UNERHEMIYA 2 - IsiNdebele 2012 Translation

UNerhemiya uzilungiselela ukuya eJerusalema

¹ Kwathi ngenyanga kaNisani ngomnyaka wamatjhumi amabili wokubusa kwekosi u-Aritarhitjhasta, ngathatha iwayini ebelisetafuleni ngalinikela ikosi leyo. Njengombana bengingazange khengitlhuwe phambi kwayo ngaphambilini,

² yangibuza yathi: “Kutheni ubuso bakho bukhenile? Njengombana ungaguli nje, kutjho bona kukhona into ekuwurubajileko.” Mina-ke ngaba nevalo,

³ ngathi ekosini: “Kwanga ikosi ingaphila njalo! Bengingahlala njani ngingadani lokha idorobho lapha kwabekwa khona abobaba sele limarubhi namasangwalo alothiswe ngomlilo na?”

⁴ Ikosi yathi kimi: “Alo, mntabantu, isibawo sakho siyini ngalokho?” Nje-ke mina ngalila kuZimu wezulwini ngehliziyo,

⁵ ngathi ekosinami leyo: “Nangabe kuhle emehlweni wekosi begodu ngifumene umusa phambi kwayo, ngibawa ikosi ingivumele bonyana ngiye kwaJuda, edorobheni lapha kwabekwa khona abobaba ukuze ngiyolivuselela.”

⁶ Kwathi ikosi isahlezi nendlovukazi njalo yangibuza bona ngizokukhamba isikhathi esingangani nokobana ngiyokubuya nini. Ngasihlela-ke isikhathi, nje-ke kwayithokozisa ikosi bonyana ingivumele ngikhambe.

⁷ Ngathi ekosini leyo: “Nangabe kuyayithokozisa ikosi, anginikelwe iincwadi eziya ebabusini besifunda sangetjingalanga yomlambo iYufrathe bonyana bangivumele ngirathe khona bengiyokufika kwaJuda.

⁸ Godu kube nencwadi eya ku-Asafa umqapheli wehlathi lekosi kobana anginikele iingodo ukuze ngiyokwenza amabhaluga wesango lesiphephelo sethempeli nomthangala wedorobho kanye nelendlu engizakuhlala kiyo.” Mbala, ikosi yangipha engakubawako ngombana isandla esihle sakaZimami besiphezu kwami.

⁹ Kwathi lokha nangifika ebabusini besifunda sangetjingalanga yomlambo iYufrathe, ngabanikela iincwadi zekosezo. Bengiphekelelwe ziinduna zepi nabakhweli beenjomani. Labo-ke bebatjhaphululwe yikosi kobana bakhambe nami.

¹⁰ Kodwana kwathi bonyana uSanibhalathi umRhoroni noThobiya isikhulu ebesimu-Amoni bezwe lokho, baguguneka khulu ngokwazi bona kunomuntu ozileko ukuzokufuna isizo mayelana nama-Israyeli.

UNerhemiya ufunyana ukusekelwa eJerusalema

¹¹ Nje-ke ngafika eJerusalema. Emva kwamalanga amathathu ngilapho,

¹² mina namadoda ambalwa savuka ebusuku. Azange ngitjele noyedwa bonyana uZimami ubekeni ehliziywenami ekufuze ngiyenzele iJerusalema. Begodu bekungekho esinye isilwana hlanu kwami ngaphandle kwaleso ebegade ngisikhwelile.

¹³ Ngaphuma ngobusukobo ngesango umRhoba ngadlula emthonjeni iPungutjha, ngaphundlukela esangweni iZala bonyana ngihlole imithangala yeJerusalema ebegade igirizelwe phasi kanye namasango wakhona egade abhujiswe ngomlilo.

¹⁴ Ngasuka lapho ngaya esangweni umThombo nechibini lamaKhosi. Kodwana bekunganandawo yokudlula kwesilwana ebegade ngisikhwelile,

¹⁵ ngalokho ngenyuka ngomrhoba iKidroni ngahlola umthangala ebusukokho. Ngajika ngabuyela emuva ngesango umRhoba; ngabuyela njalo-ke edorobheni.

¹⁶ Nokho iinkhulu bezingazi bonyana khengaphuma nokobana bengiyokwenzani lapho ngombana kuze kube sikhatheso bengingakatjeli amaJuda, abaphristi, abosaziwako, iinkhulu kanye nabo boke ebe kufuze benze umsebenzi.

¹⁷ Nje-ke ngabatjela ngathi: “Nani niyazibonela bonyana inyakanyaka esikiyo ingangani, yokobona iJerusalema limarubhi namasangwalo atjhisiwe. Yeke yizani sakheni umthangala weJerusalema ukuze singasabonakali sisehlazweni.”

¹⁸ Ngabatjela bonyana isandla esihle sakaZimami siphezu kwami. Godu ngabatjela namezwi ikosi u-Aritarhitjhasta eyawakhuluma kimi. Bona bathi kimi: “Asisikimeni sakheni!” Nje-ke baqinisa izandla emsebenzinabo omuhle lowo.

¹⁹ Kodwana kwathi bonyana uSanibhalathi umRhoroni noThobiya isikhulu ebesimu-Amoni noGetjhemu umArabhu bezwe ngendaba leyo, basiphoqa bebasinyefula bathi: “Njekhona yintobani eniyenzako le? Senihlubuka ikosi Aritarhitjhasta na?”

²⁰ Ngabaphendula ngathi: “UZimu wezulwini uzosenza siphumelele, nje-ke thina nceku zakhe sizokusikima sakhe. Kodwana nakungini aninaso isabelo nelungelo namkha ubuhlobo neJerusalema.”