UNARHUME 3 - IsiNdebele 2012 Translation

INiniva izakubethwa ngeentonga zalo

¹ Lizazizwa idorobho leengazi, lizele ngamala; lizele ngobumarhamaru, alitlhogi elikuthumbileko!

² Lenza lokhu ngokuthuthumbisa iimbebhu, kutswiririze amavili; ligijimise iinjomani, kukhehlezele iinkoloyana!

³ Abakhweli beenjomani bahlabela phambili, kumanyazela iinsabula, kumekeza imikhonto! Latjhiya iinkubela ezinengi, kwaba sidumbu phezu kwesidumbu – zaba zinengi zarareja umuntu.

⁴ Koke lokhu kungebanga lobungwadla bengwadla, enejamo elilulubezako, umtjhotjhozeli wobuloyi, okhaphela izizwe ukuze azuze, akhaphele abantu ngobuloyi bakhe.

⁵ USomnini uMninimandlawoke uthi: “Ngijamelene nawe poro. Ngizakubhenula iinthimba zakho, izizwe zoke zikubonele; nemibuso ibone ukurhubutjheka kwakho.

⁶ Ngizakujikijela ngamanyala, ngikunyazise, ngenze ngawe isibonelo.

⁷ Boke abakubonako bazakubaleka bathi: ‘INiniva igirikile! Akunamuntu ozayililela, kungabikho noyedwa oyiduduzako.’ ”

⁸ Kghani ungcono kuneThebhesi, esemlanjeni iNayili, ezombelezwe mamanzi? Umlambo begade kusiviko sayo, amanzi aliboda lakhona.

⁹ IKutjhe bekusidindi sayo, neGibhide ngobunengi bayo. iPhuthi neLibhiya kusidzimelelo sayo.

¹⁰ Ngitjho neThebhesi beyibekelwe bonyana idingiswe, isiwe ekuthunjweni. Ngitjho namasanayo aphihlizelwa emasangweni wazo zoke iindlela. Iinkhulu zakhona zenzelwa ifumbe, kwathi boke abarholi bakhona babotjhwa ngeenketani.

¹¹ Nawe-ke Niniva uzakurhamula ikapho yomhlonyani; uzakubaleka uyokubhaca bese ubawa ukukhoseliswa zizitha zakho.

¹² Woke amarholwakho afana nemithi yamakhiwani; amajonakho anjengamakhiwani avuthweko: lokha imithi nayisikinywako, amakhiwani awela emlonyeni wogomako.

¹³ Khusuthi uyaqala amajonakho: Woke bafazi! Amasango wesifunda sakho avuleke petle, avulekele izitha zakho; umlilo utjhise thokgho iinqabo zamasangwakho.

¹⁴ Yikha amanzi ngombana uragelelwe, uqinise amarholwakho! Khamba uye edongeni ubhice idaka wenze iintina!

¹⁵ Umlilo uzakutjhisela khonapho nesabula izakukghedlha; ikuqothule njengokuqothula kwesikhonyani esimini.

¹⁶ Ungezelele isibalo sabarhwebi bakho bebadlula iinkwekwezi zesibhakabhaka. Kodwana bazakwenza seentethe: badle bazikhambele.

¹⁷ Nabalindi bakho bafana nesikhonyani, iinkhulu zakho zifana newoma leentethe, ezikakarela emabodeni nakumakhaza. Kuthi nakuhlaba ilanga zitlharuluke ziphaphe, ziye lapha kungazi muntu khona.

¹⁸ Maye, kosi ye-Asiriya! Abarholi bakho bafile buthongo; amabuthwakho akhethekileko arabhalele. Amajonakho arhatjheke neentaba, atlhoge nomuntu ongawabuthelela.

¹⁹ Akunamuntu ongelapha amancebakho; awuzukusinda ngeduma lakho. Woke umuntu ozwa iindaba zakho, uwahla izandla ngokuwa kwakho. Ngombana akunamuntu ongazange khewumhlunguphaze; ngobukhohlakali bakho obungapheliko.