UNERHEMIYA 12 - IsiNdebele 2012 Translation

Irhelo labaphristi nelamaLevi

¹ Napa abaphristi namaLevi abuyako akhuphuka noZerubhabheli umsa kaTjheyalitiyeli kanye noJetjhuwa. Abaphristi bekungilaba: uSeraya, uJoromiya, u-Ezra,

² u-Amariya, uMaluki, uRhathutjhi,

³ uTjhekaniya, uRerhumu, uMeremothi,

⁴ u-Ido, uGinetoyi, u-Abiya,

⁵ uMinyamini, uMadiya, uBhiliga,

⁶ uTjhemaya, uJoyaribu, uJedaya,

⁷ uSalu, u-Amokhi, uRhilikhiya noJedaya omunye. Labo bekubarholi babaphristi kanye nabasebenzisani babo emalangeni kaJetjhuwa.

⁸ AmaLevi bekungilawa: uJetjhuwa, uBhinuyi, uKhadimiyeli, uTjherebiya, uJuda noMataniya. UMataniya nabasebenzisani bakhe gade baphethe zomvumo wokudumisa.

⁹ Abasebenzisanabo, okutjho aboBhakhibhukhiya nabo-Uni gade babavumeli bomkhaleli nakulotjhwako.

¹⁰ UJetjhuwa bekanguyise kaJoyakhimu onguyise ka-Eliyatjhibu uyise kaJoyada

¹¹ onguyise kaJonathani uyise kaJaduwa.

¹² Abaphristi ebegade baziinhloko zemindeni emihleni kaJoyakhimu ngilaba: emndenini kaSeraya bekunguMeraya, kewakaJoromiya kunguRhananiya,

¹³ kewaka-Ezra kunguMetjhulamu, kewaka-Amariya kunguJehorhanani,

¹⁴ kewakaMeluki kunguJonathani, kewakaTjhebaniya kunguJosefa,

¹⁵ kewakaRharimu kungu-Adina, kewakaMerayothi kunguRhelikhayi,

¹⁶ kewaka-Ido kunguZakariya, kewakaGinetoni kunguMetjhulamu,

¹⁷ kewaka-Abiya kunguZikiri, kewakaMinyamini newakaMowadiya kunguPilithayi,

¹⁸ kewakaBhiliga kunguTjhamuwa, kewakaTjhemaya kunguJehonathani,

¹⁹ kewakaJoyaribu kunguMatenayi, kewakaJedaya kungu-Uzi,

²⁰ kewakaSalu kunguKhalayi, kewaka-Amokhi kungu-Ebhere,

²¹ kewakaRhilikhiya kungu Rhatjhabiya, kewakaJedaya kunguNethaneli.

²² Iinhloko zemindeni yamaLevi zatloliswa emihleni ka-Eliyatjhibu, kaJoyada, kaJorhanani noJaduwa. Iinhloko zemindeni yabaphristi zatloliswa ukufikela emihleni yombuso kaDariyatjhi ikosi yePheresiya,

²³ kodwana iinhloko zemindeni yeenzukulwana zakaLevi bezitlolwe encwadini yemilando ukufikela emihleni kaJorhanani umsa ka-Eliyatjhibu kwaphela.

²⁴ Iinhloko zamaLevezo bekunguRhatjhabiya, uTjherebiya noJetjhuwa umsa kaKhadimiyeli. Abasebenzisani babo bebabavumeli bomkhaleli nakudunyiswa bekuthokozwe ngokweenqhema ukuya ngomyalo kaDavida umuntu kaZimu.

²⁵ Abasebenzisanabo bekuboMataniya, uBhakhibhukhiya no-Obadiya. UMetjhulamu, uThalimoni no-Akhubu bekubalindisango ebebalinde eenlulwini zamasango.

²⁶ Bona bebenza umsebenzi lowo emihleni kaJoyakhimu umsa kaJetjhuwa omsa kaJotsadakhi, nemihleni kaNerhemiya umbusi no-Ezra omphristi nomtloli.

Ukuhlukaniselwa komthangala weJerusalema

²⁷ Ngesikhathi okwahlukaniselwa ngaso umthangala weJerusalema, kwafunwa amaLevi lapha ahlala khona kobana eze eJerusalema azokugidinga umnyanya lowo, ngokudumisa, ngokuvuma nangokubetha iiwahlo nemihlobohlobo yamaharibha.

²⁸ Abavumi bahlangana ndawonye baphuma eemfundeni ezizombeleze iJerusalema nemizaneni yamaNethofathi

²⁹ neBhethe-Giligali kanye nesifundeni seGeba nese-Azimavethi, okutjho emizaneni yabavumi ebebazakhele yona magegana neJerusalema.

³⁰ Kwathi lokha abaphristi namaLevi nasele bazihlambululile, bahlambulula abantu, amasango kanye nomthangala wedorobho.

³¹ Nje-ke ngakhuphulela abarholi bakwaJuda ngaphezu komthangala. Ngakhetha iinqhema ezimbili ezikulu zabadumisi. Esinye sakhuphukela phezu komthangala ngesidleni nca ngesangweni iZala.

³² Emva kwaso bekulandela uHotjhaya nengcenye yabarholi bakwaJuda,

³³ no-Azariya, u-Ezra, uMetjhulamu,

³⁴ uJuda, uBhenjamini, uTjhemaya noJoromiya

³⁵ kanye nabanye babaphristi baphethe iimporompita. Bona bekunguZakariya umsa kaJonathani omsa kaTjhemaya umsa kaMataniya omsa kaMikaya umsa kaZakuru omsa ka-Asafa

³⁶ nabasebenzisani bakhe uTjhemaya, u-Azariyeli, uMilalayi, uGilalayi, uMayi, uNethaneli, uJuda noRhanani, baphethe iinliliso zakaDavida umuntu kaZimu. U-Ezra omtloli gade abarhola.

³⁷ Esangweni umThombo baragela phambili bakhuphuka ngemiqaqado edlula eMzini kaDavida. Emenyukeni womthangala bakhuphukela ngehla kwesigodlo sakaDavida ukuyela nca ngesangweni uManzi ngepumalanga.

³⁸ Esinye isiqhema sabadumisi saya ngesinceleni. Ngasilandela nengcenye yabantu phezu komthangala, sadlula epundwini iin-Ondo ukuya emthangaleni obanzi

³⁹ nangehla kwesango u-Efrayimu. Sadlula godu nesango iJetjhana, isango iHlambi, epundwini iRhananiyeli nepundwini iKhulu, satjhinga esangweni iMvu. Isiqhemeso safese sajama esangweni umLindi.

⁴⁰ Nje-ke iinqhema zombili zabadumisi zajama ethempelini lakaZimu. Ingcenye yeenkhulu beyinami

⁴¹ nabaphristi u-Eliyakhimu, uMaseya, uMinyamini, uMikaya, u-Eliyowenayi, uZakariya noRhananiya bebaphethe iimporompita.

⁴² Godu bekukhona noMaseya, uTjhemaya, u-Elazara, u-Uzi, uJehorhanani, uMalikiya, u-Elamu no-Ezeri. Abavumabo bebakhalela barholwa nguJizrarhiya.

⁴³ Mhlokho abantu banikela ngemihlabelo eminengi, bajabula ngombana uZimu gade abenze bona bename ngokusasa okukhulu. Kwajabula ngitjho abafazi nabantwana. Itjhada lokwenama kweJerusalema belizwakala kude.

Ukunikela kwabantu mayelana nomsebenzi wethempeli

⁴⁴ Ngelanga lokwahlukaniselwa komthangala kwakhethwa amadoda azakwengamela amalawu weenlulu zokubeka iminikelo yemikhiqizo yokuthoma neyokwetjhumi. Bekufuze abuthelele lapho izabelo zabaphristi namaLevi ezifunakalako ukuya ngokomthetho. Izabelwezo beziphuma emasimini abhode imizi. AmaJuda athokoza ngomsebenzi wabaphristi newamaLevi

⁴⁵ ngombana gade enze umsebenzi kaZimawo nomsebenzi wokuhlambulula. Abavumi nabalindisango nabo benza umsebenzabo ukuya ngomyalo kaDavida nendodanakhe uSolomoni.

⁴⁶ Iye, umsebenzi wabavumi wokudumisa ngomvumo wokuthokoza uZimu, wasungula ekadeni ngeenkhathi zakaDavida no-Asafa.

⁴⁷ Kanti-ke woke u-Israyeli emihleni kaZerubhabheli nemihleni kaNerhemiya, anikela izabelo zemihla ngemihla kubavumi nakubalindisango. Godu abela amaLevi, namaLevi abela abaphristi okuziinzukulwana zaka-Aroni.