UNERHEMIYA 3 - IsiNdebele 2012 Translation

Abakhi bomthangala

¹ U-Eliyatjhibu umphristi omkhulu nabafowabo ababaphristi basungula ukwakha isango iMvu. Ngibo abalihlukanisela kuZimu bebajamisa iminyangwalo. Godu bahlukanisela nomthangala bekwaba sepundwini iKhulu ukuyokubetha epundwini iRhananiyeli.

² Eduze kwaka-Eliyatjhibu bekwakha amadoda weJerikho. Hlanu kwawo bekwakha uZakuri umsa ka-Imri.

³ Amadodana kaHasenaya akha isango iHlambi. Aqaba amabhaluga, afaka iminyango kanye nemikhonywana neenqabo zakhona.

⁴ Hlanu kwabo bekuvuselela aboMeremothi umsa ka-Uriya omsa kaHakhotsi. Hlanu kwabo kube boMetjhulamu umsa kaBherekiya omsa kaMetjhezabiyeli. Hlanu kwabo kube boTsadokhi umsa kaBhana.

⁵ Hlanu kwabo kube maTekhowa. Kodwana abosaziwako bawo azange bafake isandla emsebenzini weKosawo uZimu.

⁶ UJoyada umsa kaPhaseyarhi noMetjhulamu umsa kaBhesodiya bavuselela isango iJetjhana. Baqaba amabhaluga bafaka neminyango kanye nemikhonywana neenqabo zakhona.

⁷ Hlanu kwabo bekuvuselela uMelathiya umGibiyoni noJadoni umMeronothi. Bona basekelwa madoda weGibiyoni neMitsipha lapho gade kunzinze khona umbusi wesifunda sangetjingalanga yomlambo iYufrathe.

⁸ Hlanu kwabo bekuvuselela abo-Uziyeli umsa kaRharihaya. Bona gade babakhandi begolide. Hlanu kwabo bekuvuselela aboRhananiya. Bona gade bababenzi bamakha. Bebalungisa iJerusalema bekwaba semthangaleni uBanzi.

⁹ Hlanu kwabo bekuvuselela aboRefaya umsa kaRhuri ombusi wengcenye yomkhawulo weJerusalema.

¹⁰ Hlanu kwabo uJedaya umsa kaRharumafa wavuselela umthangala eduze nendlwakhe. Hlanu kwakhe bekuvuselela uRhathutjhi umsa kaRhatjhabineya.

¹¹ UMalikiya umsa kaRharimu noRhatjhubi umsa kaPharhathi-Mowabi bavuselela isigaba esilandelako kanye nepundu iin-Ondo.

¹² Hlanu kwakhe bekuvuselela uTjhalumu umsa kaHalorhetjhi ombusi wengcenye enye yomkhawulo weJerusalema anamadodakazakhe.

¹³ Isango umRhoba lavuselelwa nguRhanuni nabahlali beZenowarhi. Balakha bebalifaka iminyango kanye nemikhonywana neenqabo zakhona. Babuye bavuselela namamitha amakhulu amane namatjhumi amahlanu womthangala ukufika esangweni iZala.

¹⁴ UMalikhiya umsa kaRekabi, ombusi womkhawulo weBhethe-Hakeremu, wavuselela isango iZala. Walakha bewafaka iminyango kanye nemikhonywana neenqabo zakhona.

¹⁵ UTjhaluni umsa kaKolirhoze, ombusi womkhawulo weMitsipha, wavuselela isango umThombo. Walakha walifulela bewalifaka iminyango kanye nemikhonywana neenqabo zakhona. Godu wavuselela nomthangala osuka echibini elinomsele osezela isivande sesigodlo ukuyokutjhayisa emqaqadweni owehlela enzasi ukusuka eMzini kaDavida.

¹⁶ Emva kwakhe kwalandela uNerhemiya umsa ka-Azibukhi ombusi wengcenye yomkhawulo weBhethe-Tsuri. Yena wavuselela njalo ukudlula emazindleni kaDavida ukuyokutjhayisa echibini lokuzenzela nendlini yeengorho.

¹⁷ Emva kwakhe kwavuselela amaLevi, okutjho uRerhumu umsa kaBhani. Hlanu kwakhe kwavuselela uRhatjhabiya ombusi wengcenye yomkhawulo weKheyila. Yena bekajamele umkhawulwakhe.

¹⁸ Emva kwakhe kwavuselela abafowabo okuboBhavayi umsa kaRhenadadi ombusi wengcenye enye yomkhawulo weKheyila.

¹⁹ Hlanu kwakhe kwavuselela u-Ezeri umsa kaJetjhuwa ombusi weMitsipha. Godu wavuselela esinye isigaba esisemenyukelweni malungana nendlu yeenkhali nesiKghudlhu.

²⁰ Emva kwakhe uBharuku umsa kaZabhayi wavuselela ngetjiseko esinye isigaba esisuka esiKghudlhwini ukufika ebungenweni bendlu ka-Eliyatjhibu umphristi omkhulu.

²¹ Emva kwakhe uMeremothi umsa ka-Uriya omsa kaHakhotsi wavuselela esinye isigaba ukusuka ebungenweni bendlu ka-Eliyatjhibu ukuya lapho igcina khona.

²² Emva kwakhe kwavuselela abaphristi bendawo leyo.

²³ Emva kwabo kwavuselela uBhenjamini noRhatjhubu. Bona bavuselela malungana nezindlu zabo. Emva kwabo kwavuselela u-Azariya umsa kaMaseya omsa ka-Ananiya. Yena wavuselela eqadi kwendlwakhe.

²⁴ Emva kwakhe uBhinuyi umsa kaRhenadadi wavuselela esinye isigaba somthangala ukusuka endlini ka-Azariya ukuya esiKghudlhwini neJikeni.

²⁵ UPalali umsa ka-Uzayi wavuselela malungana nesiKghudlhu nepundwini eyengamele isigodlo esingehla sekosi, esirhodlweni sabalindisigodlo. Emva kwakhe uPhedaya umsa kaPharotjhi

²⁶ kanye neensebenzi zethempeli ezihlala e-Ofeli bavuselela isigaba esimalungana nesango uManzi ngepumalanga nepundwini eyengameleko.

²⁷ Emva kwazo amaTekhowa avuselela esinye isigaba esimalungana nepundu ekulu eyengamele ukufikela emthangaleni we-Ofeli.

²⁸ Ngehla kwesango iNjomani kwavuselela abaphristi, omunye nomunye malungana nendlwakhe.

²⁹ Emva kwabo kwavuselela uTsadokhi umsa ka-Imeri malungana nendlwakhe. Emva kwakhe kwavuselela uTjhemaya umsa kaTjhekaniya umlindi wesango iPumalanga.

³⁰ Emva kwakhe uRhananiya umsa kaTjhelemiya noRhanuni oyindodana yesithandathu kaTsalafi bavuselela esinye isigaba. Emva kwabo uMetjhulamu umsa kaBherekiya wavuselela malungana nelawu lakhe.

³¹ Emva kwakhe, uMalikiya omunye wabakhandi begolide, wavuselela ukufikela endlini yeensebenzi zethempeli neyabathengisi malungana nesango iHlanganelo, nelawini eliphezulu lepundu iJika.

³² Kwase kuthi phakathi kwelawu eliphezulu lepundu iJika nesango iMvu, kwavuselela abakhandi begolide nabarhwebi.