UNUMERI 1 - IsiNdebele 2012 Translation

Ukutloliswa kwama-Israyeli nobujamo bamaLevi

¹ USomnini wakhuluma noMosi asetendeni lokuhlanganela erhalawumbeni leSinayi ngelanga lokuthoma enyangeni yesibili ngomnyaka wesibili, emva kokuphuma kwama-Israyeli enarheni yeGibhide wathi:

² “Balani umkhambathi woke wama-Israyeli ngokweenkoro, ngemindeni yaboyise, ngezindlu zabo, iye, boke abaduna, umuntu nomuntu

³ ukusukela kwabaneminyaka ematjhumi amabili ukuya phezulu. Boke kwa-Israyeli abasele balungele ukuya epini, batloliseni wena no-Aroni ngokwamabuthwabo.

⁴ Kufuze kube nendoda yinye eyihloko yomndeni kileyo naleyo koro ekumele inisize ukubala.

⁵ Naka-ke amabizo wamadoda ekufuze anisize: “KebakwaRubeni ngu-Elitsuri umsa kaTjhedewuri,

⁶ kwaSimiyoni nguTjhelumiyeli umsa kaTsuritjhadayi,

⁷ kwaJuda nguNarhitjhoni umsa ka-Aminadaba,

⁸ kwa-Isakari nguNataneli umsa kaTsuwari,

⁹ kwaZebuloni ngu-Eliyabu umsa kaRheloni,

¹⁰ emadodaneni kaJosefa: ku-Efrayimu ngu-Elitjhama umsa ka-Amihudi, kuManase kube nguGamaliyeli umsa kaPedatsuri,

¹¹ kwaBhenjamini ngu-Abidani umsa kaGidiyoni,

¹² kwaDani ngu-Arhiyezeri umsa ka-Amitjhadayi,

¹³ kwa-Atjheri nguPagiyiyeli umsa ka-Okirani,

¹⁴ kwaGadi ngu-Eliyasafa umsa kaDewuyeli,

¹⁵ kwaNafitali ngu-Arhira umsa ka-Enani.”

¹⁶ Labo-ke ngibo abakhethwa emkhambathini bona babe barholi beenkoro zaboyise, babekwa baba ziinhloko zamabutho wakwa-Israyeli.

¹⁷ UMosi no-Aroni babiza amadoda akhethiweko lawo,

¹⁸ kwabizwa nomkhambathi woke ngelanga lokuthoma lenyanga yesibili. Boke abaduna, umuntu nomuntu, ukusukela kwabaneminyaka ematjhumi amabili ukuya phezulu batloliswa ngokweenkoro, ngemindeni yaboyise nangokwezindlu zabo.

¹⁹ Kwaba njengombana uSomnini bekayale uMosi. Lokha natlolisa abantu erhalawumbeni leSinayi,

^20-21 iinzukulwana zakwaRubeni olizibulo laka-Israyeli beziziinkulungwana ezimatjhumi amane nesithandathu namakhulu amahlanu. Kwabalwa umuntu nomuntu ngokweenkoro, ngemindeni yaboyise nangokwezindlu zabo, boke abaduna abasele balungele ukuya epini, okutjho abaneminyaka ematjhumi amabili ukuya phezulu.

^22-23 Iinzukulwana zakwaSimiyoni beziziinkulungwana ezimatjhumi amahlanu nethoba namakhulu amathathu. Kwabalwa umuntu nomuntu ngokweenkoro, ngemindeni yaboyise nangokwezindlu zabo, boke abaduna abasele balungele ukuya epini, okutjho abaneminyaka ematjhumi amabili ukuya phezulu.

^24-25 Iinzukulwana zakwaGadi beziziinkulungwana ezimatjhumi amane nahlanu namakhulu asithandathu namatjhumi amahlanu. Kwabalwa ngokweenkoro, ngemindeni yaboyise nangokwezindlu zabo, boke abaduna abasele balungele ukuya epini, okutjho abaneminyaka ematjhumi amabili ukuya phezulu.

^26-27 Iinzukulwana zakwaJuda beziziinkulungwana ezimatjhumi alikhomba nane namakhulu asithandathu. Kwabalwa ngokweenkoro, ngemindeni yaboyise nangokwezindlu zabo, boke abaduna abasele balungele ukuya epini, okutjho abaneminyaka ematjhumi amabili ukuya phezulu.

^28-29 Iinzukulwana zakwa-Isakari beziziinkulungwana ezimatjhumi amahlanu nane namakhulu amane. Kwabalwa ngokweenkoro, ngemindeni yaboyise nangokwezindlu zabo, boke abaduna abasele balungele ukuya epini, okutjho abaneminyaka ematjhumi amabili ukuya phezulu.

^30-31 Iinzukulwana zakwaZebuloni beziziinkulungwana ezimatjhumi amahlanu nalikhomba namakhulu amane. Kwabalwa ngokweenkoro, ngemindeni yaboyise nangokwezindlu zabo, boke abaduna abasele balungele ukuya epini, okutjho abaneminyaka ematjhumi amabili ukuya phezulu.

^32-33 Iinzukulwana zakwaJosefa beziziinkoro ezimbili, okutjho u-Efrayimu noManase: Iinzukulwana zakwa-Efrayimu beziziinkulungwana ezimatjhumi amane namakhulu amahlanu. Kwabalwa ngokweenkoro, ngemindeni yaboyise nangokwezindlu zabo, boke abaduna abasele balungele ukuya epini, okutjho abaneminyaka ematjhumi amabili ukuya phezulu.

^34-35 Neenzukulwana zakwaManase beziziinkulungwana ezimatjhumi amathathu nambili namakhulu amabili. Kwabalwa ngokweenkoro, ngemindeni yaboyise nangokwezindlu zabo, boke abaduna abasele balungele ukuya epini, okutjho abaneminyaka ematjhumi amabili ukuya phezulu.

^36-37 Iinzukulwana zakwaBhenjamini beziziinkulungwana ezimatjhumi amathathu nahlanu namakhulu amane. Kwabalwa ngokweenkoro, ngemindeni yaboyise nangokwezindlu zabo, boke abaduna abasele balungele ukuya epini, okutjho abaneminyaka ematjhumi amabili ukuya phezulu.

^38-39 Iinzukulwana zakwaDani beziziinkulungwana ezimatjhumi asithandathu nambili namakhulu alikhomba. Kwabalwa ngokweenkoro, ngemindeni yaboyise nangokwezindlu zabo, boke abaduna abasele balungele ukuya epini, okutjho abaneminyaka ematjhumi amabili ukuya phezulu.

^40-41 Iinzukulwana zakwa-Atjheri beziziinkulungwana ezimatjhumi amane nanye namakhulu amahlanu. Kwabalwa ngokweenkoro, ngemindeni yaboyise nangokwezindlu zabo, boke abaduna abasele balungele ukuya epini, okutjho abaneminyaka ematjhumi amabili ukuya phezulu.

^42-43 Iinzukulwana zakwaNafitali beziziinkulungwana ezimatjhumi amahlanu nantathu namakhulu amane. Kwabalwa ngokweenkoro, ngemindeni yaboyise nangokwezindlu zabo, boke abaduna abasele balungele ukuya epini, okutjho abaneminyaka ematjhumi amabili ukuya phezulu.

⁴⁴ Ngilawo-ke amadoda uMosi no-Aroni abawatlolisa ngokusizwa ziinhloko zemindeni ezilitjhumi nambili ezazijamele ikoro nekoro kwa-Israyeli.

⁴⁵ Nje-ke boke abatloliswako kwa-Israyeli ngemindeni yaboyise, okutjho abaneminyaka ematjhumi amabili ukuya phezulu abasele balungele ukuya epini,

⁴⁶ bebaziinkulungwana ezimakhulu asithandathu nantathu namakhulu amahlanu namatjhumi amahlanu.

⁴⁷ Ikoro yakwaLevi yona akhange itloliswe neenkoro ezinye

⁴⁸ ngombana uSomnini gade athe kuMosi:

⁴⁹ “Ungatlolisi ikoro yakwaLevi begodu ungayifaki esibalweni seenkoro zakwa-Israyeli.

⁵⁰ Kodwana beka amaLevi bona aphathe ithaberinakeli lobufakazi, ipahlalo kanye nakho koke kwalo. Wona kufuze athwale ithaberinakeli nepahlalo yoke begodu aleluse. Akakhe amatendawo magegana nalo.

⁵¹ Lokha ithaberinakeli nalithuthwako, lizakuwiswa maLevi. Godu nalihlonywako, maLevi azalijamisa. Nanyana ngubani omunye ozakutjhidela kilo akabulawe.

⁵² Ngesikhathi ama-Israyeli ahlome amatendawo ekampeni ebaleni lawo ngokwamabuthwawo, enye nenye ikoro ngaphasi kwesibekiso sayo,

⁵³ amaLevi wona akahlome amatendawo magegana nethaberinakeli lobufakazi ukuze ilaka lami lingavutheli emkhambathini wama-Israyeli. MaLevi azakulawula ethaberinakelini lobufakazi.”

⁵⁴ Ama-Israyeli enza koke uSomnini ayala ngakho uMosi bona kwenziwe.