UNERHEMIYA 8 - IsiNdebele 2012 Translation

¹ bahlangana boke njengomuntu oyedwa etatawini elingaphambi kwesango uManzi. Babawa u-Ezra omtloli bonyana alethe incwadi yomthetho kaMosi egade inikelwe nguSomnini kuma-Israyeli.

² Nje-ke u-Ezra umphristi waletha umthetho lowo phambi kwehlangano ngelanga lokuthoma lenyanga yekhomba. Bekuyihlangano yamadoda nabafazi kanye nabo boke abazwisisa umthetho.

³ Wafunda umthetho lowo kusukela ekuseni bekwaba semini aphambi kwamadoda nabafazi kanye nalabo abazwisisako. Gade aqalene netatawu ngaphambili kwesango uManzi. Boke abantu bebabeke indlebe emthethweni lowo.

⁴ U-Ezra omtloli gade ajame esithaleni seengodo ebesakhelwe umsebenzi lowo. Eqadi kwakhe ngesidleni bekujame uMatitiya, uTjhema, u-Anaya, u-Uriya, uRhilikhiya noMaseya; ngesinceleni kujame uPedaya, uMitjhayeli, uMalikiya, uRhatjhumu, uRhatjhibhadana, uZakariya noMetjhulamu.

⁵ U-Ezra wavula incwadi aqalwe babantu boke ngombana gade ajame endaweni ephakamileko. Kwathi nakayivulako, abantu basikima boke.

⁶ Lokha u-Ezra nakadumisa uSomnini uZimu omkhulu, abantu baphendula bathi: “Amen! Amen!” Baphakamisa izandla, baguqa bahloma iinhloko phasi phambi kwakaSomnini.

⁷ Kwathi abantu basajame eendaweni zabo njalo, amaLevi ahlathululela abantu umthetho. Wona bekunguJetjhuwa, uBhani, uTjherebiya, uJamini, u-Akhubu, uTjhabatayi, uHodiya, uMaseya, uKhelitha, u-Azariya, uJozabadi, uRhanani noPelaya.

⁸ Afunda encwadini yomthetho kaZimu abe ahlathulula ukuze abantu bazwisise umthetho ofundiweko.

⁹ Kwathi lokha uNerhemiya ogade ambusi no-Ezra omphristi nomtloli kanye namaLevi nabafundisa abantu, bathi kibo boke: “Ilangeli licwengile kuSomnini uZimenu, yeke ningadabuki namkha nilile ngalo.” Batjho lokho ngombana abantu balila lokha nabezwa amezwi womthetho.

¹⁰ UNerhemiya wathi kibo: “Khambani nifese nibethe esimonyongwana, nithumele isabelo konganalitho. Iye, ilangeli licwengile kuSomnini, ngalokho ningaphatheki kumbi ngombana ukwenama enikuphiwa nguSomnini kumamandlenu.”

¹¹ Godu namaLevi athulisa boke abantu athi: “Thulani ngombana ilangeli licwengile, ningaphatheki kumbi.”

¹² Mbala, abantu bakhamba kobana bayokudla, basele bebathumele isabelo konganalitho. Godu bebasase khulu ngombana bebazwisise amezwi amenyezelwe kibo.

¹³ Kwathi ngelanga lesibili abaphristi namaLevi kanye neenhloko zemindeni yoke, beza babuthana ku-Ezra omtloli kobana bazokutlhadlhuluka kuhle ngeemiso zakaSomnini.

¹⁴ Bafunyana iimiswezo zitlolwe emthethweni uSomnini agade ayale ngazo ngoMosi kobana ama-Israyeli kufuze ahlale emitlhatlhaneni nakusikhathi somnyanya wenyanga yekhomba,

¹⁵ nokobana kumele azwakalise abe amemezele kiwo woke amadorobhawo neJerusalema athi: “Phumani, niye entatjaneni nifese nilethe amatjhwaba we-oliva, we-oliva yommango, wemithi yemiritlili, wesundu kanye naweminye imithi yamakari ukuze nizokwakha imitlhatlhana njengombana kutloliwe.”

¹⁶ Nje-ke abantu baphuma beza namatjhwaba kobana bazozakhela imitlhatlhana. Omunye nomunye wazakhela umtlhatlhana ephahleni lendlwakhe namkha ecabazini lakhe, nanyana esirhodlweni sethempeli lakaZimu namkha etatawini lesango uManzi netatawini lesango u-Efrayimu.

¹⁷ Yoke ihlangano yalabo ababuya ekuthunjweni yakha imitlhatlhana yahlala kiyo ngombana kusukela emihleni kaJotjhuwa umsa kaNuni, ama-Israyeli bekangazange enze njalo. Ngalokho kwaba khona ukwenama okukhulu.

¹⁸ Imihla ngemihla ukusukela elangeni lokuthoma bekube kelokugcina, uNerhemiya wafunda encwadini yomthetho kaZimu. Bagidinga umnyanya amalanga alikhomba. Kwathi ngelanga lobunane kwaba khona umgidi omkhulu ukuya ngomyalo.