UNERHEMIYA 1 - IsiNdebele 2012 Translation

Umthandazo kaNerhemiya

¹ Amezwi alandelako akhulunywa nguNerhemiya umsa kaRhakaliya: Kwathi ngenyanga kaKisilevu, emnyakeni wamatjhumi amabili ngisebuphephelweni beTjhutjhani

² uRhanani okungomunye wabomnakwethu, weza namadoda athileko bavela kwaJuda. Mina-ke ngababuza ngeJerusalema nangamasalela wamaJuda asindako lokha nasithunjwako.

³ Bona bangiphendula bathi: “Amasalela ahlala ngesifundeni sakwaJuda nekungilawo asindako ekuthunjweni, akhungathwe lisizi nokurhubutjhwa okukhulu. Imithangala yeJerusalema igiriziwe namasango wakhona atjhiswe ngomlilo.”

⁴ Kwathi lokha nangizwa amezwi lawo, ngahlala phasi ngalila. Ngazila ukudla amalangana ngithandaza phambi kwakaZimu wezulwini,

⁵ ngathi: “Maye Somnini, Zimu wezulwini! Wena unguZimu omkhulu, owesabekako, ogcina isivumelwano nothembekileko kilabo abakukhathalelako nabagcina imiyalwakho.

⁶ Kwanga uSomnini angangilalela, angitjheje ukuze ezwe umthandazo incekwakho ewuthandaza phambi kwakho ubusuku nemini mayelana neenceku zakho ama-Israyeli. Mina ncekwakho ngivuma izono ama-Israyeli akone ngazo, godu ngivuma nezami nezomndenami.

⁷ Senze okumbi khulu phambi kwakho Somnini begodu azange silonde imiyalo, iimiso kanye nemithetho owayala ngayo incekwakho uMosi.

⁸ Nje-ke Somnini, khumbula ilizwi owayala ngalo incekwakho uMosi lokha nawuthi, ‘Naningathembekiko ngizanihlakazela hlangana nebakosozizwe;

⁹ kodwana nanibuyela kimi nilonde imiyalwami beniyenze, ngizanibutha nginibuyisele endaweni engiyikhethileko ukuze ngenze ibizo lami lihlale lapho. Ngizakubutha nalabo abahlakazekileko abasemajukujukwini akude ngaphasi komkayi.’

¹⁰ Ama-Israyeli aziinceku nabantu bakho owabahlenga ngamandlakho amakhulu nangesandla sakho esiqinileko.

¹¹ Awu Somandla, ngibawa ulalele umthandazo wencekwakho kanye nomthandazo weenceku zakho ezithokozela ukuhlonipha ibizo lakho. Nje-ke yipha namhlanjesi incekwakho ukuphumelela uyenzele umusa emehlweni wekosi le.” Ngesikhatheso bengimphathikapho wekosi leyo.