UMTJHUMAYELI 9 - IsiNdebele 2012 Translation

Akukho ukubuyiselela

¹ Mbala, ngakucabangisisa lokho, kobana ngihlunge yoke indaba le yokuthi abalungileko nabahlakaniphileko kanye nemisebenzabo, ngitjho nethando nezondo kusezandleni zakaZimu. Koke okusezako, umuntu akakwazi.

² Koke kuyafana kibo boke; kunesehlo sinye kolungileko nokhohlakeleko, koqotho, kohlambulukileko nongakahlambuluki, kowenza umhlabelo nongawenziko. Njengombana kunjalo kosisoni, kunjalo nakolungileko; njengombana kunjalo kofungako, kunjalo nakowesaba ukufunga.

³ Lokhu bubumbi kikho koke okwenzeka ngaphasi komthunzi welanga, kobana boke behlelwa yinto efanako. Godu kububumbi kobana iinhliziyo zabantu zizale ngobumbi nokobana epilwenabo batlhoge ingqondo, ngemva kwalapho bahlongakale.

⁴ Nanyana ngubani ophakathi kwabaphilako unethemba, ngitjho nenja ephilako ingcono kunebhubezi elifileko!

⁵ Abaphilako bayazi bonyana bazokuhlongakala, kodwana abahlongakeleko abazi litho; abasenamvuzo ngombana ukukhunjulwa kwabo akusekho.

⁶ Ngitjho nethando labo, ukuzonda kwabo nesikhwele sabo, koke sekwanyamalala; angeze bebasaba nesabelo kinanyana yini eyenzeka ngaphasi komthunzi welanga.

⁷ Khamba ufese ugome ukudla kwakho ngethabo, bewusele newayini lakho ngokwenama kwehliziywakho ngombana uZimu uyakuvuma lokho okwenzako.

⁸ Uhlale wembethe ezimhlophe begodu uzese ihlokwakho njalo ngamafutha.

⁹ Zithokozise ngepilo nomkakho omthandako kiwo woke amalanga wepilo engatjho litho le, uZimu akuphe yona ngaphasi komthunzi welanga; iye, ngitjho yoke imihla yakho engatjho litho. Lokho kusisabelo sakho epilweni kanye nekutjhabatjhekeni kwakho ngaphasi komthunzi welanga.

¹⁰ Nanyana yini ofuna ukuyenza ngesandla sakho, yenze ngamandlakho woke ngombana endaweni yabafileko lapha uya khona, akusasetjenzwa, akuhlelwa, akunalwazi namkha ukuhlakanipha.

¹¹ Godu ngabuye ngabona bonyana ngaphasi komthunzi welanga umgijimo awuyi ngabanebelo, ipi ayiyi ngokweengorho isikwa asisi ngesabahlakaniphileko, umnono awusi ngewabongqondongqondo nomusa awusi ngewabanelwazi ngombana isikhathi nethuba kubehlela boke.

¹² Akunamuntu owaziko bona isikhathi sakhe sizokufika nini: Njengehlambi nayibanjwa ngenede enesihluku namkha iinyoni ezibanjwa ngesithiyo, ngokunjalo abantu babambeka esithiyweni ngesikhathi sehlekelele, lokha nayibehlela msinyana.

Ubudlhadlha buyatjhaphisa

¹³ Godu ngabona ngaphasi komthunzi welanga isehlakalo sokuhlakanipha ebesiqakathekile kimi:

¹⁴ Gade kunedorojana elinabahlali abalidlanzana. Kweza ikosi enamandla kilo, yalizombeleza beyakha iinqabo ezikulu ngokujamelana nalo.

¹⁵ Ngedorojanenapho gade kunendoda esichaka begodu ihlakaniphile. Beyingalisindisa idorojanelo ngokuhlakanipha kwayo, kodwana abantu azange basikhumbula isichakeso.

¹⁶ Ngakhe ngatjho bona ukuhlakanipha kungcono kunamandla, kodwana ukuhlakanipha kwesichaka kuthathelwa phasi namezwaso akayelelwa.

¹⁷ Kungcono ukulalela ngesizotha amezwi wabahlakaniphileko, kunokurhuwelela kwenduna phakathi kweendlhadlha.

¹⁸ Ukuhlakanipha kungcono kuneenkhali zepi, kodwana isiphosiso sinye sibhidla okunengi okuhle.