UMTJHUMAYELI 8 - IsiNdebele 2012 Translation

¹ Ngubani onjengohlakaniphileko na? Ngubani owazi ihlathululo yezinto? Ukuhlakanipha komuntu kukhanyisa ubuso, kubuguqule ekubeni likhuni.

Abantu abanawo amandla wokujamelana nombuso

² Ngithi: Bulunga umyalo wekosi ngebanga lesithembiso esenziwe nguZimu.

³ Ungarhabi ukuphendula umbusi. Tjhida phambi kwakhe ngombana angenza nanyana yini ayithandako.

⁴ Ilizwi lekosi aliphikiswa. Ngubani ongathi kiyo, “Yintobani oyenzako le?”

⁵ Abahlakaniphileko bathi, “Obulunga umyalo akazukwehlelwa ngokumbi nengqondo yohlakaniphileko iyasazi isikhathi nesiqunto.

⁶ Kunesikhathi nekambiso efaneleko kiyo yoke into nanyana isizi lomuntu liba budisi kuye.”

⁷ Kodwana akunamuntu owazi okuzakwenzeka! Ngubani ongamtjela bonyana kuzakwenzeka njani?

⁸ Akunamuntu onamandla wokukhandela ummoya begodu akakho onamandla phezu kwelanga lokufa. Akunakutjhaphululwa ngesikhathi sepi nomnono awubahlengi abaniniwo.

⁹ Koke lokhu ngakubona lokha nangizinikela kikho koke okwenziwa ngaphasi komthunzi welanga. Kunesikhathi lapha umuntu aba negunya khona phezu komunye umuntu ngokwenza okumbi.

¹⁰ Ngokunjalo ngabona abakhohlakeleko batjhidela ethempelini, bangena, kwathi labo abenze kuhle kwafanela bona baphume endaweni ecwengileko balitjalwe edorobheni. Nalokho kulilize.

¹¹ Ngebanga lokungakhutjhwa msinyana kwesigwebo sobulelesi, iinhliziyo zabantu zizala iimbozi

¹² ngombana isikhohlakali singenza ubelelesi kanenginengi, khonapho siphile isikhathi eside. Nami ngiyazi bona kuthiwa kuzabakhambela kuhle abantu abesaba uZimu, ngombana bayamhlonipha,

¹³ nokobana isikhohlakali angeze kwasikhambela kuhle namalangaso angeze elulwa njengesithunzi ngombana asihloniphi uZimu.

¹⁴ Kodwana ephasini kwenzeka nanti ilize: Kunabantu abalungileko abehlelwa ngokufanele iinkhohlakali neenkhohlakali ezehlelwa ngokufanele abalungileko. Ngithi nalokho kulilize.

¹⁵ Nje-ke ngababaza ithabo ngombana ayikho into engcono emuntwini ngaphasi komthunzi welanga ngaphandle kokugoma nokusela, ename. Lokho kufanele kukhambisane naye emtjhikatjhikenakhe emihleni yokuphila, uZimu amuphe yona ngaphasi komthunzi welanga.

¹⁶ Lokha nangizinikela kobana ngazi ukuhlakanipha nokuyelela umsebenzi owenziwa ephasini, okutjho bona amehlo womuntu akabuboni ubuthongo ebusuku nemini,

¹⁷ nje-ke ngabona woke umsebenzi kaZimu: Umuntu angeze azwisisa okwenziwa ngaphasi komthunzi welanga. Nanyana angajuluka kobana akufunyane angeze azwisisa. Ngitjho nanyana ohlakaniphileko asithi yena uyazi, angeze akghona ukuzwisisa.