UNERHEMIYA 6 - IsiNdebele 2012 Translation

Abajamelani balinga ukujamisa umsebenzi

¹ Kwabikwa kuSanibhalathi, uThobiya noGetjhemu umArabhu nakizo zoke izitha zethu bonyana ngivuselele umthangala nokobana akunasikhala esiseleko kiwo, nanyana bekube sikhatheso bengingakabi ukufaka iimvalo emasangweni.

² Ngalokho uSanibhalathi noGetjhemu bangithumelela umlayezo othi: “Yewize khesihlangane eKefirimu engemrhuleni we-Ono.” Kodwana bebacuphe ukungenzakalisa.

³ Mina-ke ngathumela iinthunywa kibo ngathi: “Umsebenzi engiwenzako lapha mkhulu, yeke angekhe ngiphumelele ukuza lapho. Ibekhona kubayini kufuze ngijamise umsebenzi, ngiwusukele batjho ngehlela kinapho na?”

⁴ Bangithumelela imilayezo leyo kwaze kwaba kane, nami ngabaphendula ngendlela eyodwa.

⁵ Ngendlela efanako uSanibhalathi wathumela kimi ngokwesihlanu isithunywa sakhe siphethe incwadi engakavalwa esandleni saso,

⁶ itlolwe ngokuthi: “Kubikiwe phakathi kwezizwe noGetjhemu ukuqinisekisile lokho bonyana amaJuda afuna ukuhlubuka. Kungakho nje wakhe umthangala lowo. Ngokuya ngombiko lowo, uzimisele ukuzenza ikosi wena

⁷ kungebangelo uzijamisele abaphrofidi bonyana baphorofide ngawe eJerusalema bathi, ‘Kunekosi kwaJuda!’ Kuzokubikelwa ikosi u-Aritarhitjhasta ngamezwi lawo! Nje-ke, yiza khona nje, sizokuhlanganisa iinhloko ngendaba le.”

⁸ Ngamthumelela ilizwi ngathi: “Into oyikhulumako leyo ayisinjengombana usitjho, kodwana uyazibhudangela.”

⁹ Boke bebafuna ukusethusela nje kwaphela, badlumbana bona izandla zethu zizakwehla ekusebenzeni, ngalokho isakhiwo singarageli phambili. Kodwana lokho kwaziqinisa khulu izandla zami emsebenzini.

¹⁰ Kwathi lokha nangiya ngendlini kaTjhemaya umsa kaDelaya omsa kaMehethabiyeli ogade avalelwe lapho, wathi: “Kufuze sihlangane endlini kaZimu ngaphakathi kwethempeli. Kufanele sivale iminyango yalo! Bayeza bonyana bakubulale! Iye, bazokuza ngobusukobu kobana bakubulale.”

¹¹ Kodwana ngamphendula ngathi: “Indoda enjengami nje kufuze ibaleke na? Yindoda enjani enjengami ekufuze ingene ngethempelini ukuze izisindise? Ngithi angizukungena.”

¹² Bengizwisisa bonyana ngambala umuntu lo akakathunywa nguZimu, kodwana isiphorofido sakhe besijamelene nami ngombana gade aqatjhwe nguThobiya noSanibhalathi.

¹³ Ibanga aqatjhelwe lona kukobana azongisabisa ukuze ngenze ngendlela akhulume ngayo bengone. Ngokunjalo bazakwazi ukungipha ibizo elimbi ukuze bangihlambalaze.

¹⁴ Yeke Zimami, khumbula uThobiya noSanibhalathi mayelana nezinto abazenzilekwezi, nomphorofidikazi uNowadiya kanye nabaphorofidi abanye abalinge ukungenza ngesabe.

¹⁵ Kwathi ngemva kwamalanga amatjhumi amahlanu namabili, mhlana inyanga ka-Elulu inamalanga amatjhumi amabili namahlanu, umthangala waphela.

¹⁶ Lokha izitha zethu nezizwe zoke ezisizombelezileko nazizwa ngalokho, zathuthumela khulu ngathi bezalahlekelwa kuzethemba. Iye, zalemuka bonyana umsebenzi uphumelele ngebanga lesizo lakaZimethu.

¹⁷ Emihleni leyo abosaziwako bakwaJuda bebathumela iincwadi ezinengi kuThobiya neempendulo zakaThobiya zibuyela ngokunjalo kibo.

¹⁸ UThobiya lo, inengi lakwaJuda belinesibopho naye ngombana gade amkhwenyana kaTjhekaniya umsa ka-Ararhi, khisibe nendodanakhe uJorhanani gade athethe indodakazi kaMetjhulamu umsa kaBherekiya bona ibe mkakhe.

¹⁹ Godu abaJudaba gade bakhulume kuhle ngemisebenzi kaThobiya loyo phambi kwami, khisibe nabo bebabike namezwami kuye. Kungalokho uThobiya bekathumele iincwadi kimi kobana angethusele.