporompita. Nanenza njalo nizakukhumbuleka phambi kwakaSomnini uZimenu, nje-ke nizakusindiswa ezitheni zenu.

¹⁰ Kanti-ke godu ngeenkhathi zokujabula kwenu, iminyanyenu ejanyisiweko nekuthwaseni kwenyanga, vuthelani iimporompita lokha naninikela imihlabelwenu yokutjhiswa neyetjhebiswano. Lokho kuzanenza nikhumbuleke phambi kwakaZimenu. NginguSomnini uZimenu.”

Ama-Israyeli afuduka erhalawumbeni leSinayi

¹¹ Ngomnyaka wesibili, lokha inyanga yesibili nayinamalanga amatjhumi amabili, ilifu lakhutjhulwa ethaberinakelini lobufakazi.

¹² Ama-Israyeli afuduka erhalawumbeni leSinayi ngeengaba zawo. Ilifu lakhamba belayokujama erhalawumbeni leParana.

¹³ Kwaba ngekokuthoma ama-Israyeli afuduka ngomyalo kaSomnini ngoMosi.

¹⁴ Isibekiso seenkampa zabakwaJuda saba ngesokuthoma ukufuduka ngokwamabuthwaso. Induna yebutho lakwaJuda bekunguNarhitjhoni umsa ka-Aminadaba,

¹⁵ yakwa-Isakari kunguNataneli umsa kaTsuwari,

¹⁶ yakwaZebuloni kungu-Eliyabu umsa kaRheloni.

¹⁷ Bekuthi lokha ithaberinakeli nalehliswako, amaGeritjhoni namaMerari okungiwo alithwalako, afuduke.

¹⁸ Isibekiso seenkampa zabakwaRubeni saba ngesesibili ukufuduka ngokwamabuthwaso. Induna yebutho lakwaRubeni bekungu-Elitsuri umsa kaTjhedewuri,

¹⁹ yakwaSimiyoni kunguTjhelumiyeli umsa kaTsuritjhadayi,

²⁰ yakwaGadi kungu-Eliyasafa umsa kaDewuyeli.

²¹ Emva kwalokho kwalandela amaKhehathi athwele ipahla ecwengileko yethaberinakeli. Itende lokuhlanganela lalifanele lijanyiswe endaweni lapha kwakuzokuhlonywa khona amatende ngaphambi kokobana amaKhehathi afike nepahla leyo.

²² Nje-ke isibekiso seenkampa zabakwa-Efrayimu safuduka ngokwamabuthwaso. Induna yebutho lakwa-Efrayimu bekungu-Elitjhama umsa ka-Amihudi,

²³ yakwaManase kunguGamaliyeli umsa kaPedatsuri,

²⁴ yakwaBhenjamini kungu-Abidani umsa kaGidiyoni.

²⁵ Isibekiso seenkampa zabakwaDani saba ngesokugcina ukufuduka ngokwamabuthwaso. Induna yebutho lakwaDani bekungu-Arhiyezeri umsa ka-Amitjhadayi,

²⁶ yakwa-Atjheri kunguPagiyiyeli umsa ka-Okirani,

²⁷ yakwaNafitali kungu-Arhira umsa ka-Enani.

²⁸ Lokho bekulihlelo lokufuduka kwamabutho wama-Israyeli; kuyindlela egade afuduka ngayo-ke leyo.

²⁹ Nje-ke uMosi wakhuluma noRhobabi umsa kaRewuyeli umkhwe wakhe, omuMidiyani, wathi: “Sifudukela endaweni uSomnini athi uzasinikela yona. Yeke, namba nathi, sizokunanageja ngombana uSomnini ukhulume kuhle ngo-Israyeli.”

³⁰ Kodwana uRhobabi wathi: “Awa, angizukukhamba, sekunalokho ngizokubuyela enarheni yekhethu nebantwini bekhethu.”

³¹ Godu uMosi wathi: “Ungasitjhiyi Rhobabi, ngiyakuncenga. Angitjho nguwe owaziko bona kufuze sihlome njani amatendethu erhalawumbeni. Wena-ke uzokuba lilihlo lethu.

³² Yeke nawunamba nathi, sizokuhlomulisa kiyo yoke into ehle uSomnini azasenzela yona.”

³³ Nje-ke ama-Israyeli asuka entabeni kaSomnini, akhamba amalanga amathathu. Umfaji wesivumelwano sakaSomnini bewuphambi kwawo ekhambenelo; lapha bewujama khona, nama-Israyeli bekaphumula lapho.

³⁴ Bekuthi emini, ilifu lakaSomnini libe ngehla kwawo lokha nakafudukako endaweni ahlome kiyo.

³⁵ Lokha umfaji nawufudukako, uMosi gade aphele athi: “Sikima Somnini ukuze izitha zakho zihlakazeke nabakuzondako babaleke phambi kwakho!”

³⁶ Kuthi lokha nawubekwa phasi athi: “Somnini, buyela ku-Israyeli, iye, kumatjhumitjhumi weenkulungwana!”