UNERHEMIYA 9 - IsiNdebele 2012 Translation

Ama-Israyeli avuma izono zawo

¹ Kwathi ngelanga lamatjhumi amabili nane lenyanga leyo, ama-Israyeli ahlangana ndawonye azila ukudla ambethe iinzilo azithele nangomlotha eenhloko.

² Ama-Israyeli wokubelethwa azihlukanisa nazo zoke iinzukulwana zabezizwe. Asikima avuma izono zawo nobukhohlakali baboyise.

³ Nje-ke ajama lapho afunda encwadini yomthetho kaSomnini uZimawo isikhathi esingaba siquntwana selanga. Kwathi esinye isiquntwana sakhona senza isivumo sezono ngokukhothamela uSomnini uZimawo.

⁴ Endaweni ephakamileko yamaLevi gade kujame uJetjhuwa, uBhani, uKhadimiyeli, uTjhebaniya, uBhuni, uTjherebiya, uBhani noKenani. Bona gade bathandaza amezwabo bawaphakamisele kuSomnini uZimabo.

⁵ Nje-ke amaLevi ekuboJetjhuwa, uKhadimiyeli, uBhani, uRhatjhabineya, uTjherebiya, uHodiya, uTjhebaniya noPhatarhiya bathi: “Sikimani nidumise uSomnini uZimenu nini nanini ngokuthi, Alidunyiswe ibizo lakho eliphazimulako; iye, ibizo eliphakanyiswa ngaphezu kwedumo neembongo zoke.

⁶ Wena wedwa unguSomnini. Nguwe owenze izulu, iye, izulu lamazulu kanye nazo zoke iinkhanyisi zalo. Wenze iphasi nakho koke okukilo, amalwandle kanye nakho koke okukiwo. Nguwe ophilisa koke lokho, kanti-ke neendalwa zezulu zikhothamela wena.

⁷ Iye, unguSomnini, unguZimu owakhetha u-Abramu bewamkhupha enarheni ye-Uri lamaKasidi, wamthiya ibizo bona ngu-Abrahamu.

⁸ Nguwe owafunyana bonyana ihliziywakhe yethembekile kuwe, wenza isivumelwano naye kobana unikele isizukulwana sakhe inarha yamaKanana, yamaRhithi, yama-Amori, yamaPherizi, yamaJebusi namaGirigatjhi. Nje-ke usiphethile isithembiso sakho ngombana wena uneqiniso.

⁹ “Begodu wena wabona ukuhlupheka kwabobaba eGibhide, wezwa nesililo sabo elwandle lomGaba,

¹⁰ wenza iimbonakaliso nemikarisomraro kuFaro neencekwini zakhe zoke kanye nebantwini boke benarha yakhona ngombana wena bewazi bonyana bazitjhaya kangangani phezu kwabobabethu. Ngalokho wazenzela ibizo bekube kunamhlanje.

¹¹ Wadabula phakathi ilwandle phambi kwabo kobana bayame ehlabathini eyomileko. Wabuye waphosela nabalandeli babo ekuzikeni kwelwandle, njengelitje naligqumukela ngemanzini anamandla.

¹² Wabarhola ngesika yelifu emini, kwathi ebusuku wabarhola ngesika yomlilo ukuze ubakhanyisele indlela ebegade bazoyikhamba.

¹³ Wehlela entabeni yeSinayi, wakhuluma nabo usezulwini wabanikela iimiso ezilungileko nemithetho yeqiniso, iiyeleliso nemiyalo emihle.

¹⁴ Wabazisa iSabatha lakho elicwengileko, wabayala ngemiyalo, ngeemiso nangomthetho ngencekwakho uMosi.

¹⁵ Wabapha isikwa esivela ezulwini ngebanga lokulamba kwabo, wabavezela amanzi edwaleni ngokoma kwabo bewabatjela bonyana bangene bebathumbe inarha owafunga ukubanikela yona.

¹⁶ “Kodwana bona kanye nabobaba bazitjhaya bebakhunyalalisa iintamo begodu azange balalele imiyalwakho.

¹⁷ Bala ukulalela begodu azange basakhumbula neemangaliso wena Somnini owazenza phakathi kwabo. Kunalokho bakhunyalalisa iintamo bebazikhethela umrholi bonyana babuyele emuva eenkhungweni zeGibhide. Ngenca yokobana wena unguZimu olungele ukuthethelela, onomusa nesirhawu, obuthaka ekusilingekeni nonokwethembeka okukhulu, azange ubatjhiye.

¹⁸ Nanyana sebazibumbele ikonyana bebathi linguZimu wama-Israyeli owawenyula enarheni yeGibhide, okwaba yindlela abahlambalaza ngayo uSomnini,

¹⁹ wena Zimu ngomusakho omkhulu azange ubatjhiye erhalawumbeni. Isika yelifu beyisabarhola emini azange isuke kibo, ngokunjalo nesika yomlilo beyisakhamba phambi kwabo ebusuku kobana ibakhanyisele endleleni ebekufuze bayikhambe.

²⁰ Wabapha uMoyakho omuhle kobana ababonise begodu wangagodla imanakho kobana badle. Wabuye wabapha namanzi kobana basuse umrhawu.

²¹ Wabalondoloza erhalawumbeni iminyaka ematjhumi amane, bangasweli litho. Izambatho zabo azange zirhaluke neenyawo zabo azange zivuvuke.

²² Wabapha imibuso nezizwe, wenza woke amajika wenarha aba lilifa labo. Iye, bathumba ngitjho nenarha kaSirhoni ikosi yeRhetjhibhoni kanye nenarha ka-Ogi ikosi yeBhatjhani.

²³ Njengombana wakhuluma naboyisemkhulu, wandisa iinzukulwana zabo zaba njengeenkwekwezi zesibhakabhaka. Godu wabangenisa enarheni kobana ibe lilifa labo.

²⁴ Ngalokho iinzukulwana zangena zayithumba inarha. Godu waguqisa phambi kwazo amaKanana okubabantu benarha leyo. Wanikela abantwabo namakhosabo kanye nezizwe zenarha leyo ezandleni zeenzukulwana kobana iinzukulwana zenze kibo njengokubona kwazo.

²⁵ Bathumba namadorobho anemithangala nenarha enothileko. Bathumba izindlu zigcwele ipahla ehle, imigodi yomphathamanzi ebegade yenjiwe, iindiribe, imithi ye-oliva neminye imithi yeenthelo ezinengi. Nje-ke badla, basutha baba ziintumutumana, benama ngokuhle kwakho okukhulu Zimu.

²⁶ “Nanyana kunjalo baba mahlongandlebe, bakuhlubuka, baphayela imithethwakho ngeqadi. Babulala abaphorofidi bakho egade babayelelisa kobana babuyisane nawe Zimu. Ngalokho bakuhlambalaza khulu.

²⁷ Yeke wabanikela ezandleni zezitha zabo, ezabenza bahlupheka. Kwathi ngesikhathi seenhlupheko zabo balila kuwe wabezwa usezulwini. Ngokuya ngomusakho omkhulu, wabapha abasindisi ababasindisako ezandleni zezitha zabo.

²⁸ Kodwana kwathi sele baphunyuziwe, benza okumbi godu phambi kwakho. Nalapho wabaliselela ezandleni zezitha zabo kobana izithezo zibuse phezu kwabo. Nanyana kunjalo kwathi lokha nabalila babuyela kuwe, wabezwa usezulwini, wabenyula kanengi ngezwelo lakho elikhulu.

²⁹ Wabayelelisa kobana babuyele emthethwenakho. Kodwana bona bazitjhaya ngokungalaleli imiyalwakho. Beqa nemithethwakho umuntu ebegade kufuze aphile ngayo. Bafulathela bakhunyalele, baqinisa iintamo zabo, azange balalele.

³⁰ Wababekezelela iminyaka eminengi, wabayelelisa ngoMoya nangabaphorofidi, nokho azange balalele. Ngalokho wabanikela ezandleni zabantu bezizwe.

³¹ Noma kunjalo, ngomusakho omkhulu azange ubaphelise namkha ubatjhiye ngombana unguZimu onomusa nesirhawu.

³² “Nje-ke Zimethu, wena unguZimu omkhulu, onamandla nowesabekako, ogcina isivumelwano nokwethembeka, sibawa bona boke ubudisi obasehlela, bungabonakali bulula emehlwenakho. Iye, ngitjho ubudisi obehlele phezu kwethu, amakhosethu, abarholi, abaphristi, abaphorofidi nabobaba kanye naphezu kwabantu boke kusukela esikhathini samakhosi we-Asiriya bekube kunamhlanje.

³³ Wena ube neqiniso kikho koke okusehleleko. Mbala usiphethe kuhle ngokwethembeka nanyana thina besiziphethe ngameswe.

³⁴ Amakhosethu, abarholi, abaphristi nabobabethu azange balonde umthethwakho namkha bayelele imiyalwakho neemfuneko zakho owabanikela zona.

³⁵ Babe nombuswabo owabanikela wona ngokulunga kwakho okukhulu, kodwana azange bakulotjha enarheni ebanzi nenothileko leyo owayendlala phambi kwabo. Azange baphenduke emisebenzinabo yobukhohlakali.

³⁶ Akhusuthi uyaqala Zimu, namhlanje simakhoboka. Iye, simakhoboka enarheni owayinikela abobabethu kobana bazanelise ngesithelo sakhona nezipho zakhona ezihle; esikhundleni salokho simakhoboka enarheni leyo.

³⁷ Umkhiqizo wenarha uya emakhosini owenze bona abuse phezu kwethu ngenca yesono sethu. Alawula imizimbethu godu azenzela umathanda ngefuywethu. Yeke thina sisesizini elikhulu nasinje.”

Isibopho sama-Israyeli

³⁸ Ngemva kwalokho saqunta ukuzibopha ngokutloliweko. Abarholi bethu namaLevi kanye nabaphristi bethu bazakuqinisa isibopheso ngesigibo sabo.