UNERHEMIYA 4 - IsiNdebele 2012 Translation

UNerhemiya uhlula izitha ezijamelene nomakho

¹ Kwathi lokha uSanibhalathi nakezwa bonyana sakha umthangala, wanyenya. Waphatheka kumbi khulu bewanyefula amaJuda

² phambi kwabantu bekhabo naphambi kwebutho leSamariya wathi: “Yintobani eyenziwa mitheretherana yamaJuda le? Adlumbana bonyana ikhona into angayilungisa bese enza umhlabelo na? Adlumbana bonyana angaqeda masinyana na? Njekhona angakghona ukubuya asebenzise amatje asequqwini yamawunguwungu etjhiswe mlilo leyo?”

³ UThobiya umAmoni ogade amsekela wathi: “Iye, akuvuselelakokho, ngitjho nophagana nange angaqaqada phezu kwakho, angawugiriza umthangadlana wakhona wamatje lowo!”

⁴ Ngathandaza ngathi: “Awu, Zimu! Akhusulalele ngombana siyanyefulwa. Phendulela ihlambabo le bonyana iwele phezu kweenhloko zabo, ubanikele babe yipango enarheni abathunjelwa kiyo.

⁵ Ungakhe ungasibekela icala labo begodu ungavumeli bona izono zabo zisuleke emehlwenabo ngombana bathuke abakhi.”

⁶ Nje-ke saragela phambili ngokwakha umthangala, ukuphakama kwawo bekwaba kuphakathi nendawo ngombana abantu bebanehliziyo yokusebenza.

⁷ Kodwana kwathi lokha uSanibhalathi noThobiya kanye nama-Arabhu, ama-Amoni nabantu be-Atjhidodi nabezwa bonyana ukuvuselelwa komthangala eJerusalema kuragela phambili nokobana iinkhala besele zithome ukuvaleka, banyenya khulu.

⁸ Nje-ke bakha isicathana sokobana kufuze beze bazokulwa neJerusalema bebabange ihlangahlangano kilo.

⁹ Sathandaza uZimethu, sabeka abalindi ubusuku nemini bonyana bayelele ukuza kwabo.

¹⁰ Abantu bakwaJuda bathi: “Amandla wabathwalako selayaphela, khisibe kusese neququ enengi; nje-ke asisakwazi ukuragela phambili nokwakha umthangala.”

¹¹ Ngahlanye izitha zethu zathi: “Bazokuthi bangakatjheji namkha bangaboni litho, sizobe sesiphakathi kwabo, sibabulale, sijamise umsebenzi.”

¹² Khonapho amaJuda ahlala hlanu kwezitha zethu eza kithi asitjela indlebe ukuzwa athi: “Buyelani kithi.”

¹³ Nje-ke kwathi eenkhaleni lapha umthangala usese phasi khona, ngabeka abantu ngemuva kwawo ukuya ngemindenabo, baphethe iinsabula, imikhonto nemisubi.

¹⁴ Kwathi sele ngihlole koke, ngasikima ngakhuluma nabosaziwako, iinkhulu kanye nabantu boke ngathi: “Ningabi nevalo ngabantwabo. Khumbulani uSomnini onamandla nowesabekako. Nje-ke lwelani abafowenu, amadodanenu, amadodakazenu, abomkenu kanye nemizenu.”

¹⁵ Kuthe lokha izitha zethu nazizwa bonyana sele sazi ngesicathana sazo nokobana uZimu utjhiphirize ilisu lazo, zanyefa. Thina-ke sabuyela soke emthangaleni, omunye nomunye emsebenzinakhe.

¹⁶ Kusukela mhlokho ingcenye yabantu bami yaraga umsebenzi, enye ingcenye yahloma ngeensabula, ngeemviko, imisubi nezambatho zepi. Abarholi bazihlela bonyana bajame ngemuva kwamaJuda,

¹⁷ agade asakha umthangala. Labo ebebathwala ipahla yokwakha bebasebenza ngesandla sinye kuthi esinye siphathe isikhali.

¹⁸ Omunye nomunye wabakhako gade ahlome isabulakhe edinini khisibe ngapha uyakha. Kodwana umbethi wepalapala gade ahlanu kwami.

¹⁹ Ngakhuluma kibosaziwako neenkhulwini kanye nebantwini boke ngathi: “Umsebenzi mkhulu unabile, manje simaqalanga begodu sikude komunye nomunye emthangalenapha.

²⁰ Nje-ke kuphi nakuphi lapha nizwa khona ukulila kwepalapala, hlanganani nathi lapho. UZimethu uzasilwela.”

²¹ Sangenelela khulu ekusebenzeni, ingcenye yamadoda ihlome iinsabula kusukela nakusako bekube ngamarhwaqela.

²² Godu ngesikhatheso ngakhuluma nabantu ngathi: “Akuthi woke umuntu nesisebenzi sakhe bahlale ngeJerusalema ebusuku ukuze basisize babe balindi ebusuku kuthi emini babe ziinsebenzi.”

²³ Sengitjho mina, abafowethu, iinsebenzi zami namkha amadoda abalindi agade abalandeli bami, akakho noyedwa wethu owahlubula izambatho zakhe. Kwaba ngiloyo naloyo waziphathela isikhali esandleni sakhe.